Tramp pahražaje Kitaju novymi hihanckimi mytami, ale azijackija biržy rastuć
Prezident ZŠA Donald Tramp zapeŭniŭ, što nie źbirajecca adkładać uviadzieńnie novych impartnych pošlin, i dvojčy za paniadziełak pahraziŭ Kitaju novymi hihanckimi pošlinami. Tym nie mienš, azijackija fondavyja indeksy pry adkryćci tarhoŭ u aŭtorak pačali častkova adyhryvać padzieńnie papiaredniaha dnia, piša Bi-bi-si.
Donald Tramp spačatku zajaviŭ pra namier dadać jašče 50% da ŭžo abvieščanych 54-pracentnych pošlin na kitajski impart u svajoj sacsietcy Truth Social. Prezident ZŠA paviedamiŭ, što zrobić heta, kali Piekin nie admienić svajo rašeńnie adkazać na pošliny, abvieščanyja Trampam u piatnicu, simietryčnymi 34-pracentnymi zborami z amierykanskaha impartu.
Potym jon paćvierdziŭ hety namier na pres-kanfierencyi ŭ Biełym domie. Kali Tramp vykanaje abiacańnie, to kitajski impart u ZŠA budzie abkładzieny 104-pracentnymi pošlinami: 20% novy prezident uvioŭ u sakaviku i jašče 34% zvyš taho — na minułym tydni. Ministerstva handlu KNR u adkaz u aŭtorak zajaviła, što Kitaj nie paddasca na šantaž i budzie zmahacca z pošlinami da kanca.
Pahrozu Trampa dadać jašče 50% ministerstva nazvała «pamyłkaj dadatkova da raniejšaj pamyłki» i zapatrabavała ad amierykanskaha prezidenta admianić rašeńni pra pošliny i raspačać pieramovy.
Nijakich paŭz
Žurnalisty spytali ŭ Trampa, ci nie dumaje jon pra «pauzu» va ŭviadzieńni abvieščanych pošlin u dziejańnie, i jon adkazaŭ admoŭna.
«My nie razhladajem [takuju paŭzu]. U nas šmat-šmat krain, jakija jeduć na pieramovy pra ździełki z nami, i heta buduć sumlennyja ździełki», — skazaŭ Tramp.
Ministr finansaŭ ZŠA Skot Biesent, jakomu Tramp daručyŭ vieści hetyja pieramovy, skazaŭ u paniadziełak telekanału Fox, što Kitaj «izaluje siabie», adkazvajučy na pošliny Trampa, i što jon, Biesent, spadziajecca, što pa vynikach pieramoŭ ź inšymi krainami taryfy dla ich buduć źnižany.
Azija adyhryvaje častku strat
Niahledziačy na pahrozu dla ŭsioj suśvietnaj ekanomiki, jakuju mnohija śpiecyjalisty bačać u pošlinach Trampa, a taksama pahrozu novaha vitka handlovaj vajny asobna pamiž ZŠA i Kitajem, azijackija biržy ŭ aŭtorak pačali adyhryvać vialikaje padzieńnie, jakoje jany pieražyli napiaredadni.
Indeks Takijskaj biržy Nikkei 225 vyras na pačatku tarhoŭ ranicaj aŭtorka bolš čym na 6%. U paniadziełak jon upaŭ na 7,8%.
Vyraśli i fondavyja rynki ŭ Aŭstralii, Paŭdniovaj Karei, a taksama ŭ Hankonhu i Šanchai. U toj ža čas kaštoŭnyja papiery na tajvańskaj biržy praciahnuli padać: jaje indeks TAIEX u pieršyja chviliny tarhoŭ źniziŭsia jašče na 2,5%.
Vialikaje padzieńnie ŭ paniadziełak pieražyli fondavyja rynki i Azii, i Jeŭropy, i tolki amierykanskija indeksy, što źnižalisia na minułym tydni paśla zajaŭ Trampa pra handlovuju vajnu z usim śvietam, na pačatku novaha tydnia trymalisia bolš-mienš na raniejšym uzroŭni.
Ciapier čytajuć
Byłoha biełaruskaha palitviaźnia sudziać u Litvie za padrychtoŭku da zabojstvu rasijskaha apazicyjaniera. Pahražaje až da pažyćciovaha1
Kamientary