Za Nieptunam moža być jašče adna płanieta pamieram ź Ziamlu, pra jakuju raniej nie padazravali

Jak piša Focus.pl, daśledavańni arbit tranśnieptunavych abjektaŭ dajuć padstavy mierkavać ab isnavańni nieviadomaj płaniety.

Astranomy zaŭvažyli, što arbity dalokich niabiesnych cieł u Pojasie Kojpiera demanstrujuć sistematyčnaje adchileńnie prykładna na 15 hradusaŭ ad asnoŭnaj płoskaści Soniečnaj sistemy. 

Samaje cikavaje, što hetaja źjava nazirajecca vyklučna ŭ peŭnym dyjapazonie adlehłaściaŭ — pamiž 80 i 400 astranamičnymi adzinkami(AA) ad Sonca (astranamičnaja adzinka składaje prykładna 150 miljonaŭ kiłamietraŭ). Bližejšyja abjekty, jakija kruciacca na adlehłaści 50-80 AA, nie demanstrujuć nijakich anamalij.

Statystyčny analiz pakazvaje: vierahodnaść vypadkovaha charaktaru takoj źjavy — usiaho kala 2%.

Kab vyklučyć mahčymyja pamyłki, daśledčyki raspracavali novuju mietodyku vyznačeńnia siaredniaj płoskaści Pojasa Kojpiera. 

Chto ž hetaja tajamničaja susiedka?

Kali Płanieta Y isnuje, jaje masa moža znachodzicca ŭ miežach pamiž masaj Mierkuryja i Ziamli. Jana pavinna krucicca vakoł Sonca na adlehłaści 100—200 AA, značna bližej, čym mierkavanaja Dziaviataja płanieta.

Kampjutarnyja madeli pakazvajuć, što nachił arbity hetaj płaniety składaŭ by nie mienš za 10° adnosna płoskaści ekliptyki.

Inšy varyjant, jaki razhladajuć navukoŭcy, — abjekt pamieram z Płuton. Ale hetaja madel horš tłumačyć sabranyja danyja.

Varta padkreślić: Płanieta Y nie maje ničoha ahulnaha ź viadomaj hipotezaj ab Dziaviataj płaniecie. Apošniaja pavinna mieć masu pamiž Ziamloj i Nieptunam i znachodzicca nie mienš čym u 300 AA ad Sonca.

Nazva «Płanieta Y» abrana jak łahičny praciah paśla «Płaniety X», jakaja ŭ rešcie rešt stała asacyjavacca z kancepcyjaj Dziaviataj płaniety.

Što budzie dalej

Treba pryznać, što sama kancepcyja hučyć niekalki ekzatyčna, ale ličby havorać sami za siabie. U bližejšyja hady situacyja moža prajaśnicca.

Vialikaje naziralnaje pole absiervatoryi Viery Rubin i dziesiacihadovy prajekt «Ahlad spadčyny kosmasu i času» (Legacy Survey of Space and Time — LSST) dazvolać pravieryć hipotezu. Navat kali sam abjekt budzie zanadta ciažka ŭbačyć, prybory zmohuć zafiksavać jaho ŭpłyŭ na siaredniuju płoskaść Pojasa Kojpiera.

Navukoŭcy zaklikajuć da aściarožnaha aptymizmu: kali adkryćcio paćvierdzicca, heta dazvolić hłybiej zrazumieć pracesy farmiravańnia źniešnich častak Soniečnaj sistemy i adkryć novyja staronki jaje historyi.

• 8
• 0
• 0
• 0
• 5
• 0
• 0
• 0