«Na buterbrod biez prablem zarobiš». Sisadmin raspaviadaje pra 20 hadoŭ pracy na dziaržaŭnym pradpryjemstvie
Sisadmin z abłasnoha horada Biełarusi raspaviadaje, jak uładkavana IT u dziaržaŭnym siektary, jakija tam zarobki i što padšturchnuła jaho šukać pracu ŭ Minsku paśla dvuch dziesiacihodździaŭ stabilnaści, piša Devby.io.
«Zarobak byŭ 380 tysiač u 2003 hodzie»
Ja pryjšoŭ na svajo ciapierašniaje miesca pracy ŭ 2003 hodzie, — kaža Ihar. — Pieršapačatkova zamianiaŭ «dekretnicu». Tady va ŭstanovie było kala 10 kampjutaraŭ i adzin siervier. Vybar spynili na mnie, bo ja ŭžo mieŭ dośvied pracy z 1S — kampanija šukała śpiecyjalista, jaki moh by pracavać z hetym PZ.
Darečy, užo tady zarobki byli vielmi dobryja. Paśla pieršaha zarobku z žonkaj prosta nie viedali, kudy dzieć hrošy. Dla razumieńnia: heta byŭ 2003 hod, i paśla 68 tysiač zarobak vyras da 380 tysiač (prykładna $177 pa tahačasnym kursie). Navat pasłaŭ padalej padpracoŭki. U 2011 hodzie, kali ŭsie sprabavali ŭciačy ŭ Rasiju ad dalara pa 9 tysiač, kab mianie ŭtrymać, mianie pavysili da «viadučaha inžyniera-prahramista». Zarobak taksama staŭ maksimalnym dla dziaržaŭnaj struktury.
Ad pradpryjemstva ŭdałosia pabudavać kvateru. Zarobak u paraŭnańni z «siaredniaj tempieraturaj pa balnicy» — vielmi hodny. Pamiataju, dyrektar, prymajučy mianie na pracu, skazaŭ: «Na mašynu ty tut nie zarobiš, ale na buterbrod z dobraj kaŭbasoj — biez prablem».
Ź ciaham času źjavilisia i mašyna, i kvatera ŭ kredyt (vypłacili za 9 miesiacaŭ). Svaju staruju zachavali dla dački. Usio było dobra: siamja, hodnaja praca, pavaha i siabroŭstva ŭ kalektyvie, doški honaru i hramaty. Navošta tut mianiać pracu — usio kłasna. Techniku taksama nabyvali, ukaranialisia novyja technałohii. Niahledziačy na dziaržaŭnuju strukturu, my išli ŭ nahu z časam.
Nu i za šmat hadoŭ spracavalisia ŭ kalektyvie, siabrujem siemjami. Heta taksama adna z pryčyn, čamu ja tak doŭha pracuju na adnym miescy.
«Tata, ty siabie niedaaceńvaješ»
Dačka skončyła BDUIR — možna skazać, pajšła pa maich śladach. Uładkavałasia niadrenna, pracuje ŭ IT-kampanii. Naša chruščoŭka pieratvaryłasia ŭ kvateru ŭ «Minsk-Śviecie» — biez kredytaŭ, rasterminoŭki i daŭhoŭ. Liču, što heta niadrenny vynik dla siaredniaj biełaruskaj siamji.
U niejki momant dačka pa zarobku pierasiahnuła mocna i mamu, i tatu. A potym pierajechała ŭ Polšču. I mienavita jana padkazała, što ja siabie niedaaceńvaju. Tak ja vyrašyŭ upieršyniu za 20 hadoŭ vyjści na rynak pracy.
Ale ŭsio nie tak prosta. Sistemny administratar — nie takaja zapatrabavanaja prafiesija ŭ maim horadzie, a prahramist pa 1S ja nie vielmi mocny. Šukaŭ pracu ŭ asnoŭnym na rabota.by, na LinkedIn naohuł niama vakansij pa maim profili (prynamsi ŭ maim horadzie).
Raniej šmat było pracy na pradpryjemstvach, nie toje, što ciapier… Dy i nie chaču pracavać na zavodzie. Z Rasijaj taksama nie chaču mieć spraŭ.
Śpiecyjalistaŭ nie čapajuć, ale rabočych nakiroŭvajuć dapamahać ŽKH — dvary prybirać, abočyny haradskich daroh kasić, bierah raki čyścić ad raślinnaści, śmiećcia i inšaha. Mnie takoje vielmi nie padabajecca. Ujavicie, ludzi prychodziać, a zamiest svajoj pracy treba jechać u kałhas kamiani z pola źbirać. Jak vam takoje?
Mahčyma, pierajedziem u Minsk — tam i vakansij bolš, i daččynaja kvatera pustuje. Ale jość niuansy z pracaj dla žonki — jana načalnica adździeła, u stalicy joj budzie składaniej znajści pracu, adpaviednuju jaje kvalifikacyi.
Dyskryminacyi niama
Staŭleńnie kštałtu «IT — dla 25-hadovych», dumaju, bolš tyčycca bujnych praduktovych kampanij. Tam moładź — jak raschodny materyjał. A sisadminy ŭ starych paciortych džynsach — heta narmalna. Usio ž taki heta absłuhovy piersanał, pracu jakoha vidać tolki tady, kali niešta pałamałasia. Tady siadzić usia kantora i kryčyć, što ŭ ich terminovaja praca zryvajecca, a pakul usio pracuje — my biaździejničajem.
Za 20 hadoŭ pracy mnie daviałosia vielmi šmat samastojna vyvučyć i ŭkaraniać. Tamu ja viedaju: kali treba pahruzicca ŭ čystaje prahramavańnie, to ja b vielmi chutka vyras da patrebnaha ŭzroŭniu.
Ale pracadaŭcu patrebny vopytny prahramist tut i ciapier. A ja nie chaču nikoha padmanvać nakont svajho dośviedu.
Zatoje ŭ sisadminskaj spravie hladžu patrabavańni ŭ vakansijach — i razumieju: prosta ź mianie pisali. Tolki voś u nas u horadzie zarobak prapanujuć nizki.
Ale ja pracy nie bajusia, usio ž taki dzicia SSSR. I čužoje rabiŭ, i pa načach pracavaŭ. Tamu ŭpeŭnieny, što znojdu dobruju pasadu.
Kamientary