Ci možna vieźci ź ES u Biełaruś bolš za 60 jeŭra najaŭnymi? Adkazali ŭ mytni Litvy

Kolki valuty možna vieźci praź miažu pry viartańni ŭ Biełaruś ź Jeŭrasajuza — častaje pytańnie ŭ čatach i tematyčnych hrupach. Litva ŭ niejki momant nibyta prybrała patrabavańnie adnosna 60 jeŭra, ale ŭ apošni hod padarožniki znoŭ dzielacca historyjami pra pravierki najaŭnych.

U čatach pišuć, što mnohaje zaležyć ad źmieny ŭ litoŭskich punktach propusku. Trochi praściej dla hramadzian Jeŭrasajuza, jakim dazvalajuć pravozić jeŭra ŭ Biełaruś z raźlikam na toje, kolki treba ŭ sutki.

Z sumaj bolš za 60 jeŭra razvaročvajuć biełarusaŭ i na łatvijskaj miažy. U vyniku kupiury mianiajuć na inšuju valutu, naprykład dalary, tamu što abmiežavańni raspaŭsiudžvajucca tolki na jeŭra. Zdajecca, pytańniaŭ nie ŭźnikała tolki na polskim učastku miažy ź ES, pakolki hetaja kraina nie ŭvachodzić u jeŭrazonu.

Ciapier ža tema znoŭ apynułasia ŭ topie dla abmierkavańnia, bo paśla zakryćcia polskaj miažy šmatlikija padarožniki viartajucca ŭ Biełaruś praź Litvu i zadalisia pytańniem: što rabić z najaŭnymi, jakija ŭ ich zastajucca?

U litoŭskaj mytni Office Life adkazali, što zhodna z rehłamientam Rady ES № 765/2006 zabaronienyja prodaž, pastaŭka, pieradača abo ekspart banknot jeŭra ŭ Biełaruś. Heta tyčycca jak fizičnych asob, tak i kampanij.

Abmiežavańnie nie ŭžyvajecca, kali havorka idzie pra najaŭnyja dla asabistaha karystańnia fizičnych asob, jakija jeduć u Biełaruś, abo ich bližejšych svajakoŭ, jakija iduć razam ź imi.

«Kankretnaja kolkaść banknot, jakija pieravoziacca z hetaj metaj, nie ŭstanoŭlenaja, ale asoba, jakaja ich pieravozić, pavinna dakazać mytnamu słužboŭcu, što hetaja suma patrebna jamu vyklučna dla asabistych metaŭ. Padkreślivajem, što pasažyr abaviazany abhruntavać nieabchodnaść pieravozki banknot jeŭra i dać mytnamu słužboŭcu dokazy ich vykarystańnia ŭ asabistych metach», — patłumačyła Irena Čarkasavienie, hałoŭnaja śpiecyjalistka adździeła mytnaj infarmacyi Litvy.

Jak mienavita dakazać, litoŭski bok nie ŭdakładniaje. Ale, vierahodna, padydzie dekłaracyja, što hetyja samyja hrošy raniej byli ŭviezienyja ŭ Litvu dla asabistych metaŭ. Jak minimum tak heta tłumačać niepasredna na litoŭskaj miažy, kažuć padarožniki, jakim zadavali takoje pytańnie.

U mytni Litvy taksama adznačyli, što vyvaz u Biełaruś najaŭnych hrošaj u inšych valutach nie zabaronieny. Ale kali havorka idzie pra sumu, ekvivalent jakoj pa aficyjnym kursie Banka Litvy na datu pierasiačeńnia miažy składaje 10 000 jeŭra i bolš, jaje treba dekłaravać. Pry hetym razam z dekłaracyjaj na najaŭnyja hrošy pry pajezdkach u trecija krainy treba padać kopii dakumientaŭ, jakija paćviardžajuć pachodžańnie hetych hrošaj.

Litoŭski bok taksama padkreśliŭ, što ŭvoz banknot jeŭra abo aficyjnaj valuty luboj dziaržavy — člena Jeŭrasajuza ŭ ES ź Biełarusi nie zabaronieny. Sankcyi dziejničajuć tolki pry vyvazie jeŭra ŭ Biełaruś.

• 1
• 3
• 3
• 15
• 0
• 1
• 0
• 0