Jakaja adna rysa robić mieniedžara vydatnym? Adkaz vas ździvić

Heta nie prosta teoryja, a vysnova z maštabnaha daśledavańnia. Pra heta na staronkach The Wall Street Journal piša Virdžynija Mini (Virginia Minni), dacentka ekanomiki Biźnies-škoły Buta Čykahskaha ŭniviersiteta. Jaje vysnovy hruntujucca na 10‑hadovym analizie pracy vialikaj transnacyjanalnaj kampanii, jaki achapiŭ 200 000 supracoŭnikaŭ i 30 000 mieniedžaraŭ u 100 krainach śvietu. I akazałasia, što najlepšych kiraŭnikoŭ adroźnivaŭ ad kaleh nie niejki sakretny mietad matyvacyi, a mienavita ŭmieńnie pieraraźmiarkoŭvać ludziej na pravilnyja roli abo dapamahać im samim zrabić hety krok.

Takija źmieny byli karysnyja dla ŭsich. Supracoŭniki stanavilisia bolš pradukcyjnymi i pačynali bolš zarablać na novych pasadach, a stanoŭčy efiekt dla kampanii i samich rabotnikaŭ zachoŭvaŭsia hadami.

Pošuk talentaŭ siarod kiraŭnikoŭ

Kab zrazumieć, chto ź mieniedžaraŭ najlepšy, aŭtarka analizavała, jak chutka jany atrymlivali pavyšeńnie ŭ paraŭnańni sa svaimi kalehami. Zvyčajna chutki karjerny rost niepasredna źviazany ź inšymi pakazčykami pośpiechu: pavieličeńniem zarobku i vysokimi acenkami pracy pa mietadzie «360 hradusaŭ» (heta kali acenku dajuć nie tolki kiraŭniki, ale i kalehi z padnačalenymi). U vyniku kala 25% usich mieniedžaraŭ byli adniesieny da katehoryi najlepšych.

Dalej Virdžynija Mini praanalizavała, jak pavodzili siabie dźvie hrupy kiraŭnikoŭ padčas ratacyj — praktyki, kali mieniedžary rehularna, zvyčajna kožnyja dva hady, pierachodziać u novyja kamandy.

Kab heta patłumačyć, jana prosić ujavić dźvie adnolkavyja kamandy sa zvyčajnymi kiraŭnikami. Paśla ratacyi ŭ adnu ź ich prychodzić top-mieniedžar, a ŭ druhuju — inšy, mienš efiektyŭny kiraŭnik. Pakolki kamandy va ŭsim astatnim identyčnyja, lubaja roźnica ŭ vynikach budzie zaležać mienavita ad stylu pracy novaha mieniedžara.

I vyniki ŭrazili. Pa-pieršaje, supracoŭniki, jakija pracavali pad kiraŭnictvam top-mieniedžara, mieli na 40% bolš šancaŭ ździejśnić haryzantalny pierachod u inšy adździeł na praciahu siami hadoŭ. I heta byli nie prosta farmalnyja źmieny: jany časta praduhledžvali kardynalnyja pieramieny, naprykład, pierachod na absalutna novuju rolu ŭ kampanii.

Ale sprava nie tolki ŭ tym, što ludzi čaściej mianiali pracu. Hałoŭnaje — što hetyja źmieny rabili ich značna bolš paśpiachovymi.

Supracoŭniki, jakija pierajšli na novuju pasadu pad kiraŭnictvam top-mieniedžara, stali značna bolš pradukcyjnymi i vysokaapłatnymi. Na praciahu siami hadoŭ ich zarobak byŭ u siarednim na 13% vyšejšy, a pakazčyki efiektyŭnaści (naprykład, abjom prodažaŭ na čałavieka) — na 16% vyšejšyja, čym u kaleh ź mienš efiektyŭnymi kiraŭnikami.

Ci možna ŭsiu zasłuhu prypisvać mieniedžaru? Analiz pakazvaje, što sam fakt źmieny pracy tłumačyŭ kala 64% rostu zarobku. I, jak vynikaje z daśledavańnia, mienavita top-mieniedžar byŭ tym katalizataram, jaki ŭ pieršuju čarhu i padšturchoŭvaŭ ludziej da hetych źmien.

