Minski haradski sud nie vytrymlivaje nahruzki — nie paśpiavajuć sudzić palitviaźniaŭ

Minski haradski sud strašna pierahružany palitviaźniami, kanviejer pracuje na šalonaj chutkaści i, zdajecca, užo nie vytrymlivaje nahruzku. Zdarajucca dni, kali da 90% razhladajemych spraŭ — palityčnyja.

Dziaržava chavaje dakładnuju infarmacyju pra kolkaść palityčnych pracesaŭ, možna sabrać tolki ŭskosnyja źviestki. Ad pačatku hoda pa ŭsioj Biełarusi było dadadziena ŭ śpis «ekstremistaŭ» 975 čałaviek — adpaviedna, usich hetych ludziej užo prapuścili praz sudy, ich prysudy paśpieli ŭstupić u zakonnuju siłu. Heta značyć, što realna ich sudzili prykładna ŭ kastryčniku 2024 — žniŭni 2025 hoda, ale, hruba akruhlajučy, budziem ličyć ich sioletnimi palitviaźniami.

Pavialičyć

Jak padzialiłasia sudovaja nahruzka pa rehijonach?

411 čałaviek sudzili za palityku ŭ rajonnych sudach Minska. Tudy traplajuć palitviaźni ź lohkimi kryminalnymi artykułami, jak, naprykład, udzieł u pratestach.

Jašče 235 čałaviek asudzili ŭ rajonnych sudach Biełarusi. Iznoŭ-taki, pa lahčejšych spravach.

Usie abłasnyja sudy ŭziali na siabie jašče 177 palitviaźniaŭ ź ciažejšymi artykułami.

I voś, narešcie, Minski haradski sud, taksama ź ciažejšymi spravami. Tut, u adnym sudzie, ad pačatku hoda vynieśli prysudy 152 palitviaźniam. Pryčym varta adznačyć, što kali luby čałaviek, asudžany ŭ rajonnych sudach Minska, piša apielacyju, to jaje budzie razhladać Minski haradski sud. Hety razhlad dziažurny, amal zaŭsiody biessensoŭny, ale ŭsio adno niejkuju dadatkovuju nahruzku na sudovuju sistemu jon stvaraje.

Havorka nie pra toje, što sudździaŭ Minskaha haradskoha suda treba paškadavać, nie. Prosta davodzicca kanstatavać, što jany nie spraŭlajucca z takoj kolkaściu palitviaźniaŭ.

Pavialičyć

U lutym 2025 hoda siłaviki atrymali dostup da bota prajekta «Biełaruski Hajun». Pačalisia aryšty pa ŭsioj krainie. U zvyčajnaj situacyi rasśledavańnie takich kryminalnych spraŭ pavinna ŭkłaścisia ŭ paŭhoda, paśla čaho ich pieradajuć sud. Zakon davoli stroha vyznačaje terminy, u jakija pavinien pačacca praces.

Paŭhoda ad pačatku aryštaŭ prajšło, infarmataraŭ «Hajuna» masava sudziać va ŭsich abłasnych sudach — ale tolki nie ŭ Minsku.

Jak stała viadoma «Našaj Nivie», ludziej, aryštavanych u stalicy pa hetaj vialikaj spravie, masava adpraŭlajuć sudzić u abłasnyja sudy — bo sudździ Minskaha haradskoha suda nie paśpiavajuć ich absłužyć. Havorka nie pra adzinkavyja situacyi, nam viadoma pra bolš za dziesiać takich vypadkaŭ.

Heta značyć, što palitviaźniaŭ paviazuć pierad sudom u SIZA abłasnych centraŭ, a ich svajakam daviadziecca katacca tudy-siudy i na sam praces, i na spatkańni.

Bolš za toje, ź Minskaha haradskoha suda addajuć u abłasnyja sudy nie tolki staličnych «Hajunoŭ», ale i palitviaźniaŭ, abvinavačanych pa niekatorych inšych artykułach.

• 0
• 0
• 0
• 0
• 1
• 0
• 9
• 0