Bił Klintan, Majkł Džeksan i Mik Džahier. Kaho možna znajści ŭ novych dakumientach sa spravy Džefry Epštejna

Siarod hetych dakumientaŭ byli ŭ tym liku fatahrafii šerahu viadomych ludziej, uklučajučy byłoha prezidenta ZŠA Biła Klintana, eks-prynca Endru Mauntbietena-Vindzara, a taksama muzykaŭ Mika Džahiera i Majkła Džeksana.

Zhadka ci vyjava ŭ hetych dakumientach nie źjaŭlajecca dokazam supraćpraŭnych dziejańniaŭ. Mnohija z tych, čyje imiony fihuravali ŭ papiarednich publikacyjach, źviazanych z Epštejnam, admaŭlali svajo dačynieńnie da jakich-niebudź złačynstvaŭ.

Bił Klintan u basiejnie i džakuzi

Siarod apublikavanych vyjaŭ jość niekalki fotazdymkaŭ byłoha prezidenta ZŠA Biła Klintana. Na adnym zdymku jon płavaje ŭ basiejnie, na inšym — lažyć u džakuzi, zakinuŭšy ruki za hałavu.

Pavialičyć

Pavialičyć

Klintana fatahrafavali z Epštejnam niekalki razoŭ u 1990‑ia i pačatku 2000‑ch hadoŭ, jašče da pieršaha aryštu finansista. Nichto z tych, chto pieražyŭ hvałt z boku Epštejna, nie abvinavačvaŭ Klintana ŭ niepravamiernych dziejańniach, a jon sam nieadnarazova zajaŭlaŭ, što nie viedaŭ pra seksualnyja złačynstvy Epštejna.

Pradstaŭnik Klintana, kamientujučy publikacyju novych fatahrafij, padkreśliŭ, što jany byli zroblenyja nie adzin dziasiatak hadoŭ tamu.

«Jany mohuć publikavać kolki zaŭhodna razmytych zdymkaŭ dvaccacihadovaj daŭniny, ale heta nie pra Biła Klintana. Nikoli nie było i nikoli nie budzie», — zajaviŭ Anchiel Ureńja.

«Tut jość dva typy ludziej. Pieršaja hrupa — tyja, chto ničoha nie viedaŭ i spyniŭ znosiny z Epštejnam da taho, jak jaho złačynstvy stali viadomyja. Druhaja — tyja, chto praciahvaŭ stasunki ź im paśla hetaha. My naležym da pieršaj hrupy. Nijakija sproby z boku ludziej z druhoj hrupy hetaha nie źmieniać. Usie, asabliva MAGA, čakajuć adkazaŭ, a nie achviarnych kazłoŭ», — dadaŭ jon.

Pavialičyć

Znajomstva Trampa z 14‑hadovaj dziaŭčynkaj

U apublikavanaj častcy fajłaŭ zhadvajecca i ciapierašni prezident ZŠA Donald Tramp.

Pavodle sudovych dakumientaŭ, apublikavanych Miniustam ZŠA, Epštejn nibyta paznajomiŭ Trampa z 14‑hadovaj dziaŭčynkaj u jaho rezidencyi Mar-a-Łaha ŭ Fłarydzie. Padčas mierkavanaj sustrečy ŭ 1990‑ia hady Epštejn šturchnuŭ Trampa łokciem i «hulliva spytaŭ», pakazvajučy na dziaŭčynku: «Pryhožańkaja, praŭda?».

Jak śćviardžajecca ŭ pazovie, padadzienym u 2020 hodzie suprać Epštejna i jaho pamočnicy Hiślejn Makśvieł, Tramp u adkaz uśmichnuŭsia i kiŭnuŭ na znak zhody.

U dakumiencie havorycca, što «jany abodva chichiknuli», a dziaŭčynka adčuła siabie niekamfortna, «choć i była zanadta junaja, kab zrazumieć pryčynu». Paciarpiełaja śćviardžaje, što na praciahu mnohich hadoŭ padviarhałasia hruminhu i hvałtu z boku Epštejna. Abvinavačvańniaŭ suprać Trampa ŭ sudovych materyjałach jana nie vystaŭlaje.

Hety epizod źjaŭlajecca adnoj ź niamnohich zhadak ciapierašniaha prezidenta na tysiačach fajłaŭ, apublikavanych u piatnicu. Jon prysutničaje na niekalkich fotazdymkach, ale jaho ŭdzieł minimalny.

Aficyjnaja staronka pieradvybarčaha štaba Trampa paśla vychadu dakumientaŭ apublikavała ŭ sacsietcy X fatahrafii Klintana. Pres-sakratarka Trampa taksama pierapościła vyjavy Klintana, dadaŭšy podpis: «Oho!»

Pry hetym publikacyja dakumientaŭ jašče nie zakončanaja. Namieśnik hienieralnaha prakurora Tod Błanš zajaviŭ, što «niekalki sotniaŭ tysiač» staronak usio jašče prachodziać pravierku i pakul nie apublikavanyja.

Raniej prezident ZŠA kazaŭ, što na praciahu mnohich hadoŭ siabravaŭ z Epštejnam, ale prykładna ŭ 2004 hodzie jany pasvarylisia — za niekalki hadoŭ da pieršaha aryštu finansista. Tramp paśladoŭna admaŭlaje luboje dačynieńnie da złačynstvaŭ, źviazanych z Epštejnam.

