«Hojda» za 700 rubloŭ. «Kašalok Łukašenki» druhi hod zapar pryvozić u Biełaruś Z-artystaŭ

2024 hod: 25 tysiač čałaviek, Samojłaŭ i Hałanin

Fiestyval «Soncastajańnie» ŭ Pružanach pravodzicca druhi hod. Va Ukrainie praciahvajecca vajna i abstreły, a ŭ hety čas u Bresckuju vobłaść arhanizatary pryvoziać artystaŭ, jakija simpatyzujuć rasijskamu ŭvarvańniu.

Letaś na feście vystupaŭ Vadzim Samojłaŭ (adzin z bratoŭ Samojłavych — zasnavalnikaŭ hurta «Ahata Kryści»). Artyst uniesieny ŭ bazu «Miratvorac», z 2015 hoda vystupaje na akupavanych Rasijaj terytoryjach Ukrainy, paśla 2022 hoda vystupaŭ pierad mabilizavanymi.

24 lutaha 2022 hoda jon napisaŭ u svaim błohu ŭ VK:

«Ja padtrymlivaju vajennuju apieracyju. Jaje daŭno para było pačać. Vielmi spadziajusia, što jość siły na Ukrainie, jość ludzi, jakija nie chočuć vajny, i razumiejuć, što im ciapier dapamahajuć pazbavicca ad nacysckaha režymu, jaki zachapiŭ ich krainu».

Letaś adnym z chedłajnieraŭ byŭ taksama hurt «Sieŕha», jaki raniej vystupaŭ na kancertach «Za Rasiju». Jaje lidar Siarhiej Hałanin udzielničaŭ u konkursie na lepšuju pieśniu «pra SVA», dzie jon praśpiavaŭ ad asoby rasijskaha vajskoŭca nastupnyja radki: «Napiši pro lubov́, nie piši pro piečal, napiši, čto ja vział Mariupol».

2025 hod: admienienyja ŭ Jeŭropie artysty i darahija kvitki

U 2025 hodzie ŭ łajnapie hałoŭnaj sceny fiestyvalu hrupy «Čajf», «Aryja», «Surhanava i arkiestr», «Krematoryj», «Alisa», «Haršanioŭ», Xolidayboy, Viačasłaŭ Butusaŭ, a taksama eks-hitaryst hrupy Scorpions i mietał-hurt Nazareth z Šatłandyi.

Lidar hurta «Čajf» Uładzimir Šachryn źbiraŭ humanitarnuju dapamohu dla rasijskich sałdat. Kalektyŭ razam ź inšymi pravajennymi artystami źniaŭsia ŭ «antyemihranckim» klipie «Ja zastajusia». Akramia taho, muzyki adpravili na front hitaru z aŭtohrafami.

Śviatłana Surhanava jeździła z kancertami ŭ akupavany Krym, zaniesienaja ŭ bazu «Miratvorac», joj zabaronieny ŭjezd va Ukrainu. U krasaviku 2023 hurt vystupiŭ pierad dobraachvotnikami na maskoŭskim punkcie adboru kantraktnikaŭ.

Kanstancin Kinčaŭ z «Alisy» adkryta vystupaje ŭ padtrymku vajny suprać Ukrainy. U 2024-m hodzie hurt vypuściŭ albom z nazvaj «Hojda». Ci buduć hučać na fiestyvali pieśni z novaha alboma, nieviadoma.

«Pa sutnaści, heta hramadzianskaja vajna, dzie adnyja całkam lahli za piačeńki i trusiki pad anhłasaksonskuju razvodku, inšyja ž adstojvajuć svaju tysiačahadovuju historyju i svoj suvierenny šlach pad pokryvam Praśviatoj Baharodzicy. Ja ŭsim sercam z našaj armijaj, malusia za Chrystova vojska! Z nami Boh! A kali z nami Boh, chto suprać nas? Tak, i jašče… Ja — ruski!», — havaryŭ Kinčaŭ.

Viačasłaŭ Butusaŭ, zasnavalnik «Naŭtyłus Pampilius«, skazaŭ u intervju, što «kanfliktu va Ukrainie niemahčyma było paźbiehnuć», i što tam «usio podła, padstupna, vierałomna rychtavałasia». Kancert Butusava ŭ Chielsinki, zapłanavany na vosień 2022 hoda, byŭ admienieny z-za palityčnych vykazvańniaŭ artysta i jaho vystupleńniaŭ u anieksavanym Krymie.

