Orban u razmovie z Pucinym paraŭnaŭ siabie z myšaniom, što dapamahaje Pucinu, lvu
Bloomberg źliła rasšyfroŭku telefonnaj razmovy pamiž premjer-ministram Vienhryi Viktaram Orbanam i prezidentam Rasii Uładzimiram Pucinym. Vyhladaje, nichto tak siabie jašče nie prynižaŭ.
Premjer-ministr Vienhryi Viktar Orban skazaŭ Uładzimiru Pucinu padčas telefonnaj razmovy ŭ kastryčniku 2025 hoda, što jon hatovy pajści na mnohaje, kab dapamahčy rasijskamu prezidentu, u tym liku dapamahčy va ŭrehulavańni vajny va Ukrainie šlacham praviadzieńnia samitu ŭ Budapiešcie.
«Učora naša družba ŭźniałasia na taki vysoki ŭzrovień, što ja mahu dapamahčy lubym sposabam», — skazaŭ Orban, zhodna z transkryptam razmovy vienhierskaha ŭrada, jaki byŭ vyvučany Bloomberg.
«U lubym pytańni, dzie ja mahu być karysnym, ja da vašych pasłuh».
Viktar Orban nahadaŭ rasijskamu prezidentu papularnuju, pavodle jaho słoŭ, vienhierskuju bajku, u jakoj myšania vyzvalaje lva, jaki trapiŭ u sieci, tamu što leŭ raniej paškadavaŭ žyćcio myšy. Pucin na heta zaśmiajaŭsia.
Bolšuju častku razmovy abodva palityki pryśviacili vykazvańniu ŭdziačnaści adzin adnamu, a taksama prezidentu ZŠA Donaldu Trampu.
Orban taksama skazaŭ Pucinu, što, na jaho dumku, ich siabroŭstva stała tolki macniejšym z momantu ich pieršaj sustrečy ŭ Sankt-Pieciarburhu ŭ 2009 hodzie. «Čym bolš u nas siabroŭ, tym bolš u nas mahčymaściaŭ supraćstajać našym supiernikam», — skazaŭ Orban.
Jon dadaŭ, što škaduje ab tym, što jany nie mohuć rehularna i asabista sustrakacca z Pucinym, jak heta było da pandemii karanavirusa, a prezident Rasii pachvaliŭ «suvierennuju i hnutkuju» pazicyju Vienhryi ŭ adnosinach da vajny va Ukrainie.
«Heta niespaścižna, čamu takaja zbałansavanaja, umieranaja pazicyja vyklikaje tolki piarečańni», — skazaŭ Pucin.
Pucin i Orban abmianialisia žartami pra sport. «Ja rablu praktykavańni, a jašče katajusia na łyžach. Ja viedaju, što vy hulajecie ŭ futboł», — zaŭvažyŭ Uładzimir Pucin.
«Ja sprabuju», — adkazaŭ vienhierski lidar. Abodva zaśmiajalisia.
Ciapier čytajuć
26‑hadovaha supracoŭnika elitnaha padraździaleńnia mytni asudzili na 16 hadoŭ pa nabory palitartykułaŭ. Siarod ich i «zdrada dziaržavie»6
Kamientary
Mužiestviennyj
Orban