Iłan Mask i inšyja pratrampaŭskija miljardery vystupili suprać uviadzieńnia novych mytaŭ

Zasnavalnik Tesla i SpaceX, a taksama kuratar Departamienta efiektyŭnaści dziaržaŭnaha kiravańnia ZŠA (DOGE) Iłan Mask spačatku abrynuŭsia z krytykaj na adras daradcy prezidenta pa handlovaj palitycy Pitera Navara, jaki adyhraŭ klučavuju rolu ŭ raspracoŭcy płana pa mytach, a zatym padčas asabistych znosin paprasiŭ Trampa admovicca ad hetaj pastanovy, paviedamili Washington Post (WaPo) daśviedčanyja krynicy.

Adnak, ź ich słoŭ, prezident ZŠA nie pasłuchaŭ biznesmiena, jaki ŭkłaŭ amal 290 miljonaŭ dalaraŭ u padtrymku Trampa i inšych respublikancaŭ na vybarach.

Paśla hetaha Mask apublikavaŭ u sacsietcy X videa, na jakim nobieleŭski łaŭreat pa ekanomicy Miłtan Frydman tłumačyć važnaść svabodnaha rynku.

Zanadta vysokimi nazvaŭ prapanavanyja myty suzasnavalnik amierykanskaj handlovaj sietki kram budmateryjałaŭ Home Depot i daŭni sponsar Respublikanskaj partyi Kien Łanhan. U intervju Financial Times jon zajaviŭ, što 46-pracentny taryf dla Vjetnama — «łuchta sabačaja», a dadatkovy zbor 34% dla Kitaja — «zanadta ahresiŭny» i nie daje «šancu na pośpiech surjoznych pieramoŭ».

Pavodle jaho słoŭ, «bolš kiravanym i, biezumoŭna, kanstruktyŭnym» padychodam było b uviadzieńnie 10-pracentnaha ahulnaha taryfu na impartavanyja tavary z nastupnymi dvuchbakovymi pieramovami z krainami. Taksama Łanhan vykazaŭ upeŭnienaść, što Trampa «drenna infarmujuć» u halinie ekanamičnaj palityki.

U svaju čarhu miljarder Bił Ekman, jaki byŭ sponsaram prezidenckaj kampanii Trampa, nazvaŭ myty «surjoznaj palityčnaj pamyłkaj».

Nie padtrymaŭ taryfy, vyšejšyja za 10%, i inviestar Stenli Darkienmiler, jakoha Financial Times nazyvaje nastaŭnikam ministra finansaŭ ZŠA Skota Biesienta.

Suprać miery vykazaŭsia i ministr finansaŭ pieršaha prezidenckaha terminu Trampa Uiłbur Ros. Ź jahonych słoŭ, situacyja «bolš surjoznaja», čym jon čakaŭ. Ros padkreśliŭ, što biznes moža spravicca jak z dobrymi, tak i z drennymi navinami, ale «składana spraŭlacca ź niavyznačanaściu».

Vykanaŭčy dyrektar JPMorgan Chase Džejmi Dajman u štohadovym liście akcyjanieram papiaredziŭ, što taryfy, «vierahodna, pryviaduć da rostu inflacyi i prymusiać mnohich zadumacca pra bolšuju vierahodnaść recesii». «Čym chutčej budzie vyrašana hetaja prablema, tym lepš, tamu što niekatoryja niehatyŭnyja nastupstvy z časam buduć narastać i ich budzie ciažka paviarnuć nazad», — papiaredziŭ Dajman.

Pry hetym śpiecyjalisty JPMorgan acanili imaviernaść recesii ŭ ZŠA ŭ 60%, a zamiest rostu VUP krainy na 1,3% sioleta čakajuć padzieńnia na 0,3%. U Goldman Sachs aceńvajuć vierahodnaść nastupleńnia recesii ŭ ZŠA ŭ najbližejšyja 12 miesiacaŭ u 45%. 

• 1
• 0
• 16
• 0
• 0
• 0
• 0
• 0