Tramp zahadaŭ rasśledavać mahčymyja suviazi Epštejna z Klintanam i bankirami. Miniust ZŠA padparadkavaŭsia

U svaim paście, apublikavanym u sietcy Truth Social, Tramp nie chavaŭ, što vyrašyŭ paprasić hienprakurora ZŠA Pem Bondzi «rasśledavać suviazi i adnosiny Džefi Epštejna» z Klintanam i inšymi, pakolki demakraty «śpiekulujuć» na tym, što jon nazvaŭ «vydumkami» z nahody biznesmena.

Bondzi adkazała, što jaje ministerstva «zojmiecca hetym z usioj rašučaściu i pryncypovaściu». Pakul niezrazumieła, ci nakiravaŭ Tramp u Miniust aficyjnuju dyrektyvu, ci ž hienprakuror vyrašyła zrabić svaju zajavu na asnovie dopisaŭ prezidenta ŭ Truth Social.

Bondzi zajaviła, što rasśledavańniem suviaziej demakrataŭ i bankiraŭ z Epštejnam zojmiecca prakuror Džej Klejtan.

Amierykanskija prezidenty zvyčajna nie dajuć ukazańnia Miniustu pačynać rasśledavańni suprać kankretnych ludziej abo kampanij.

Roznyja kiraŭniki Biełaha doma ŭ minułym pryznačali dla takich pracedur śpiecyjalnych prakuroraŭ — jurystaŭ, jakija dziejničajuć niezaležna ad administracyi.

Pra jakija mienavita suviazi idzie havorka?

U svaim dopisie ŭ Truth Social Tramp zhadvaŭ mahčymyja suviazi Epštejna ź Biłam Klintanam, byłym ministram finansaŭ ZŠA Łary Sandersam, zasnavalnikam sietki LinkedIn Rydam Chofmanam (jon taksama źjaŭlajecca donaram Demakratyčnaj partyi), a taksama z bankam J.P. Morgan and Chase i «mnohimi inšymi ludźmi i arhanizacyjami».

«Epštejn byŭ demakratam, i jon prablema mienavita dla demakrataŭ, a nie dla respublikancaŭ, — napisaŭ Tramp u svajoj sacsietcy. — Im usim pra jaho viadoma, tak što nie treba tracić čas na Trampa. Mnie treba krainaj kiravać!»

Viadoma, što Klintan lotaŭ na samalocie Epštejna padčas humanitarnych pajezdak u Afryku ŭ pačatku 2000‑ch i ŭ toj čas chvaliŭ biznesmena jak addanaha fiłantropa, choć paźniej śćviardžaŭ, što parvaŭ ź im suviazi.

U zajavie Klintana ad 2019 hoda havorycca, što ŭ pajezdkach na samalocie Epštejna jaho supravadžali supracoŭniki jaho dabračynnaha fondu i ciełaachoŭniki z Sakretnaj słužby ZŠA (jak byłomu prezidentu, jamu naležyć achova pažyćciova), a pra złačynstvy Epštejna jon ničoha nie viedaŭ.

Pakul nie było nijakich vartych davieru dokazaŭ taho, što Klintan moh jakim-niebudź čynam prymać udzieł u złačynstvach Epštejna. Były prezident ZŠA nieadnarazova padkreślivaŭ, što nie ździajśniaŭ nijakich supraćpraŭnych dziejańniaŭ.

Jak paviedamlaje amierykanskaja telekampanija CBS, u tolki što apublikavanaj pierapiscy Epštejna toj śćviardžaje, što Klintan «nikoli ŭ žyćci» nie naviedvaŭ jaho pryvatny vostraŭ (dzie adbyvalisia niekatoryja sa złačynstvaŭ). Pry hetym Tramp nieadnarazova śćviardžaŭ advarotnaje.

Bank i były ministr finansaŭ

Jak nahadvaje ahienctva Reuters, bank J.P. Morgan and Chase u 2023 hodzie zapłaciŭ niekatorym achviaram złačynstvaŭ Epštejna 290 młn dołaraŭ, kab urehulavać padadzieny suprać jaho pazoŭ. Achviary śćviardžali, što JP Morgan addavaŭ pieravahu nie zaŭvažać dziejańni Epštejna suprać dziaŭčat, pakolki jon byŭ kaštoŭnym klijentam.

U adkaz na apošnija zajavy Trampa aficyjny pradstaŭnik J.P. Morgan and Chase zajaviŭ, što bank škaduje ab svaich minułych suviaziach z Epštejnam, ale jon «nie sadziejničaŭ jamu ŭ jaho žudasnych złačynstvach».

«U ŭładaŭ była infarmacyja, jakaja nieabvieržna śviedčyć ab jaho złačynstvach, ale jany nie padzialilisia joju z nami i inšymi bankami», — taksama skazana ŭ zajavie banka, pieradadzienaj ahienctvu AFP.

