U Homieli pa kryminalnaj spravie aryštavali byłoha palitviaźnia i jahonuju žonku
U homielskim SIZA № 3 ciapier utrymlivajucca były palitviazień Stanisłaŭ Mačałaŭ i jahonaja žonka Śviatłana Jakubovič. Pra heta stała viadoma ad čałavieka, jaki raniej taksama znachodziŭsia ŭ hetym izalatary, piša «Homielskaja viasna».
Śviatłanu Jakubovič zatrymali jašče ŭ kancy minułaha hoda, a ŭžo 19 śniežnia 2024 hoda pravaabaroncy pryznali jaje palityčnaj źniavolenaj. Pavodle ich źviestak, žančynie vystavili abvinavačańnie pa art. 357 Kryminalnaha kodeksa — «zmova z metaj zachopu ŭłady niekanstytucyjnym šlacham».
Što da Stanisłava Mačałava, to paśla taho, jak jon 30 śniežnia 2023 hoda vyjšaŭ z turmy, adbyŭšy trochhadovy termin, infarmacyi pra jaho doŭhi čas nie było. U 2022 hodzie jaho asudzili pa art. 342 (udzieł u dziejańniach, što parušajuć hramadski paradak) i art. 364 (pahroza hvałtam u dačynieńni da pradstaŭnika ŭłady).
24 lutaha 2022 hoda, kali Stanisłaŭ znachodziŭsia ŭ tym ža SIZA, jon ažaniŭsia sa Śviatłanaj Jakubovič, jakaja pieradavała jamu pieradačy i padtrymlivała jaho.
Ciapier pravaabaroncy vyśviatlajuć, pa jakich artykułach abvinavačvajuć Stanisłava Mačałava i ci pačaŭsia ŭžo sud nad im i Śviatłanaj Jakubovič.
Akramia taho, u kancy vieraśnia stała viadoma, što Ihar Mačałaŭ, brat Stanisłava, taksama staŭ achviaraj palityčnaha pieraśledu — jaho pryznali vinavatym u «sadziejničańni ekstremisckaj dziejnaści» (art. 361‑4 KK). Pavodle papiarednich źviestak, jamu pryznačyli pakarańnie, nie źviazanaje z pazbaŭleńniem voli.
Kamientary