Endru, jaki lažyć na kaleniach u inšych ludziej

Na adnym z apublikavanych zdymkaŭ vidać vyjava Endru Mauntbietena-Vindzara, jaki lažyć na kaleniach u piaci čałaviek, tvary jakich zafarbavanyja. Zzadu ich staić Hiślejn Makśvieł — asudžanaja saŭdzielnica Epštejna.

Pavialičyć

Endru ŭžo šmat hadoŭ znachodzicca pad pilnaj uvahaj z-za svajho raniejšaha siabroŭstva z Epštejnam, jaki na hetym fota adsutničaje. U kancy kastryčnika Endru Mauntbeten-Vindzar byŭ pazbaŭleny tytuła prynca ŭ tym liku z-za suviaziaŭ z Epštejnam.

Endru nieadnarazova admaŭlaŭ lubuju datyčnaść da złačynstvaŭ, źviazanych z Epštejnam, zajaŭlajučy, što «nie bačyŭ, nie byŭ śviedkam i nie padazravaŭ pra jakija-niebudź dziejańni, jakija paśla pryviali da jaho aryštu».

Majkł Džeksan, Dyjana Ros, Krys Takier i Mik Džahier

Upieršyniu ŭ apublikavanych materyjałach pa spravie finansista, viadomaha svaimi suviaziami ŭ śviecie šou-biznesu i palitycy, pradstaŭlenaje nastolki šyrokaje koła znakamitaściaŭ. Na niekatorych malunkach, apublikavanych Miniustam ZŠA, vyjaŭlenyja takija zorki, jak Majkł Džeksan, Mik Džahier i Dajana Ros.

Pavialičyć

Pavialičyć

Niezrazumieła, dzie i kali byli zroblenyja hetyja fatahrafii i ŭ jakim kantekście. Taksama nieviadoma, ci byŭ Epštejn asabista źviazany z usimi hetymi ludźmi ci prosta prysutničaŭ na tych ža samych mierapryjemstvach.

Na niekalkich zdymkach prysutničaje akcior Krys Takier. Na adnym z fota jon siadzić pobač z Klintanam za abiedziennym stałom, na inšym — staić na ŭźlotnaj pałasie aeradroma pobač z Hiślejn Makśvieł.

Pavialičyć

Makśvieł kala rezidencyi na Daŭninh-stryt

Na inšaj fatahrafii, uklučanaj u apublikavanyja ŭčora dakumienty, Hiślejn Makśvieł pazuje na fonie doma №10 na Daŭninh-stryt — aficyjnaj rezidencyi premjer-ministra Vialikabrytanii ŭ Łondanie.

Na fatahrafii jana adna; pry hetym adsutničaje jaki-niebudź kantekst, jaki tłumačyć metu jaje znachodžańnia tam ci čas, kali byŭ zrobleny zdymak.

Taksama nieviadoma, chto zajmaŭ pasadu premjer-ministra ŭ momant zdymki i ŭ jakoj jakaści Makśvieł naviedvała Daŭninh-stryt.

Pavialičyć

Sotni tysiač staronak usio jašče nie apublikavanyja

Siarod dakumientaŭ, apublikavanych 19 śniežnia, mnostva materyjałaŭ sa schavanymi frahmientami, uklučajučy palicejskija spravazdačy, pratakoły rasśledavańniaŭ i fatahrafii. Bolš za 100 staronak adnaho dakumienta, źviazanaha z rasśledavańniem vialikaha žury, zaretušavanyja całkam.

Ułady ŭ adpaviednaści z zakonam mieli prava redahavać materyjały dla abarony asob achviar abo źviestak, źviazanych z rasśledavańniem, jakoje jašče idzie, adnak pa zakonie jany abaviazanyja tłumačyć pryčyny takich pravak. Pakul hetaha zroblena nie było.

Jak zajavili ŭ Miniuście ZŠA, tysiačy staronak, apublikavanych 19 śniežnia, — tolki častka zapłanavanych da publikacyi dakumientaŭ. Namieśnik hienieralnaha prakurora Tod Błanš paviedamiŭ, što viedamstva apublikuje «niekalki sotniaŭ tysiač staronak» 19 śniežnia i źbirajecca apublikavać «jašče niekalki sotniaŭ tysiač» u najbližejšyja tydni. Jon rastłumačyŭ, što kožnuju staronku staranna praviarajuć, kab «kožnaja achviara — jaje imia, asoba, historyja, u toj miery, u jakoj heta nieabchodna, — była całkam abaronienaja», i hety praces patrabuje času.

Terminy publikacyi dadatkovych materyjałaŭ zastajucca niajasnymi, i zakanadaŭcy z abodvuch bakoŭ vykazvajuć niezadavolenaść z hetaj nahody. Demakraty, uklučajučy kanhresmiena Ro Chanu, pryhrazili mierami ŭ dačynieńni da supracoŭnikaŭ Miniusta, až da impičmientu abo mahčymaha kryminalnaha pieraśledu z-za zatrymak.

Chana supolna z kanhresmenam-respublikancam Tomasam Masi damohsia vyniasieńnia na hałasavańnie zakona ab publikacyi fajłaŭ Epštejna.

«Publikacyja Ministerstvam justycyi sotniaŭ tysiač staronak dakumientaŭ nie adpaviadaje patrabavańniam zakona», — napisaŭ Chana ŭ sacsietkach, dadaŭšy, što jany z Masi razhladajuć roznyja varyjanty dalejšych dziejańniaŭ.

• 3
• 0
• 2
• 2
• 0
• 0
• 0
• 0