Anžalika Mielnikava paśla źniknieńnia nabyła dźvie kvatery ŭ Minsku
Adna — na praśpiekcie Lubimava, druhaja — u ŽK «Majak Minska».
Eks-śpikierka Kaardynacyjnaj rady Anžalika Mielnikava pierastała vychodzić na suviaź 25 sakavika 2025 hoda, adnačasova ź joj źnikli bolš za 150 tysiač dalaraŭ, pryznačanych dla KR i «Kibierpartyzan». «Lusterka» vyśvietliła, što ŭžo paśla źniknieńnia ad imia Mielnikavaj było zaklučana niekalki ździełak ź nieruchomaściu ŭ stalicy.
Z dakumientaŭ vynikaje, što praz paŭhoda paśla źniknieńnia — u vieraśni 2025 hoda — Anžalika stała ŭłaśnicaj adnapakajovaj kvatery ŭ Minsku. Žyllo znachodzicca na praśpiekcie Lubimava, jaho płošča składaje 33,8 kvadratnaha mietra.
Ceny na padobnyja kvatery ŭ hetym rajonie — ad 208 tysiač rubloŭ (kala 71 tysiačy dalaraŭ) da 240 tysiač rubloŭ (82 tysiačy dalaraŭ).
Paźniej u studzieni 2026 hoda eks-śpikierka KR kupiła i aformiła na siabie jašče adnu kvateru na vulicy Piatra Mścisłaŭca ŭ ŽK «Majak Minska» ŭ mikrarajonie Uschod. Pa papierach u joj taksama adzin pakoj, płošča — nievierahodnyja dla adnapakajoŭki 91,8 kvadratnaha mietra.
Takaja ž płošča, jak u novaj kvatery Anžaliki, — u čatyrochpakajovaj kvatery ŭ hetym kompleksie, jakuju ciapier pradajuć za 1,1 miljona rubloŭ (400 tysiač dalaraŭ). Za trochpakajoŭku mienšaj płoščy ŭ «Majaku» prosiać 643 tysiačy rubloŭ (219 tysiač dalaraŭ), prastornaja dvuchpakajoŭka vystaŭlena na prodaž za 572 tysiačy rubloŭ (195 tysiač dalaraŭ).
Jašče adnoj kvateraj u stalicy Mielnikava z 2016 hoda vałodała sumiesna z mužam i była ŭ joj prapisana. Kiraŭnik abjadnańnia byłych siłavikoŭ «Bajpoł» Alaksandr Azaraŭ paviedamlaŭ, što ŭ krasaviku 2024 hoda doma ŭ Mielnikavaj u Minsku byŭ pieratrus, sama jana tady atrymlivała pahrozy.
Pa infarmacyi krynicy «Lusterka», u mai 2024 hoda na hetu kvateru byŭ nakładzieny aryšt. Tady Śledčy kamitet zavioŭ kryminalnuju spravu ŭ dačynieńni da 257 udzielnikaŭ majučych adbycca vybaraŭ u Kaardynacyjnuju radu treciaha sklikańnia, Anžalika była ŭ ich liku.
Adnak u lutym 2026 hoda aryšt źniali pastanovaj taho ž SK. Praź miesiac kvatera pierajšła ŭ adnaasobnuju ŭłasnaść Mielnikavaj. Padstavaj dla hetaha stała pahadnieńnie ab padziele sumiesnaj ułasnaści muža i žonki. Jak praviła, padstavaj dla aficyjnaha padziełu majomaści stanovicca razvod.
Byłaja śpikierka Kaardynacyjnaj rady Anžalika Mielnikava źnikła ŭ sakaviku 2025 hoda. U apošni raz jaje bačyli na Šry-Łancy, kudy ŭ toj ža čas pryjazdžaŭ Alaksiej Łabiejeŭ — 32‑hadovy mužčyna, ź jakim u Mielnikavaj byli adnosiny i jaki źjaŭlajecca, jak vyśvietlili žurnalisty, supracoŭnikam Upraŭleńnia vajennaj kontrraźviedki KDB.
Łatuška: Nie mahu vyklučyć, što na niejkim etapie Mielnikava mahła trapić u pastku śpiecsłužbaŭ
«Jaje «vyvieli» z Polščy». Byłaja aficerka Ahienctva ŭnutranaj biaśpieki — pra toje, što Mielnikava znajšłasia
Łatuška: Anžalika Mielnikava viedała šmat adčuvalnaj infarmacyi
Łatuška: Mielnikava telefanavała mnie nočču i płakała
Kamientary