U Budapiešt dla ratavańnia Orbana pierad samymi vybarami pryjechaŭ Džej Dzi Vens

Samalot Vensa ranicaj u aŭtorak sustrakaŭ ministr zamiežnych spraŭ Vienhryi Pieter Sijarta. Pierad hetym jon adznačyŭ u fejsbuku «asabistuju družbu pamiž Donaldam Trampam i Viktaram Orbanam».

«Niama nijakich sumnievaŭ, što vienhierska-amierykanskija adnosiny pieražyvajuć załaty viek», — napisaŭ jon.

Paźniej na sumiesnaj pres-kanfierencyi z Orbanam Vens zajaviŭ, što padrychtoŭka da niadzielnaha hałasavańnia stała «najhoršym prykładam zamiežnaha ŭmiašańnia ŭ vybary», i jon prybyŭ u Budapiešt, kab pasłać sihnał Brusielu.

«Ja sapraŭdy chacieŭ pasłać sihnał usim, asabliva biurakratam u Brusieli, jakija zrabili ŭsio, što mahli, kab utrymać narod Vienhryi ŭ padparadkavańni, tamu što im nie padabajecca lidar, jaki sapraŭdy staŭ na abaronu naroda Vienhryi», — skazaŭ jon.

Jon vykazaŭ i poŭnuju padtrymku enierhietyčnaj palitycy Viktara Orbana, jakaja zaviazanaja na atrymańni tannych enierhanośbitaŭ ad pucinskaj Rasii i supracivie ahulnajeŭrapiejskaj palitycy, skiravanaj na vyzvaleńnie ad rasijskaj zaležnaści.

«Ja dumaju, Viktar Orban byŭ samym upłyvovym lidaram u Jeŭropie ŭ pytańni enierhietyčnaj biaśpieki i niezaležnaści. Zabaŭna nazirać za hetym: premjer-ministry i lidary niekatorych zachodniejeŭrapiejskich stalic havorać pra enierhietyčny kryzis, choć, ščyra kažučy, im varta było b prytrymlivacca palityki Viktara Orbana ŭ Vienhryi. Kali b jany tak zrabili, enierhietyčny kryzis, jaki jany pieražyvajuć ciapier, byŭ by značna mienš surjoznym, tamu što ciapier u Vienhryi, choć ceny na enierhanośbity i vyraśli, jany značna nižejšyja, čym amal u luboj inšaj krainie Jeŭropy.

I heta dziakujučy lidarstvu čałavieka, jaki staić pobač sa mnoj. I ja dumaju, što hetaje lidarstva moža pasłužyć prykładam dla ŭsiaho kantynienta. My chočam, kab Jeŭropa była paśpiachovaj. My chočam, kab jeŭrapiejskija siemji mahli dazvolić sabie aciaplać svaje damy i budavać cudoŭnyja rečy. My chočam, kab Jeŭropa była enierhietyčna niezaležnaj i navat enierhietyčna daminantnaj, ale jana nie budzie enierhietyčna biaśpiečnaj, kali praciahnie prytrymlivacca pravalnaj palityki minułaha. I tamu ja dumaju, što Viktar byŭ vydatnym prykładam u prakładvańni kursu, jaki moža pryvieści da lepšaj, bolš kvitniejučaj i bolš enierhietyčna biaśpiečnaj Jeŭropy», — skazaŭ vice-prezident ZŠA.

Čakajecca, što ŭ aŭtorak dniom Vens vystupić na pieradvybarčym mitynhu razam z Orbanam na futbolnym stadyjonie ŭ Budapiešcie.

U vienhierskaj stalicy byli ŭzmocnienyja miery biaśpieki: uzdoŭž daroh uviedzienyja abmiežavańni na parkoŭku i prybranyja śmietnicy, na vulicach šmat palicyi, a kala rezidencyi Orbana vystaŭlena ačapleńnie.

Most da rezidencyi Orbana, raźmieščanaj u byłym Karmielickim manastyry z vyhladam na Dunaj, upryhožany amierykanskimi i vienhierskimi ściahami.

• 2
• 4
• 4
• 16
• 0
• 0
• 9
• 0