Daktary zajavili ab pieraacenienaści efiektyŭnaści papularnaha preparatu dla pachudzieńnia
Vyniki pieršaha doŭhaterminovaha daśledavańnia pakazali, što pryjom preparata «Azempik» dazvalaje źnizić vahu tolki na 10% i vyjści na płato. U toj ža čas u pacyjentaŭ nazirajucca inšyja stanoŭčyja źmieny.
U apošnija hady vialikuju papularnaść atrymaŭ preparat dla źnižeńnia vahi siemahłutyd, jaki pradajecca pad handlovymi nazvami Ozempic i Wegovy. Jon imituje harmon GLP-1, jaki źnižaje apietyt, vyklikajučy pačućcio sytaści.
Dackaj farmaceŭtyčnaj kampanijaj Novo Nordisk, jakaja źjaŭlajecca stvaralnikam preparatu, prafinansavała daśledavańnie Select, jakoje praanalizavała vyniki roznych daśledavańniaŭ, što pravodzilisia z kastryčnika 2018 hoda pa sakavik 2021 hoda.
U ich uziali ŭdzieł bolš za 17 600 darosłych z 41 krainy. Pacyjenty prymali siemahłutyd abo płaceba adzin raz na tydzień na praciahu ŭ siarednim troch hadoŭ i troch miesiacaŭ. Vyniki apublikavany ŭ časopisie Nature Medicine.
Aŭtary źviartajuć uvahu, što ŭ pacyjentaŭ, jakija atrymlivali siemahłutyd, strata vahi praciahvałasia bolš za 65 tydniaŭ i zachoŭvałasia da 4 hadoŭ pry štotydniovym pryjomie preparata. Na terminie 208 tydniaŭ siemahłutyd asacyjavaŭsia ź siarednim źnižeńniem vahi na 10,2%. Klinična značnaja strata vahi adbyłasia ŭ pradstaŭnikoŭ abodvuch pałoŭ, usich ras, pamieraŭ cieła i rehijonaŭ.
U kamientaryi vydańniu Dayly Mail, śpiecyjalisty zaŭvažajuć, što dla ludziej z vysokaj stupieńniu atłuścieńnia, takaja strata vahi moža być niedastatkovaj, kab abaranić ad prablem sa zdaroŭjem. Dla ich lepšymi sposabami rašeńnia prablemy lišniaj vahi mohuć być takija mietady lačeńnia, jak baryjatryčnaja chirurhija ŭ spałučeńni sa źmienaj dyjety i fizičnymi praktykavańniami.
U toj ža čas daśledavańnie pakazała, što ŭ ludziej, jakija prymali siemahłutyd, źniziłasia ryzyka sardečnych prystupaŭ i insultu amal na 20 pracentaŭ. Pry hetym, jak adznačajuć navukoŭcy, pieravahi ad pryjomu preparata nie zaležać ad stupieni straty vahi.
Aŭtary adznačajuć, što daśledavańnie mieła niekatoryja abmiežavańni. Naprykład, u jaho nie byli ŭklučany ludzi ź liškam tłušču ŭ arhaniźmie, ale sa zvyčajnym indeksam masy cieła.
Ciapier čytajuć
«A 4‑j hadzinie nočy my zrazumieli, što sierviery prosta vyčyščanyja». Jarasłaŭ Ivaniuk raskazaŭ padrabiaznaści pra ataku na anłajn-biblijateku «Kamunikat»99
Kamientary