Niekalki hadoŭ biełarusy nabyvali dacki «Azempik» nielehalna — praź pierakupščykaŭ, jakija pryvozili preparat ź Jeŭropy za šalonyja hrošy. Ciapier jaho rasijski anałah možna lehalna nabyć u aptekach krainy — kali maješ recept.
Preparat «Azempik» pieršapačatkova byŭ stvorany dla lačeńnia dyjabietu 2 typu. Jon źmianšaje ŭzrovień cukru ŭ kryvi i rehuluje insulin. «Azempik» taksama imituje harmon pad nazvaj hlukahonapadobny pieptyd-1, jaki zatrymlivaje aparažnieńnie straŭnika, źnižaje apietyt i vyklikaje adčuvańnie sytaści. Mnohija pacyjenty, jakija prymali «Azempik» pry dyjabiecie, paviedamili ab značnaj stracie vahi.
Na fonie navin ab takim pryjemnym dla mnohich pabočnym efiekcie niekatoryja daktary pačali pryznačać preparat pacyjentam, jakija nie majuć dyjabietu, śpiecyjalna dla źnižeńnia vahi. Niekatoryja suśvietnyja zorki pryznavalisia ŭ tym, što chudnieli z dapamohaj «Azempika».
Nie dziva, što moda na takija leki dajšła i da Biełarusi.
Darečy, Rasija jašče ŭ 2023 hodzie dazvoliła svajoj farmaceŭtyčnaj kampanii vyrablać anałah «Azempiku» biez zhody dackaj Novo Nordisk, jakoj naležyć patent na leki. Rasijski preparat atrymaŭ nazvu «Siemavik».
U Biełarusi doŭhi čas nabyć «Azempik» ci «Siemavik» možna było vyklučna na čornym rynku. Zrabić heta było nie vielmi składana. Letaś žurnalistka «Našaj Nivy» sprabavała nabyć recepturny preparat praz telehram-kanały. Nivodzin z pradaŭcoŭ navat nie spytaŭ pra najaŭnaść recepta. Ceńnik za adzin špryc (1 milihram) vahaŭsia prykładna ad 457 da 668 biełaruskich rubloŭ.
Treba adznačyć, što biełaruskija znakamitaści ŭsio ž vybirali aryhinalny «Azempik», a nie rasijski anałah.
Byłaja televiadučaja, a ciapier trenierka pa fejs-fitnesie Lucyja Hieraščanka (šmat chto jaje pamiataje jak Lusiu Łuščyk) na svaim YouTube-kanale raspaviadała, što prymała «Azempik» paśla dekretu, bo nie mahła hladzieć na siabie ŭ lusterka, kali važyła 75 kiłahramaŭ.
Jana raspaviadała, jak šukała leki na čornym rynku. Pieršy pradaviec jaje padmanuŭ, i Lucyja zhubiła 150 dalaraŭ. U vyniku, jak kaža žančyna, «Azempik» na hod abyšoŭsia joj pa košcie «jak dobraja BMW».
Błohierka Hanna Bond navat zapisvała videa dla instahrama, jak robić ukoł «Azempiku». Jana śćviardžała, što nie maje mety schudnieć, a preparat joj paraiŭ endakrynołah, kab źnizić uzrovień cukru ŭ kryvi.
«Azempik» Hańnie ŭ Biełaruś pryvieźli siabry. Błohierka kaža, što za dva šprycy zapłaciła 1300 rubloŭ. Ale niadaŭna jana pryznałasia padpisčykam, što bolš nie karystajecca preparatam, bo inšy doktar admianiŭ jaho.
Skinuła kiłahramy z dapamohaj «Azempiku» i prapahandystka STB Kaciaryna Zabiańko. Jaje siabroŭka nielehalna pradavała preparat.
Ciapier, jak daviedałasia «Naša Niva», na biełaruskim čornym rynku lekaŭ dacki «Azempik» prapanoŭvajuć pa 300 dalaraŭ za špryc.
Dla paraŭnańnia: u susiedniaj Litvie «Azempik» kaštuje ŭ ekvivalencie kala 273 rubloŭ, u Polščy — kala 323 rubloŭ.
Ciapier u biełaruskich aptekach stali pradavać rasijski «Siemavik». Zhodna z danymi sajta tabletka.by, jon jość u 133 aptekach. Kaštuje preparat ad 253 da 265 rubloŭ.
Tym časam kampanija «Hierafarm», jakaja vyrablaje «Siemavik», chvalicca svaimi rekordnymi prodažami. Ciapier heta adzin z samych papularnych aptečnych preparataŭ u Rasii: tolki ŭ sakaviku aptečnyja sietki realizavali rasijski anałah «Aziempiku» na 16 miljonaŭ dalaraŭ. Heta ažno na 16,9% bolš, čym było ŭ lutym.
Ciapier čytajuć
Litva znoŭ začyniła miažu ź Biełaruśsiu — iznoŭ šary z kantrabandaj13
Kamientary
S poniedielnika načnu.