Nie prosta matyvatar ci nastaŭnik

Jašče bolš važnym źjaŭlajecca toje, što efiekt ad pracy z top-mieniedžaram byŭ doŭhaterminovym. Kali b vybitny kiraŭnik byŭ prosta dobrym koŭčam abo matyvataram, pośpiechi supracoŭnikaŭ źnikali b nieŭzabavie paśla jaho sychodu z kamandy. Adnak daśledavańnie pakazała, što mabilnaść i zarobki rabotnikaŭ praciahvali stabilna raści navat paśla taho, jak mieniedžar pierachodziŭ na inšuju pazicyju.

Anałahična, kali b jon byŭ prosta dobrym nastaŭnikam, jaho padnačalenyja palapšali b vyniki na svaich ciapierašnich pasadach. Ale na praktycy jany nie prosta stanavilisia lepšymi ŭ svajoj spravie — jany pierachodzili na zusim inšyja roli i tam dasiahali pośpiechu.

Jak jany heta rabili: pramoje dziejańnie i šturšok

U niekatorych vypadkach top-mieniedžary sami pieravodzili ludziej na novyja pazicyi. Ale čaściej jany natchniali, padšturchoŭvali supracoŭnikaŭ šukać novyja roli samastojna. Naprykład, ich padnačalenyja na 50% čaściej brali na siabie karotkaterminovyja prajekty pa-za miežami svajoj asnoŭnaj kamandy i 9,7% čaściej, čym inšyja rabotniki, zapaŭniali profil na ŭnutranaj płatformie pa padbory vakansij.

Vidavočna, što takija kiraŭniki vałodali ŭmieńniem bačyć schavanyja talenty i pamknieńni svaich ludziej i nakiroŭvać ich na bolš prydatnyja roli.

Heta paćviardžajecca i kankretnymi danymi: top-mieniedžary nadavali na 19% bolš času sustrečam sam-nasam sa svaimi supracoŭnikami. Bolš za toje, padčas intervju sami rabotniki apisvali dobrych kiraŭnikoŭ jak mientaraŭ, jakija dapamahali im raźvivać karjeru praz strukturavanuju zvarotnuju suviaź, heta značyć — havoračy ź imi, udumvajučysia ŭ ich pytańni i sumnievy, refleksujučy razam, i stvarali mahčymaści, što adpaviadali ich navykam i žadańniam.

Naprykład, adzin z rabotnikaŭ raspavioŭ, jak mieniedžar zaŭvažyŭ jaho cikavaść da hrafičnaha dyzajnu padčas zvyčajnaj prezientacyi. Kiraŭnik daručyŭ jamu ŭznačalić raspracoŭku dyzajnu dla novaj kampanii.

U inšym vypadku, kali supracoŭnica vykazała žadańnie vyvučyć ličbavy markietynh, mieniedžar arhanizavaŭ dla jaje stažyroŭku ŭ adpaviednym adździele, što ŭ vyniku dazvoliła joj pierajści na novuju, bolš novuju, bolš padychodziačuju dla jaje pasadu.

Jakija vysnovy dla biźniesu?

Zychodziačy z hetych vynikaŭ, vysnovy dla kampanij vidavočnyja. Kiraŭniki pavinny aceńvać i ŭznaharodžvać mieniedžaraŭ nie tolki za vyniki ich kamandy, ale i za raźvićcio talentaŭ praz razumnyja pieramiaščeńni.

Pošuk unikalnych zdolnaściej i padbor pravilnych rolaŭ dla ludziej nie pavinien być vyklučna zadačaj adździeła kadraŭ — heta pramaja adkaznaść mieniedžara. Kampanijam taksama varta zaachvočvać hnutkaść, spraščajučy pracedury ratacyi i časovych pierachodaŭ z adździeła ŭ adździeł.

Aŭtar padsumoŭvaje: stavić supracoŭnikaŭ na pravilnaje miesca — heta toje, što top-mieniedžary robiać lepš za ŭsio. I kampanii pavinny heta ŭśviadomić i vykarystoŭvać napoŭnicu.

• 3
• 0
• 0
• 0
• 0
• 0
• 0
• 0