Čas prajezdu biełaruska-litoŭskaj miažy aŭtobusami pavialičyŭsia da 10-12 hadzin
U punkcie propusku «Kamienny Łoh» («Miedniki») istotna pavialičyŭsia čas pierasiačeńnia biełaruska-litoŭskaj miažy pasažyrskimi aŭtobusami. Karystalniki tematyčnych telehram-čataŭ paviedamlajuć, što čakać prajezdu davodzicca až da 12 hadzin, što nietypova dla hetaha pamiežnaha pierachodu, piša «Lusterka».
Jak pišuć u telehram-čatach pasažyry aŭtobusaŭ, jakija znachodziacca na biełaruska-litoŭskaj miažy, čas prajezdu ŭ apošnija sutki istotna vyras.
— Čakać treba blizu 10-12 hadzin na samoj miažy, — śćviardžaje adzin ź ich.
— Vyjechali ź Minska rejsavym aŭtobusam «Ekałajns» a 4-j hadzinie ranicy. Ciapier 10:48, i my ŭsio jašče nie zajechali na biełaruski punkt propusku, — piša inšy.
U čatach taksama pišuć, što praz zatrymki niekatoryja pasažyry spaźniajucca na zapłanavanyja avijarejsy ź Vilni.
— Tyja, chto spaźniajucca na samaloty, sprabavali padsieści ŭ aŭtamabili, ale ich nichto nie ŭziaŭ, — śćviardžaje adzin z karystalnikaŭ. — U aŭtobusy biaruć, ale heta ŭsio roŭna vielmi doŭha, i sensu ŭ hetym niama.
Pasažyry ŭpeŭnienyja, što doŭhaje čakańnie prajezdu źviazana z pavolnaj pracaj słužbaŭ Litvy.
— Čarha stvoranaja štučna kiraŭnikami litoŭskaha punkta propusku, — upeŭnienaja adna ź biełarusak. — Nie mahu zrazumieć, jak doŭha jany buduć prytrymlivacca palityki «italjanskaha strajku». Tamu zakładvajcie čas pa piesimistyčnym scenary.
Pasažyr aŭtobusa, jaki vyjechaŭ ź Minska ŭ čaćvier a 21.45 i pierajšoŭ miažu a 10-j ranicy piatnicy, kaža ab pahłyblenych pravierkach pamiežnikaŭ i mytnikaŭ.
— Litoŭskija pamiežniki doŭha praviarali tych, u kaho byli polskija vizy — im zadavali šmat pytańniaŭ, — paviedamlaje mužčyna. — Mytniki taksama dahladali daŭžej, čym zvyčajna. Ale prysmaki nie vykidali, tolki ałkahol i cyharety.
«Lusterka» paprasiła prakamientavać situacyju Słužbu achovy dziaržaŭnaj miažy pry Ministerstvie ŭnutranych spraŭ Litvy. Tam paćvierdzili pavieličeńnie času, jaki patrabujecca dla prajezdu aŭtobusaŭ u hetym punkcie propusku (adnym z dvuch, jakija praciahvajuć pracu, na biełaruska-litoŭskaj miažy).
— Apošnim časam čerhi na kantrolna-prapusknym punkcie «Miedniki» pavialičylisia ŭ suviazi sa źmienaj patoku padarožnikaŭ, — paviedamiŭ daradca adździeła kamunikacyj Andrus Jarockas. — U letni siezon kolkaść asob, jakija pierasiakajuć dziaržaŭnuju miažu, značna pavialičyłasia. Akramia taho, adznačajecca značnaje pavieličeńnie kolkaści dvuchpaviarchovych aŭtobusaŭ. Hetyja abstaviny pryvodziać da pavieličeńnia času nadhladu transpartu i pasažyraŭ.
Adznačym, što, pavodle infarmacyi Dziaržaŭnaha pamiežnaha kamiteta Biełarusi, pavodle stanu na 12.00 piatnicy, u punkcie propusku «Kamienny Łoh» (heta značyć na biełaruskim baku miažy) čakali ŭsiaho čatyry pasažyrskija aŭtobusy.
Kamientary