«Zadzieł prajedzieny». Pradpryjemstva, jakoje raspracavała ŭsie kaśmičnyja rakiety SSSR, znachodzicca ŭ krytyčnym stanie

Pavodle słoŭ Ihara Malcava, u hetaj karparacyi — šmatmiljonnyja daŭhi, pracenty pa kredytach «źjadajuć» biudžet, mnohija pracesy nieefiektyŭnyja, a značnaja častka kalektyvu straciła matyvacyju i adkaznaść. Hiendyrektar adznačyŭ, što ŭ apošnija hady amal usie abiacańni pa klučavych prajektach akazalisia niaspraŭdžanymi, a terminy sarvanyja.

Jon padkreśliŭ, što «zadzieł, stvorany Siarhiejem Paŭłavičam [Karalovym] i raźvity našymi hienijalnymi kanstruktarami — Mišynym, Hłuško, Siamionavym — na siońniašni dzień prajedzieny», i papiaredziŭ: budučynia «Enierhii» zaležyć ad kožnaha supracoŭnika. Kiraŭnik zaklikaŭ kalektyŭ spynić iluzii pra toje, što ŭsio dobra, i adkryta pryznać kryzis.

Ihar Malcaŭ nie vyklučyŭ mahčymaści, što pradpryjemstva nie zmoža narmalna funkcyjanavać, płacić zarobki i stvarać novyja raspracoŭki. Jon zajaviŭ pra nieabchodnaść «rašučych dziejańniaŭ» i zaklikaŭ supracoŭnikaŭ sumlenna adkazać sabie, ci hatovyja jany pracavać dziela vyniku. Zadaču vyratavańnia kampanii jon nazvaŭ «cudam», padkreśliŭšy: «My pavinny zrabić usio, što ŭ našych siłach, a niemahčymaje daručym Bohu».

Pavialičyć

RKK «Enierhija» — hałoŭnaje rasijskaje pradpryjemstva ŭ śfiery piłatavanaj kasmanaŭtyki, zasnavanaje ŭ 1946 hodzie Siarhiejem Karalovym. Jano raspracavała pieršyja savieckija balistyčnyja rakiety, rakiety-nośbity «Sputnik», «Vostok», «Voschod», «Łuna», «Mołnija» i «Sojuz», a taksama kaśmičnyja karabli «Vostok» i «Voschod» i pieršyja mižpłanietnyja aŭtamatyčnyja stancyi, jakija dasiahnuli Miesiaca, Vieniery i Marsa.

Kryzis u rasijskaj kaśmičnaj halinie pahłybiŭsia paśla pačatku poŭnamaštabnaj vajny va Ukrainie, kali «Raskosmas» trapiŭ pad sankcyi i straciŭ amal usich zamiežnych zakazčykaŭ. Pa vynikach 2024 hoda karparacyja ździejśniła ŭsiaho 17 kaśmičnych puskaŭ — heta minimum dla Rasii z pačatku 1960-ch, epochi Juryja Haharyna, kali SSSR pieršym adpraviŭ čałavieka ŭ kosmas.

Zhodna z danymi partała Payloadspace, ad ZŠA, jakija zapuścili na arbitu 145 aparataŭ, Rasija adstała bolš čym u 8 razoŭ, a ad Kitaja (68 puskaŭ) — u čatyry razy.

Jašče čverć stahodździa tamu Rasija zajmała viadučyja pazicyi pa arbitalnych puskach: u 2000 hodzie «Raskosmas» vykonvaŭ bolš za 30 startaŭ u hod suprać 28 u ZŠA, 12 — u Jeŭropy i 5 — u Kitaja. Ale z taho času ZŠA pavialičyli kolkaść puskaŭ u 5,2 raza, a Kitaj — amal u 14 razoŭ. U vyniku Rasija adkaciłasia na treciaje miesca siarod kaśmičnych dziaržaŭ i tolki niaznačna apiaredžvaje Novuju Ziełandyju, jakaja ŭ minułym hodzie praviała 13 puskaŭ.

• 0
• 0
• 0
• 0
• 0
• 0
• 0
• 0