Vyjšaŭ z načnoha kłuba i źnik. U Minsku piatyja sutki šukajuć chłopca
28‑hadovy mužčyna ŭ noč na 27 śniežnia razam z tavaryšam adpačyvaŭ u načnym kłubie Modul Art Platform. Pryjaciel pajšoŭ, Pavieł zastaŭsia adpačyvać, a što było dalej — nichto nie viedaje. Žychara stalicy šukajuć užo piatyja sutki.
«Jon adpačyvaŭ z byłym kaleham. Kaleha byŭ ź im da treciaj hadziny nočy, paśla čaho pajechaŭ dadomu. Pavieł zastaŭsia ŭ kłubie. My znajšli ŭsich, ź jakimi jon tam paznajomiŭsia, ale jany taksama syšli raniej za jaho. U vyniku Pavieł vyjšaŭ z kłuba ŭ 5:30 ranicy i paśla hetaha źnik. Bolš infarmacyi pra jaho ŭ nas niama», — raskazała žurnalistu Onlíner Julija, maci Paŭła.
Udałosia ŭstanavić, što telefon Paŭła apošni raz byŭ u zonie dasiažnaści 27 śniežnia ŭ rajonie vulicy Bresckaj (heta prykładna 7 km ad Kastryčnickaj), ale pakul heta nie dało vynikaŭ. Pošukami chłopca zajmajecca milicyja.
Pavieł chudarlavaha ciełaskładu, rost — 176 sm. Byŭ apranuty ŭ čornyja štany, bajku, kurtku z futravym kaŭniarom i biełyja krasoŭki. Pry sabie mieŭ maleńkuju čornuju sumku. Na kiściach ruk — biełyja plamy (viciliha).
Kali vam niešta viadoma pra Paŭła, źviažyciesia ź milicyjaj (102) abo patelefanujcie ŭ PVA «Anioł»: 7733, +375 (33) 666 60 33.
Kamientary