Tramp nazvaŭ novy dedłajn ultymatymu Tehieranu, «inakš Iran pieratvorycca ŭ kamienny viek»
«Usiu krainu možna vyvieści z ładu za adnu noč — i hetaja noč moža nastać užo zaŭtra», — skazaŭ prezident ZŠA.
Prezident ZŠA Donald Tramp u paniadziełak znoŭ paŭtaryŭ pahrozy na adras Irana, ad jakoha jon patrabuje adkryć Armuzski praliŭ dla sudnachodstva da viečara aŭtorka pa Vašynhtonie, abiacajučy ŭ advarotnym vypadku nanieści ŭdary pa infrastruktury krainy.
«Usiu krainu možna vyvieści z ładu za adnu noč — i hetaja noč moža nastać užo zaŭtra», — skazaŭ jon u ŭstupnym słovie na pres-kanfierencyi ŭ Biełym domie.
«U ich nie budzie ni mastoŭ, ni elektrastancyj. Jany apynucca ŭ kamiennym vieku», — dadaŭ jon paźniej, adkazvajučy na pytańni žurnalistaŭ.
Tramp paćvierdziŭ, što termin ultymatumu zakančvajecca a 20:00 aŭtorka pa ŭschodnim časie (try hadziny nočy sierady pa Minsku).
«Da apoŭnačy zaŭtrašniaha dnia kožny most u Iranie budzie całkam źniščany, a kožnaja elektrastancyja ŭ Iranie vyjdzie z ładu — jany buduć hareć, vybuchać i bolš nikoli nie buduć vykarystoŭvacca. Heta moža adbycca na praciahu čatyroch hadzin, kali my zachočam. Ale my nie chočam, kab heta adbyłosia», — skazaŭ amierykanski lidar.
Uviečary ŭ Iranie było apublikavana novaje piśmovaje paviedamleńnie viarchoŭnaha lidara Madžtaba Chamieniei. Jano datyčyłasia zabojstva kiraŭnika raźviedki Korpusa vartavych isłamskaj revalucyi Madžyda Chademi, za jakoje ŭziaŭ na siabie adkaznaść Izrail.
U svaim pasłańni Chamieniei, paŭtarajučy zvykłuju iranskuju rytoryku, piša, što hibiel kamandziraŭ — a Chademi daloka nie pieršy vojenačalnik, jaki zahinuŭ z pačatku vajny, — nie padarvie ideałohiju KSIR.
Madžtaba Chamieniei byŭ abrany novym viarchoŭnym lidaram kala miesiaca tamu paśla hibieli jahonaha baćki, ajatały Ali Chamieniei, 28 lutaha. Z taho času jon niekalki razoŭ publikavaŭ piśmovyja zajavy, ale ni razu nie źjaŭlaŭsia na publicy; za hety čas nie źjaŭlałasia ni fatahrafij, ni videazapisaŭ ź im. Donald Tramp zajaŭlaŭ, što Mudžtaba abo miortvy, abo znachodzicca ŭ ciažkim fizičnym stanie. Iranskija aficyjnyja asoby nastojvali, što jon zdarovy i tolki paźbiahaje publičnaha źjaŭleńnia ź mierkavańniaŭ biaśpieki.
U paniadziełak Iran i ZŠA atrymali raspracavanyja Pakistanam prapanovy ab spynieńni bajavych dziejańniaŭ, ale na praciahu dnia pastupali supiarečlivyja paviedamleńni, i pakul niezrazumieła, ci jość šancy na dasiahnieńnie damoŭlenaściaŭ. Tramp kaža, što pieramovy z Tehieranam viaducca. Iranskaje ahienctva Irna paviedamiła ŭ paniadziełak, što Iran užo adchiliŭ prapanovu ab pieramirji i nastojvaje na nieabchodnaści kančatkovaha zakančeńnia kanfliktu.
Pradstaŭnik Biełaha doma raniej paviedamiŭ Bi-bi-si, što prapanova ab pieramirji — «adna z mnohich idej», jakija razhladaje Donald Tramp, adnak pakul apieracyja suprać Irana praciahvajecca. Pientahon admianiŭ bryfinh u dzień zakančeńnia terminu ultymatumu Trampa Iranu:
Tym časam Ministerstva abarony ZŠA admianiła pres-kanfierencyju, zapłanavanuju na aŭtorak — u dzień zakančeńnia terminu ultymatumu Trampa pa Armuzskim pralivie.
Mierapryjemstva było zapłanavana na 8:00 pa miascovym časie (15:00 pa Minsku). Adkazvać na pytańni žurnalistaŭ pavinny byli ministr abarony Pit Chiehsiet i kiraŭnik Abjadnanaha kamiteta načalnikaŭ štaboŭ ZŠA hienierał Den Kiejn.
Kamientary
i pojduć zadavolenyja spać u bambaschovišča.
Niešta mnie hetaje "prinuždienije k miru" nahadvaje....