Samiers prymaŭ dabračynnyja padarunki ad Epštejna, kali pracavaŭ kiraŭnikom Harvardskaha ŭniviersiteta. U novaj porcyi listoŭ biznesmena, apublikavanaj kanhresmienami, jość pierapiska pamiž Samiersam i Epštejnam ad kastryčnika 2017 hoda.

U adnym ź listoŭ Samiers dzielicca z Epštejnam svaim mierkavańniem z nahody prezidenctva Trampa i piša: «D. Dž. T. [inicyjały Trampa — Red] — samy ščaślivy chłopiec z punktu hledžańnia apazicyi, ekanomiki i inšaha. Ale ja ŭsio ž taki dumaju, što jaho śviet abryniecca».

U 2023 hodzie pradstaŭnik Samiersa skazaŭ haziecie Wall Street Journal, što były ministr i kiraŭnik Harvardskaha ŭniviersiteta «hłyboka škaduje ab svaich kantaktach z Epštejnam paśla taho, jak jamu byŭ vyniesieny prysud».

Chofman pryznavaŭ, što mnostva razoŭ sustrakaŭsia z Epštejnam, ale heta adbyvałasia tolki pa pracy — i ŭ prafiesijnaj abstanoŭcy.

Što ŭ pierapiscy skazana pra samoha Trampa

Tramp paśladoŭna admaŭlaje jakija-niebudź pravaparušeńni, źviazanyja z Epštejnam, choć da niekatoraha času padtrymlivaŭ ź im siabroŭskija suviazi.

U apublikavanaj demakratami pierapiscy jaho imia fihuruje mnostva razoŭ. Wall Street Journal padličyła, što Tramp zhadvajecca ŭ bolš čym 1600 «halinach» abmienaŭ elektronnymi listami (z 2324).

Adzin ź listoŭ — pierapiska Epštejna ź jaho siabroŭkaj, śvieckaj lvicaj Hiślejn Makśvieł u krasaviku 2011 hoda. Finansist źviartaje jaje ŭvahu na toje, što Tramp — «sabaka, jaki jašče nie zabrachaŭ». «[Achviara] praviała šmat hadzin u mianie doma ź im», — piša Epštejn. «Jaho imia ni razu nie zhadvałasia», — dadaŭ jon. Na heta Makśvieł adkazała: «Ja dumała pra heta…»

Jak adznačaje CNN, kantekst hetaj pierapiski nievidavočny. Epštejn na toj momant užo vyjšaŭ na volu, adsiedzieŭšy 13 miesiacaŭ u turmie: u 2008 hodzie jon pryznaŭ vinu ŭ padbuchtorvańni da prastytucyi, u tym liku ŭ dačynieńni da niepaŭnaletnich, i byŭ prysudžany da 18 miesiacaŭ źniavoleńnia.

Makśvieł letam 2025 hoda kazała, što jana nikoli nie bačyła, kab Donald Tramp byŭ u domie Epštejna.

Inšy list, apublikavany demakratami, Epštejn napisaŭ u studzieni 2019 hoda žurnalistu Majkłu Vołfu, aŭtaru niekalkich knih pra Trampa.

«Tramp skazaŭ, što jon paprasiŭ mianie adličycca [z kłuba Mar-a-Łaha]. Nikoli [ja nie byŭ] členam. Viadoma, jon viedaŭ pra dziaŭčynak, tamu što jon paprasiŭ Hiślejn spynicca», — napisaŭ Epštejn.

U Biełym domie raniej kazali, što Tramp zabaraniŭ Epštejnu naviedvać Mar-a-Łaha, tamu što finansist byŭ «miarzotnikam», a sam Tramp kazaŭ, što Epštejn «kraŭ» u jaho rabotnic sa spa ŭ kłubie ŭ Fłarydzie.

Respublikancy ŭ Kamitecie pa nahladzie ličać, što demakraty schavali ŭ apublikavanych listach imia Virdžynii Džufre, adnoj z hałoŭnych achviar Epštejna. Pra heta ž zajaŭlaje i Bieły dom.

Tym časam u Pałacie pradstaŭnikoŭ nabrałasia dastatkova podpisaŭ pad zakonaprajektam, jaki abaviaža Ministerstva justycyi apublikavać usie dakumienty, źviazanyja sa spravaj Epštejna (pakul što apublikavany tolki 20 tys. dakumientaŭ sa spadčyny pamierłaha finansista). Hałasavańnie čakajecca na nastupnym tydni.

U padtrymku zakona vystupili demakraty i čatyry členy Respublikanskaj partyi, u tym liku viadomaja prychilnica Trampa ultrakansiervatyŭnaja kanhresvumien Mardžory Tejłar Hryn. U piatnicu jana zajaviła, što z boku prezidenta ZŠA było b «vielizarnaj pamyłkaj» piarečyć suprać publikacyi ŭsich materyjałaŭ, źviazanych z Epštejnam.

• 1
• 0
• 0
• 3
• 0
• 0
• 0
• 0