Siońnia ŭ Amanie adbuducca pieramovy ZŠA i Irana. Ci dapamohuć jany praduchilić vajnu?

Iran zajaŭlaje, što hatovy havaryć tolki pra svaju jadziernuju prahramu, ZŠA ž majuć namier patrabavać ad jaho sastupak pa niekalkich napramkach, uklučajučy rakietny arsienał i padtrymku iranskich proksi ŭ rehijonie.

«Niepramyja pieramovy pamiž Iranam i Złučanymi Štatami projduć u piatnicu ŭ Maskacie [stalicy Amana]. Ich tematyka budzie abmiežavanaja jadziernym pytańniem i admienaj sankcyj u dačynieńni da Irana», — zajaviła ŭ sieradu iranskaje infarmacyjnaje ahienctva «Taśnim».

Iranskuju delehacyju, jak paviedamiła ahienctva, uznačalić ministr zamiežnych spraŭ Abas Arahčy. Amierykanski bok buduć pradstaŭlać śpiecpasłańnik prezidenta Trampa Styŭ Uitkaf i ziać Trampa Džared Kušnier.

Dziaržsakratar ZŠA Marka Rubia ŭ toj ža dzień, 4 lutaha skazaŭ toje, pra što ŭžo nieadnarazova havaryli pradstaŭniki ZŠA: paradak dnia pieramoŭ, ź ich punktu hledžańnia, pavinien być značna šyrejšy.

«Dla taho, kab pieramovy pryviali da čaho-niebudź kankretnaha, jany pavinny achoplivać peŭnyja rečy, uklučajučy dalokaść ich [Irana] balistyčnych rakiet, uklučajučy padtrymku terarystyčnych arhanizacyj pa ŭsim rehijonie, uklučajučy ich jadziernuju prahramu i ŭklučajučy ich abychodžańnie z ułasnym narodam», — cytuje Rubia ahienctva AFP.

Donald Tramp tym časam praciahvaje pahražać Iranu ŭdarami. ZŠA pierakinuli ŭ rajon Piersidskaha zaliva avijanosnuju hrupu ź dziasiatkami bajavych samalotaŭ i rakiet, i presa ŭžo niekalki dzion pieradaje «ŭciečki» ź Biełaha doma pra toje, što Tramp vyvučaje varyjanty ŭdaraŭ pa Iranie.

«Ja b skazaŭ, što jamu [viarchoŭnamu lidaru Irana ajatale Ali Chamieniei] treba vielmi niepakoicca», — adkazaŭ Tramp u sieradu na pytańnie telekampanii NBC News.

Zatym Tramp zajaviŭ, što Iran paśla 12‑dzionnaj vajny minułym letam, kali Izrail i ZŠA nanieśli ŭdary pa iranskich vajennych i jadziernych abjektach, zadumaŭ pabudavać niejki novy jadzierny abjekt.

«Jany dumali nad tym, kab pačać budavać novy abjekt u inšaj častcy krainy. My daviedalisia pra heta, i ja skazaŭ: kali vy heta zrobicie, my zrobim vam vielmi drenna», — paviedamiŭ Tramp.

Iranskija ŭłady i vajennyja na pahrozy Trampa adkazvajuć, što naniasuć udary pa amierykanskich bazach u rehijonie (ich kala 20 u roznych krainach), a taksama pa krainach-sajuźnicach ZŠA.

«Tehieranskija prychilniki žorstkaj linii, blizkija da viarchoŭnaha lidara, zajaŭlajuć, što na pahrozy ZŠA vajennaj siłaj Iran pavinien adkazvać kontrpahrozami, a nie zaprašeńniami da pieramovaŭ. Pavysić vierahodnaść vajny im, mahčyma, udałosia», — paviedamlaje karespandent Piersidskaj słužby Bi-bi-si Kasra Nadžy.

Źbity dron i pahroza tankieru

Novaje supraćstajańnie amierykancaŭ ź irancami ŭžo vyliłasia ŭ dva incydenty.

