Rabotniki homielskaha pradpryjemstva skardziacca, što z pačatku hoda im nie płaciać zarobki
Rabotniki pryvatnaha homielskaha pradpryjemstva TAA «BiPiDžy Płastyk», jakoje vyrablaje roznyja drobnyja płastykavyja vyraby, z pačatku hoda nie atrymlivali zarobkaŭ. Jak daviedałasia vydańnie «Fłahštok» ad znajomych rabotnikaŭ firmy, tyja źviartalisia z hetaj nahody ŭ orhany ŭłady, ale dapamohi pakul nie adčuli.
«Spačatku pracavali ŭ firmie «Biełpalimierhaz», potym pieraviali ŭ «BiPiDžy Płastyk» — supracoŭniki miarkujuć, što tam adzin i toj ža faktyčny kiraŭnik. U studzieni pajšli daŭhi pa zarobkach, abiacali, što ŭsio naładzicca i ŭsio vypłaciać. U vyniku zarobkaŭ nie było za studzień, luty, sakavik. U krasaviku kala 20 čałaviek zvolnilisia, ale i pry zvalnieńni nikoha nie raźličyli».
Zatym, pavodle słoŭ rabotnikaŭ, kiraŭnik pieravioŭ astatnich supracoŭnikaŭ u skład «Biełpalimierhaza», a «BiPiDžy Płastyk» aficyjna ličycca nie na im. Pieraviedzienyja supracoŭniki atrymlivajuć zarobak, ale kala 20 čałaviek, jakija zvolnilisia, zastalisia biez raźliku:
«Źviartalisia ŭ vykankam. Adździeł prymusovaha vykanańnia i Dziaržkantrol taksama viedajuć pra situacyju. Telefanavali na haračuju liniju. Ale kiraŭnik choča abjavić firmu bankrutam i zastacca ni pry čym. Nie viedajem, kudy źviartacca dalej».
Rabotniki aścierahajucca, što jany tak i zastanucca ni z čym, i što navat praz sud nie zmohuć spahnać zarobki.
Kiraŭnikom «Biełpalimierhazv» ŭ aficyjnych krynicach značycca Kanstancin Karpaŭ — jon zhadvaŭsia ŭ 2025 hodzie ŭ spravazdačy ab pašyranym pasiadžeńni prezidyuma Respublikanskaha kamiteta bankaŭska-finansavaha prafsajuza. Jahonaja firma była siarod pryvatnych kampanij, jakija naviedvali siabry prezidyuma. Tady jany «pryjšli da vysnovy, što kłopat pra čałavieka pracy źjaŭlajecca adnym z pryjarytetnych pryncypaŭ, na jakich pabudavanaja praca» ŭ tym liku TAA «Biełpalimierhaz»:
«Biaśpiečnyja ŭmovy pracy, hodny ŭzrovień zarabotnaj płaty — asnoŭnaja ŭstanoŭka sumiesnaj inicyjatyvy kiraŭnictva i prafaktyvu. Rabotniki stabilna harantavanyja ŭ zabieśpiačeńni šyrokaha sacpakieta ŭ adpaviednaści ź dziejnaj Kalektyŭnaj damovaj».
Tady ž paviedamlałasia, što ad imia Respublikanskaha kamiteta «za asabisty ŭkład u raźvićcio i ŭmacavańnie zhurtavanaści Bankaŭska-finansavaha prafsajuza» byli ŭručanyja ŭznaharody dyrektaru TAA «Biełpalimierhaz» Karpavu i kiraŭniku inšaj firmy.
Ciapier čytajuć
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary