Čakajecca novy raŭnd pieramovaŭ miž Biełaruśsiu i ZŠA — litoŭski ŚMI

Litoŭskamu hramadskamu telebačańniu LRT stali viadomyja niekatoryja detali sustrečy Alaksandra Łukašenki sa śpiecpasłańnikam Trampa Kitam Kiełaham, a taksama płany pravieści jašče adzin raŭnd pieramovaŭ.

Pavodle infarmacyi krynic vydańnia, ZŠA nie dali biełaruskamu boku nijakich abiacańniaŭ u abmien na vyzvaleńnie palitźniavolenych.

Pieramovy pamiž Biełaruśsiu i ZŠA stali temaj abmierkavańnia ŭ Sojmie Litvy. Inicyjavaŭ abmierkavańnie Žyhimantas Pavilonis, člen kamiteta pa zamiežnych spravach Sojma. Na sustrečy vystupili vyzvalenyja palitviaźni Siarhiej Cichanoŭski, Natalla Dulina i Ihar Karniej, a taksama šerah biełaruskich palitykaŭ.

«My pavinny viedać, ci nie viaducca pieramovy za našaj śpinaj i ci nie stali my sami pradmietam torhu?» — zajaviŭ Pavilonis.

Staršynia kamiteta Sojma, były pasoł Litvy ŭ Rasii Remihijus Matuzas paćvierdziŭ, što amierykancy sapraŭdy razmaŭlali pa pytańni Biełarusi ź ministram zamiežnych spravaŭ Litvy Kiastucisam Budrysam, zandujučy hlebu, jak by Litva pastaviłasia da pytańnia admieny sankcyj suprać Biełarusi. Pavodle jaho słoŭ, Litvie nie vyłučalisia nijakija patrabavańni.

Sam Budrys ani paćvierdziŭ, ani abvierh hetuju infarmacyju.

«Vyzvaleńnie palitźniavolenych — tonkaja i składanaja apieracyja, ale Litvie nie vystaŭlali nijakich umoŭ», — zajaviŭ Remihijus Matuzas.

LRT stała viadoma, što čakajecca novy raŭnd pieramovaŭ pamiž ZŠA i Biełaruśsiu.

U pačatku hetaha hoda, pavodle infarmacyi LRT, ambasadar ZŠA ŭ Litvie Kara Makdonald na sustrečy z vysokapastaŭlenym litoŭskim palitykam cikaviłasia, jak by Vilnia pastaviłasia da źmiakčeńnia sankcyj suprać «Biełaruśkalija» i atrymała admoŭny adkaz.

Jašče adna krynica zajaviła, što hetaje pytańnie nie ŭzdymałasia, i skazała, što Litvie nieviadoma pra źmiest pieramovaŭ pamiž Minskam i Vašynhtonam.

«U hetym i prablema — my ničoha nie viedajem. Ja ŭpeŭnieny, što havorka idzie pra kalijnyja ŭhnajeńni, ale nam sa ZŠA nie pastupała nijakich zvarotaŭ abo prośbaŭ», — skazała krynica.

Adnak vyzvaleńnie Cichanoŭskaha adnaznačna nie źviazanaje sa źniaćciom nijakich sankcyj.

Pa słovach Matuzasa, «na hetym etapie adkaz Litvy byŭ by «nie». Litva nie pasłuchałasia b» nijakich padobnych prapanoŭ.

«My nie pavinny davać padstaŭ režymu handlavać ludźmi», — adznačyŭ u kamientary LRT Budrys.

Samyja balučyja dla Alaksandra Łukašenki sankcyi — heta zabarona na tranzit kalijnych uhnajeńniaŭ. Na hetym Minsk hublaje kala miljarda dalaraŭ štohod. I hety tranzit prachodziŭ akurat praz port Kłajpiedy ŭ Litvie. Inšy balučy punkt — zabarona na ekspart biełaruskich naftapraduktaŭ. Hetyja sankcyi byli ŭviedzienyja Jeŭrasajuzam, i mienavita jany patencyjna najbolš zdolnyja matyvavać Minsk źmianić svaju palityku.

Pieršyja raŭndy pieramovaŭ miž Alaksandram Łukašenkam i ZŠA byli niepubličnymi. Pa infarmacyi «Našaj Nivy», z amierykanskaha boku ich, siarod inšych, viali Džon Koŭł, namieśnik śpiecpradstaŭnika Donalda Trampa hienierała Kita Kiełaha, i Krys Śmit, vysakapastaŭleny dypłamat Dziaržaŭnaha departamienta.

20 červienia adbyŭsia publičny vizit Kita Kiełaha ŭ Minsk. U adkaz na nastupny dzień na zahad Alaksandra Łukašenki byli vyzvalenyja 14 palitźniavolenych. Pa słovach pres-sakratara Łukašenki Natalli Ejsmant, baki abmiarkoŭvali Ukrainu, Blizki Uschod, uzajemadziejańnie z Rasijaj i Kitajem, sankcyi ZŠA i ES u dačynieńni da Biełarusi. Kiełah zajaviŭ, što baki abmiarkoŭvali vajnu pamiž Rasijaj i Ukrainaj, a taksama dvuchbakovyja adnosiny pamiž ZŠA i Biełaruśsiu.

• 3
• 0
• 0
• 2
• 0
• 0
• 2
• 0