U aŭtorak amierykanskija vajennyja zajavili, što źbili na Aravijskim mory iranski dron-raźviedčyk «Šachied-139», jaki, pa ich słovach, ahresiŭna zbližaŭsia z avijanoscam Abraham Lincoln.

Jak zajaviła Centralnaje kamandavańnie ZŠA, bieśpiłotnik byŭ źbity samalotam F-35.

Iranskaja dziaržaŭnaja presa zajaviła, što hety bieśpiłotnik ažyćciaŭlaŭ raźviedvalny palot i što suviaź ź im była stračana pa nieviadomych pryčynach.

U toj ža dzień Centralnaje kamandavańnie ZŠA zajaviła, što dva katary Korpusa vartavych isłamskaj revalucyi pry padtrymcy šmatmetavaha bieśpiłotnika sprabavali spynić i zachapić u Armuzskim pralivie tankier pad fłaham ZŠA.

Brytanskaja kampanija Vanguard, jakaja zajmajecca achovaj sudnachodstva, udakładniła, što irancy, nabliziŭšysia da tankiera, zahadali spynić sudna i padrychtavacca da ich vysadki na bort, ale tankier zamiest hetaha dadaŭ chod i prosta praciahnuŭ šlach.

Vybar Amana i «čyrvonaja linija»

Pieršapačatkova pieramovy mierkavałasia pravieści ŭ Turcyi, ale Iran nastajaŭ, kab jany prajšli ŭ Amanie. Śpiecyjalisty pa rehijonie adznačajuć, što heta padkreślivaje niežadańnie Tehierana abmiarkoŭvać što-niebudź, akramia jadziernaj prahramy.

Jak piša ahienctva Reuters, spasyłajučysia na ananimnuju aficyjnuju asobu ź blizkaŭschodniaha rehijonu, Iran choča, kab hetyja pieramovy vyhladali jak praciah irana-amierykanskich pieramoŭ ab jadziernaj prahramie, jakija pačynalisia minułaj viasnoj mienavita ŭ Amanie.

Karespandent Piersidskaj słužby Bi-bi-si Kasra Nadžy dadaje, što Iran ličyć Aman bolš družalubnaj krainaj, čym Turcyju.

Tyja pieramovy byli pierapynienyja, i ŭ červieni ZŠA, uklučyŭšysia ŭ pavietranuju kampaniju Izraila suprać Irana, nanieśli ŭdary pa iranskich jadziernych abjektach. Izrailskaja ž avijacyja źniščyła bolšuju častku rakietnaha arsienała Irana.

Iran zaŭsiody śćviardžaŭ, što jaho jadziernaja prahrama nosić vyklučna mirny charaktar, a paśla tych udaraŭ zajaviŭ, što i jana całkam spyniena.

Adnak, pavodle acenki MAHATE, Iran nazapasiŭ nie mienš za 408 kh vysokaŭzbahačanaha ŭranu, i ZŠA chočuć, kab jon addaŭ ich na zachoŭvańnie ŭ inšuju krainu.

Što tyčycca rakiet, to Iran zajaŭlaŭ, što paśla červieńskaj vajny adnaviŭ ich zapas.

Tehieran zajaŭlaŭ i praciahvaje zajaŭlać, što nie maje namieru zhadžacca ni na jakija abmiežavańni ŭ dačynieńni da svaich balistyčnych rakiet i što heta dla jaho — «čyrvonaja linija». Na dumku iranskaha kiraŭnictva, vałodać rakietami, zdolnymi dalacieć da Izraila, jamu dazvalaje jaho zakonnaje prava na samaabaronu.

Nie žadaje Tehieran abmiarkoŭvać i padtrymku im sajuznych uzbrojenych hrupovak i partyj u rehijonie.

Tamu jakich vynikaŭ baki zmohuć dasiahnuć na sustrečy 6 lutaha ŭ Maskacie, zusim nie jasna.

• 0
• 0
• 0
• 0
• 0
• 0
• 0
• 0