Perys Chiłtan damahłasia zakryćcia elitnaj škoły, u jakoj jana vučyłasia i ŭ jakoj ździekavalisia ź dziaciej
«Niama słoŭ, kab apisać, što adčuvaješ, kali stanovišsia tym čałaviekam, u jakim tak adčajna mieła patrebu ty sama ŭ dziacinstvie».
Štat Juta aficyjna anulavaŭ licenziju i zahadaŭ zakryć viadomuju pryvatnuju škołu-internat Provo Canyon School. Heta taja samaja ŭstanova zakrytaha typu dla padletkaŭ, dzie naprykancy 1990‑ch hadoŭ hod praviała znakamitaja madel i biźniesvumien Perys Chiłtan.
Rašeńnie ŭładaŭ stała vynikam šmathadovaj maštabnaj kampanii, jakuju Chiłtan viała suprać hvałtu nad dziećmi ŭ padobnych centrach.
Pavodle zajavy Šenan Toman-Błek, dyrektarki adździeła licenzavańnia Departamienta achovy zdaroŭja i sacyjalnych słužbaŭ Juty, rašeńnie ab zakryćci było pryniata paśla taho, jak dziaržaŭnyja rehulatary vyjavili tam ceły kompleks žudasnych parušeńniaŭ pravoŭ dziciaci i pravił biaśpieki.
Pravierki zafiksavali vypadki nieabhruntavanaha i žorstkaha fizičnaha abychodžańnia z vychavancami, vostry niedachop kadraŭ, z-za čaho dzieci zastavalisia biez nahladu. Kiraŭnictva nabirała ludziej na pracu «z vulicy», hrebujučy abaviazkovaj pravierkaj minułaha i sudzimaściaŭ.
Jašče ŭ mai 2026 hoda na škołu nakłali časovyja abmiežavańni paśla taho, jak piersanał admoviŭsia vyklikać chutkuju dapamohu vychavancu ź ciažkimi cialesnymi paškodžańniami.
Ciapier u administracyi ŭstanovy jość roŭna 15 dzion, kab całkam spynić pracu kampusa.
Upieršyniu pra kašmar svajho padletkavaha ŭzrostu Perys Chiłtan adkryta raspaviała ŭ 2020 hodzie ŭ dakumientalnym filmie «Heta Perys» (This Is Paris), a paźniej, u 2023 hodzie, navat vystupała ŭ Kanhresie ZŠA za reformu zakrytych internataŭ.
Pavodle jaje słoŭ, piersanał ustanovy rehularna źbivaŭ dziaciej, raspranaŭ dziaŭčat dahała i prymusova začyniaŭ u adzinočnych kamierach-karcarach, hvałtam paiŭ nieviadomymi psichatropnymi tabletkami, a supracoŭniki-mužčyny nazirali za tym, jak dziaŭčaty prymajuć duš.
Daviedaŭšysia pra rašeńnie ŭładaŭ Juty, Chiłtan vystupiła ź vielmi emacyjnaj zajavaj u sacsietkach: «Niama słoŭ, kab apisać, što adčuvaješ, kali stanovišsia tym čałaviekam, u jakim tak adčajna mieła patrebu ty sama ŭ dziacinstvie. Kali b ja mahła viarnucca i skazać toj maleńkaj dziaŭčyncy, što adnojčy jana dapamoža abaranić inšych dziaciej ad taho, što pieražyła jana, jana b nie pavieryła», — napisała Chiłtan.
«Navat niama słoŭ, kab apisać, što ty adčuvaješ, kali narešcie prychodziać źmieny, za jakija ty tak doŭha zmahałasia i maliłasia. Dziaržava paćvierdziła toje, što ŭsie vyžyłyja viedali zaŭsiody: Provo Canyon School zdradziła dzieciam, jakich joj davieryli», — zajaviła Chiłtan.
Jana taksama dadała ŭ kamientary: «Ja była adnoj z hetych dziaciej.
Ja viedaju, jak heta — klikać na dapamohu i razumieć, što nichto nie pryjdzie. Maleńkaja dziaŭčynka ŭva mnie, jakoj kaliści kazali, što joj nichto i nikoli nie pavieryć, siońnia adčuła, što jaje praŭdu pryznali. My kazali praŭdu. Zaŭsiody. Nivodnaja sistema abo ŭstanova nie źjaŭlajecca zanadta mahutnaj, kab paźbiehnuć adkaznaści, kali achviary admaŭlajucca maŭčać».
Kamientary