Nie vylivajcie vadu z-pad bulby. Voś šeść sposabaŭ z tołkam jaje vykarystać

Padčas varki bulba addaje ŭ vadu častku svaich karysnych rečyvaŭ. U advar traplajuć kruchmał, a taksama minierały — kalij, mahnij, žaleza i fosfar. Mienavita tamu jon moža spatrebicca ŭ samych roznych situacyjach — ad kulinaryi da dohladu za domam i raślinami.

Adnak, jak piša Heute.at, vykarystoŭvać takuju vadu možna nie zaŭsiody. U zialonaj bulbie źmiaščajecca naturalny taksin sałanin. Tamu vadu možna vykarystoŭvać, tolki kali bulbu vy staranna ababrali i vydalili ŭsie zialonyja miescy i parastki. Kali ž kłubni varylisia ŭ łupinie abo zachavali zialonyja miescy, vadu lepš vylić.

1. Na sup i sousy

Bulbiany advar moža stać dobraj asnovaj dla supoŭ i sousaŭ. Kruchmał, jaki ŭ im utrymlivajecca, robić ich huściejšymi i nadaje kremavuju kansistencyju, a taksama dapamahaje zrabić smak bolš nasyčanym.

2. Jak chatni srodak ad kašlu

Hety sposab viadomy ŭžo nie adnamu pakaleńniu. Ciopły bulbiany advar, źmiašany z łyžkaj miodu, u narodnaj miedycynie vykarystoŭvajuć pry suchim kašli. Ličycca, što jon dapamahaje źmiakčyć horła i palehčyć adychodžańnie makroty. Adnak varta pamiatać, što efiektyŭnaść takoha srodku navukova nie paćvierdžanaja i jon nie zamianiaje lačeńnia.

3. Na padkormku dla raślin

Dla vazonnych i sadovych raślin vada z-pad bulby taksam karysnaja. Minieralnyja rečyvy, što zastalisia ŭ vadzie, mohuć stać naturalnaj alternatyvaj kramnym uhnajeńniam.

Pierad vykarystańniem vady treba dać joj achaładzicca. Palivać treba tolki hlebu, nie traplajučy na liście. Kali advar nie vykarystoŭvajecca adrazu, jaho možna paru dzion trymać u chaładzilniku.

4. Na baraćbu z pustaziellem

Haračy bulbiany advar možna vykarystać suprać pustaziella. Kali vylić kipień na ziało, jakoje prarastaje pamiž plitkami sadovych darožak, vysokaja tempieratura razburaje strukturu raśliny, a kruchmał zakarkoŭvaje jaje pory. Paśla takoj apracoŭki zaviałuju raślinu značna praściej vydalić razam z koraniem.

5. Prybirać chatu

Haračaja vada z-pad bulby efiektyŭna rastvaraje tłuščy, tamu jaje karysna vylivać u rakavinu dla prafiłaktyki zaśmiečanaści trub. Taksama ŭ hetym advary možna zamačyć patelni ci kastruli z reštkami pryharełaj ježy — kruchmał dapamahaje rasščapić brud, što značna palahčaje nastupnaje myćcio.

6. Na dohlad vałasoŭ i skury

Vada z-pad bulby nadajecca i na kaśmietyčnyja mety, kali astynie. Joj možna apałoskvać vałasy — ličycca, što jana dapamahaje ŭmacavać ich strukturu. Taksama advar dadajuć u vannu abo vykarystoŭvajuć dla vannačak dla ruk i noh, kab źmiakčyć suchuju skuru.

• 7
• 0
• 2
• 4
• 1
• 0
• 0
• 0