«Antonavič pradstaŭlaje» — Saładucha anansuje kancert na 50 tysiač čałaviek
«Kali Isus Chrystos išoŭ 40 dzion pa pustyni, to Alaksandr Saładucha išoŭ 40 hadoŭ da Kastryčnickaj płoščy».
«U červieni 27‑ha ŭ mianie solnik hrandyjozny na Kastryčnickaj płoščy. Ja chaču sabrać 50 tysiač hledačoŭ. I ja viedaju, jak heta zrabić. I kancert budzie nazyvacca «Antonavič pradstaŭlaje», — raskazaŭ pra svaje tvorčyja płany ŭ intervju ANT Alaksandr Saładucha.
Pavodle słoŭ artysta, ideja kancerta jamu pryjšła, kali jon razam z maładoj zorkaj Naściaj Kraŭčanka źniaŭ klip na pieśniu «Naścia-Saša». Saładucha pryznaŭsia, što vychad za miežy zvykłaha žanru daŭsia jamu niaprosta:
«Ja i sa studyi chacieŭ syści razoŭ 50. Na zdymačnaj placoŭcy toje ž samaje. Ale pastajanna ŭnutrany hołas kazaŭ: «Nie rabi hetaha, ty pryjedzieš dadomu, ukusiš łokci i ŭ vačach maładych rabiat akažašsia słabym», — ščyra padzialiŭsia śpiavak.
Saładucha pryznajecca, što navažycca na zapis dapamoh pradziusar Siarhiej Minski: «Ja kažu — ja nie mahu na adnoj nocie, na adnym akordzie. Heta nie majo. Jon kaža — treba. Budzie bomba».
Pavodle słoŭ Saładuchi, mienavita fraza ź pieśni «Antonavič, navat nie mar» naviała jaho na dumku pra nazvu budučaha kancerta:
«Nie «Alaksandr Saładucha — 40 hadoŭ na scenie», a «Antonavič pradstaŭlaje». Heta budzie intryhavać».
Jak zajaŭlaje śpiavak, jon płanuje na svoj kancert zaprasić šerah viadomych błohieraŭ i vykanaŭcaŭ i pravieści jaho dniom u červieni, kali ŭ škołach i VNU buduć vypusknyja viečary:
«Ja chaču zaprasić tolki adnu moładź. Užo dali paćvierdžańnie Dzim Dzimyč, Uład Kabiakoŭ, Naścia Kraŭčanka, hurt «Drazdy». [Kancert płanujecca] ŭ červieni, kali vypusknyja viečary ŭ škołach i VNU, dniom budzie kancert. Ja pavinien bačyć vočy, ruki ŭsich. I ja vieru, što my źbiarom hetuju płošču. Na ich pryjduć ich prychilniki, na mianie pryjduć maje. Ale mienavita moładź».
U intervju Saładucha raskazaŭ, što prydumaŭ frazu, jakaja źjavicca ŭ anonsach kancerta:
«Kali Isus Chrystos išoŭ 40 dzion pa pustyni, to Alaksandr Saładucha išoŭ 40 hadoŭ da Kastryčnickaj płoščy».
Kamientary
" Antoška , Antoška .
Idi kopať kartošku " .