U 2024 hoda kiraŭnik «Ruskaj abščyny Staŭrapolla» Viktar Raźničenka apublikavaŭ u sacsietkach videazvarot Xolidayboy:

«Chaču zajavić, što ja źjaŭlajusia patryjotam. Ja ŭsioj dušoj i sercam lublu svaju krainu i, biezumoŭna, padtrymlivaju absalutna ŭsie dziejańni našaha hałoŭnakamandujučaha, prezidenta Uładzimira Uładzimiraviča Pucina i śpiecyjalnuju vajennuju apieracyju. Usich lublu i čakaju na kancertach».

Jość siarod udzielnikaŭ fiestyvalu i muzyki, jakija publična nie ahučvali svaju pazicyju pa vajnie va Ukrainie, adnak praciahvajuć davać kancerty ŭ Rasii. Heta, naprykład, prajekt «Haršanioŭ», stvorany Alaksiejem Haršaniovym paśla raspadu hurta «Kukryniksy». Haršanioŭ paśla pačatku poŭnamaštabnaha rasijskaha ŭvarvańnia abychodzić pytańni pra palityku i vajnu i havoryć, što ŭ jahonaj tvorčaści nikoli nie było sacyjalnych tem. Razam z tym u 2015 hodzie padčas vystupleńnia na fiestyvali «Našeście», jaki spansujecca rasijskim Minabarony, «pryśviaciŭ pieśniu Danbasu».

Padobnaja situacyja i z hurtom «Krematoryj»: lidar hurta zaklikaŭ muzykaŭ «nie źmiešvać muzyku i palityku», ale adnačasova hurt uziaŭ udzieł u kancercie paśla motamaršu «Darohi Pieramohi — svaich nie kidajem!»

Kvitok

Kvitki na «Soncastajańnie» kaštujuć ad 154 da 700 rubloŭ, u zaležnaści ad kolkaści dzion i dastupnych zon fiestyvalu. Praŭładnyja błohiery razyhryvali kvitki na fest i źbirali pad pastami sotni kamientaŭ.

U sacsietkach ža samoha fiestyvalu ludzi aburylisia canoj uvachodu na mierapryjemstva.

• «Pryjedzie Ramštajn»;
• «Ažyŭ Haršok, adkul takija ceny»?;
• «Dobra vam pahulać, arhanizatary»;
• «Sam Kurt Kabejn paŭstaŭ! U čarhu za vašymi kvitkami z vašymi koštami. A ja prosta ach**ła. Z 30 r u 190 r. Žadaju karjernaha rostu».

Arhanizatary: «kašalok» Łukašenki i eks-milicyjanier

U arhanizatarach festu paznačanaja Bresckaja fiłarmonija. Adnak, jak vyśvietliła vydańnie «Biuro», nasamreč mierapryjemstva arhanizuje padsankcyjny biznesmien Alaksandr Zajcaŭ, eks-pamočnik Alaksandra Łukašenki. U 2024 hodzie jon stvaryŭ dla hetaha jurydyčnuju asobu z nazvaj «Soncastajańnie», siarod vidaŭ dziejnaści jakoj značycca arhanizacyja kulturnych mierapryjemstvaŭ. Łahatyp kampanii supadaje z łahatypam fiestyvalu.

Zajcaŭ — saŭładalnik kampanii «Bremina hrup», «Trendchoł», jakaja pastaŭlaje ŭ Biełaruś i Rasiju tavary luksavych brendaŭ «paralelnym impartam», a taksama šmatprofilnaj kampanii Sohra Group. Akramia taho, jon ža źjaŭlajecca ŭładalnikam futbolnaha kłuba «Ruch», a raniej — «Dynama-Brest».

«Bremina hrup» zasnavali try biełaruskija biznesmieny: Alaksandr Zajcaŭ, Alaksiej Aleksin i Mikałaj Varabiej, ich nazyvajuć «kašalkami» Łukašenki. Prajekt kampanii, «Bremina-Orša» — svabodnuju ekanamičnuju zonu — nazyvajuć «Aršanskim afšoram», bo pa ŭkazie Łukašenki jana vałodaje vialikaj kolkaściu lhot. Žurnalisty-śledčyja fiksavali, što praz hety łahistyčny chab u pasiołku Bałbasava prachodziać partyi kantrabandy ź Jeŭropy ŭ Rasiju.

Adzin z suarhanizataraŭ fiestyvalu, Dźmitryj Rakusaŭ — kreatyŭny dyrektar «Dynama-Brest» i były siłavik. Pavodle infarmacyi, jakuju «Miedyjazonie» padała inicyjatyva Belpol, Rakusaŭ z 2004 da 2013 słužyŭ u niekalkich milicejskich padraździaleńniach, paśla čaho pracavaŭ u chakiejnym kłubie «Bastyjon».

• 0
• 2
• 0
• 3
• 1
• 0
• 6
• 0