Hurtu «Drazdy», jaki źbiraŭsia kidać scenu praz zabaronu vystupać u bujnych haradach, dazvolili abłasnyja centry. Ale nie Minsk
U śpisie hastrolnych haradoŭ hurta «Drazdy» źjavilisia piać abłasnych centraŭ, choć raniej, jak paviedamlaŭ sam kalektyŭ, im nie dazvalali tam vystupać. U intervju Sputnik salist hurta Vital Karpanaŭ raspavioŭ, što źmianiłasia ŭ žyćci kalektyvu.
U kancy viasny Karpanaŭ zrabiŭ hučnuju zajavu — «Drazdy» spyniać vystupleńni. Takoje rašeńnie salist hurta patłumačyŭ tym, što im nie dajuć mahčymaści ładzić kancerty ŭ abłasnych centrach, u tym liku ŭ biełaruskaj stalicy.
Pavodle słoŭ Karpanava, jaho zajava nie zastałasia niezaŭvažanaj z boku čynoŭnikaŭ.
«U toj ža dzień nam patelefanavali važnyja ludzi i skazali: «Chłopcy, jak vam nielha hrać? Čamu? Chto skazaŭ, što vam nielha hrać? Chto vam nie daje hastrolku?» I nam u toj ža dzień paśla vychadu intervju dali dabro na toje, što my ciapier budziem hrać i ŭ abłasnych centrach», — zajaviŭ Karpanaŭ.
Muzyka dadaŭ, što ŭ hastrolnym śpisie jość i Babrujsk, jaki raniej taksama byŭ pad zabaronaj dla ich kalektyvu.
Karpanaŭ padziakavaŭ usim, chto «pryniaŭ takoje pravilnaje, u pieršuju čarhu, dla dziaržavy rašeńnie».
Adnak jon kanstatavaŭ, što na vystupleńni ŭ Minsku hurt atrymaŭ admovu.
«Voś tut sumnaja navina. My pa ŭsich haradach padali dakumienty. Hety praces niaprosty — heta hastrolnaje paśviedčańnie, heta śpis artystaŭ, piesień — usio vyviarajecca. I padali my dakumienty na Pałac sportu, bo nas čakaje i horad Minsk, i našy słuchačy ŭ Minsku, i ŭ Minskaj vobłaści. Bolš za toje, skažu, što my padali zajaŭki na dźvie ci na try daty. I my atrymali admovu», — padkreśliŭ Karpanaŭ.
U kancy maja biełaruski hurt «Drazdy» abviaściŭ pra raźvitalnaje turne, jakoje pavinna było stać zaviaršeńniem 20-hadovaj tvorčaj dziejnaści kalektyvu.
«My razumiejem, što tak dalej nielha. My stamilisia, viadoma. Stamiŭsia, chutčej za ŭsio, naš słuchač, tamu što niekatoryja ludzi prychodziać pa 15 razoŭ na naš kancert. Ale my nie majem mahčymaści hrać u abłasnych haradach: u nas jość ciažkaści ŭ parazumieńni z-za hipieraktyŭnych błohieraŭ, jakija na siońnia — užo nie budziem chavać — navat admatali termin», — zajaviŭ Vital Karpanaŭ.
Proźviščy błohieraŭ nie nazyvalisia, ale možna mierkavać, što hutarka išła pra Volhu Bondaravu i jaje paplečnikaŭ. Niahledziačy na padkreślena praŭładnuju pazicyju hurta i asabista Vitala Karpanava, u tym liku i ŭ 2020 hodzie, «Drazdy» padviarhalisia atakam z boku Bondaravaj, pryčynaj čaho stała vykarystańnie ŭ ich tvorčaści biełaruskaj movy.
Ciapier čytajuć
Na Minskim paŭmarafonie pamior 50‑hadovy biahun. Voś što viadoma pra Alaksieja Dašynieviča3
Kamientary