«Jon rasijski łabist». Kałas zajaviła, što Šroder nie moža być pieramoŭščykam ES z Rasijaj
Eks-kancler Hiermanii Hierchard Šroder, jaki faktyčna źjaŭlajecca łabistam rasijskich dziaržaŭnych kampanij, nie moža być pryznačany pieramoŭščykam ad Jeŭrapiejskaha sajuza pa pytańni zaviaršeńnia rasijska-ŭkrainskaj vajny. Pra heta zajaviła pradstaŭnica ES pa pytańniach zamiežnaj palityki i palityki biaśpieki Kaja Kałas 11 maja, piša «Jeŭrapiejskaja praŭda».
Kałas pierakananaja, što prarasijski Šroder — drennaja kandydatura.
«Ja dumaju, što Hierchard Šroder byŭ łabistam, vysokapastaŭlenym łabistam rasijskich dziaržaŭnych kampanij.
Tamu zrazumieła, čamu Pucin choča, kab heta byŭ mienavita hety čałaviek — kab, pa sutnaści, jon siadzieŭ pa abodva baki stała», — zajaviła Kałas.
Jana taksama dadała, što ŭsie zaraz ubačyli, što «spynieńnie ahniu, jakoha chacieŭ Pucin, było tolki vielmi cyničnym dla abarony jaho parada, u toj čas jak jany nasamreč atakavali cyvilnych asob va Ukrainie».
«Kali my damo Rasii prava pryznačać pieramoŭščyka ad našaha imia, viedajecie, heta było b nie vielmi mudra», — padahulniła hałoŭny dypłamat ES.
Aficyjny Bierlin taksama nie ŭsprymaje prapanovu Pucina nakont Šrodera jak pieramoŭcy z Rasijaj ad ES i bačyć u hetym sprobu pasiejać raskoł u Jeŭropie i siarod niamieckich palitykaŭ.
82‑hadovy Hierchard Šroder byŭ kancleram Hiermanii z 1998 pa 2005 hod i lidaram SDPH z 1999 pa 2004 hod i hadami padviarhaŭsia krytycy za siabroŭskija adnosiny z RF i pracu na rasijskija enierhietyčnyja kampanii.
Paśla pačatku poŭnamaštabnaj vajny jon tak i nie dystancyjavaŭsia ad Kramla. Siarod apošniaha, u studzieni 2026 hoda eks-kancler vystupiŭ za adnaŭleńnie enierhietyčnaha supracoŭnictva z RF i zaklikaŭ nie demanizavać Rasiju, niahledziačy na jaje ahresiju suprać Ukrainy.
Na hetym fonie ŭ SDPH niekalki razoŭ padymali pytańnie ab vyklučeńni Šrodera, ale biespaśpiachova.
«Uźnikajuć ujaŭleńni, što palitviaźni musiać być stojkimi, sabranymi, udziačnymi. A realnaść roznaja». Pahavaryli ź ludźmi, jakija vodziać departavanych litaralna za ruku66
Kamientary