Stasia Hlińnik pra Mielnikavu: Ja usio bolš i bolš dumaju, što jaje niama ŭ žyvych
Hlińnik miarkuje, što płan ź Mielnikavaj moh pajści nie tak, jak zadumana. Naprykład, mahła być kanfliktnaja situacyja z ahientam Łabiejevym, jaki supravadžaŭ Anžaliku ŭ pieralotach, i toj moh jaje zabić u Dubai.
Stasia Hlińnik, namieśnica dyrektara Ofisa Cichanoŭskaj, nie vieryć, što byłaja śpikierka Kaardynacyjnaj rady Anžalika Mielnikava viarnułasia ŭ Minsk.
«Z ulikam taho, jak razhortvajucca padziei vakoł hetaha kiejsu, ja usio bolš i bolš dumaju, što jaje niama ŭ žyvych»,— padzialiłasia jana ŭ intervju Dźmitryju Hurnieviču na «Radyjo Svaboda». Ale adznačyła, što nie maje novaj infarmacyi pra byłuju śpikierku.
«Mnie zdajecca, što jaje ŭžo pakazali b, kali b jana była ŭ režymu, bo było šmat nahodaŭ, kab vykarystać hetuju kartu, što Mielnikava ahient», — ličyć Hlińnik.
Naprykład, praciahvaje jana, padčas niadaŭnich vybaraŭ u Kaardynacyjnuju radu možna było nie płatformu atakavać, a pakazać Mielnikavu.
Hlińnik miarkuje, što płan ź Mielnikavaj moh pajści nie tak, jak zadumana. Naprykład, mahła być kanfliktnaja situacyja z ahientam Łabiejevym, jaki supravadžaŭ Anžaliku ŭ pieralotach, i toj moh jaje zabić u Dubai.
Adznačym, što sioleta ŭ sacsietkach źjavilisia fatahrafii Mielnikavaj ź minskaj spartzały, a baćka pryznaŭsia «Našaj Nivie», što jana ŭžo «daŭnavata» ŭ Biełarusi. Inšyja bačyli jaje ŭ «Dana Mole». «Lusterka» vyśvietliła, što ŭžo paśla źniknieńnia Mielnikava nabyła dźvie kvatery ŭ Minsku. Z treciaj jaje kvatery byŭ źniaty aryšt i aformleny padzieł majomaści z byłym mužam.
Hurnievič spytaŭ, jak naohuł atrymałasia, što novaha čałavieka ŭ palitycy pastavili na čale Kaardynacyjnaj rady.
«Mahčyma, heta dziŭna było, ale ludzi davierylisia, prahałasavali. My padtrymlivali na toj momant jaje jak pradstaŭnicu śpisu. Byŭ śpis Paŭła Łatuški, jany vysoŭvajuć čałavieka na pasadu, i zrazumieła, što heta śpis, jaki nabraŭ najbolš hałasoŭ padčas vybaraŭ. Vielmi łahična, što ich čałaviek budzie zajmać pasadu śpikiera (…) Ich unutranaje rašeńnie było vystavić Anžaliku Mielnikavu».
Stasia Hlińnik zhadvaje, što Mielnikava była enierhietyčnaj śpikierkaj i dobra załahodžvała kanflikty.
«Ja dapuskaju, što ŭ peŭny momant jaje mahli šantažavać, paŭpłyvać na jaje. Momant, u jaki źmianiłasia kamunikacyja i pavodziny, — heta studzień [2025 hoda]», — adznačaje Stasia.
Jana zhadvaje vystup Mielnikavaj ź pieśniaj na kanfierencyi demsiłaŭ u Varšavie ŭ dzień prezidenckich vybaraŭ u Biełarusi.
«Mnie tady zdałosia, što vykanańnie hetaj pieśni dziŭnavataje. (…) Heta byŭ pieršy momant, kali ja zafiksavała, što niešta źmianiłasia ŭ pavodzinach, i što heta dziŭny akt — śpiavać takuju pieśniu ŭ takoj maniery ŭ taki dzień. I paśla ŭžo jana pačynaje źnikać z kamunikacyi pakrychu».
Anžalicy Mielnikavaj vydali pašpart prykryćcia na imia Anhieliny Radzivonavaj?
Anžaliku Mielnikavu bačyli ŭ Minsku ŭ «Dana Mole»
Anžalika Mielnikava paśla źniknieńnia nabyła dźvie kvatery ŭ Minsku
«Jaje «vyvieli» z Polščy». Byłaja aficerka Ahienctva ŭnutranaj biaśpieki — pra toje, što Mielnikava znajšłasia
Kamientary
- Tamu što sistema nie abaviazkova pracuje całkam łahična i ŭnifikavana. I tamu što heta nie adziny mahčymy scenaryj.
- Nie pra ŭsio i ŭsich paviedamlajuć publična: dla prykładu film ONT u červieni 2026 h., dzie pakazvali bajcoŭ PKK za kratami, ŭ tym liku tych, pra zatrymańnie jakich dahetul nie kazali.
- Mohuć isnavać pieraściarohi, kab nie pryvablivać dadatkovuju ŭvahu da Łabiejeva i inšaj sietcy ahientaŭ, jakija vyjazdžajuć za miažu. Navina "Mielnikava ŭ Minsku" moža aktyvizavać pierahlad biaśpieki ŭ Polščy i ES, što nie karysna dla KDB i FSB.
- Mohuć isnavać damoŭlenaści ź Mielnikavaj (ahient jana sama abo čałaviek, jakoha zavierbavali abo prymusili), što paśla pierajezdu jana žyvie spakojna. I jaje prykład - uzor dla nastupnych viarbovak.