Tałyšski daśledčyk Ihbał Abiłaŭ — stryječny brat viadomaha biełaruskaha komika Idraka Mirzalizade — abvinačvajecca pa palityčnych kryminalnych artykułach.
U Azierbajdžanie prakuror zapatrabavaŭ prysudzić tałyšskamu daśledčyku Ihbału Abiłavu 19 hadoŭ źniavoleńnia, paviedamlaje «Kaŭkazski vuzieł».
36-hadovy navukoviec z rańniaha dziacinstva žyŭ u Biełarusi. Ihbał Abiłaŭ skončyŭ fakultet mižnarodnych adnosin BDU, mahistraturu i aśpiranturu. Siem hadoŭ vykładaŭ u BDU i Biełaruskim instytucie pravaznaŭstva. Maje publikacyi ŭ halinie historyi i etnahrafii Paŭdniovaha Kaŭkaza, Turcyi i Irana.
Jon źjaŭlajecca hałoŭnym redaktaram «Vieśnika Tałyšskaj nacyjanalnaj akademii» — mižnarodnaha navukovaha časopisa, pryśviečanaha navukovamu vyvučeńniu narodnaści tałyšaŭ.
Taksama Abiłaŭ — stryječny brat viadomaha biełaruskaha komika Idraka Mirzalizade.
Abiłava aryštavali ŭ lipieni 2024 hoda. Abiłaŭ tady pryjechaŭ u Azierbajdžan na viasielle svajho kuziena. Paśla dopytu jaho adpuścili, ale ŭrešcie nie dazvolili sieści ŭ samalot, kali jon sprabavaŭ vylecieć z Baku ŭ Minsk.
Ihbała padazravali pa artykułach 274 (dziaržaŭnaja zdrada), 281.3 (publičnyja zakliki, nakiravanyja suprać dziaržavy, učynienyja pa zadańni zamiežnych arhanizacyj abo ich pradstaŭnikoŭ) i 283.1 (raspalvańnie nacyjanalnaj, rasavaj, sacyjalnaj abo relihijnaj nianaviści i varožaści) Kryminalnaha kodeksa Azierbajdžana.
Pravaabaroncy ličać abvinačvańnie ŭ jaho bok palityčnym. Sapraŭdnaja pryčyna jaho pieraśledu — daśledavańnie roznych nacyjanalnych mienšaściaŭ, uklučajučy tałyšaŭ Azierbajdžana.
Kamientary
Na našyja vočy Prydniestroŭje, hahaŭzy, Abchazija, Krym...
Azieram nia varta kryŭdzić tałyšoŭ i maskva idzie mima.
I ŭ nas taksama: to "paleskaja respublika", to "biełaruskija kazaki", to "vilenski kraj", to "siaredniaja litva", to choć jaki nievyrazny "litvinizm" zamucić.
Błahodaria etomu, biełaruskoje bolšinstvo v Biełarusi połučajet takije žie sroki, kak i Abiłov v Azierbajdžanie.