Znajšli sieryjnych zabojcaŭ, jakija trymali ŭ strachu Varšavu. Heta palak i ŭkrainiec

U apošnija dni pa Varšavie chadzili čutki pra sieryjnaha zabojcu. U noč na 16 lutaha ŭ kvatery ŭ centry horada była znojdziena miortvaj 80-hadovaja žančyna. Na jaje ciele byli vidać ślady baraćby, a ź jaje kvatery źnikli karciny, elektronika i płaciežnyja karty.

Druhoje zabojstva adbyłosia ŭ noč na 23 lutaha. Achviaraj stała 89-hadovaja žančyna, kvatera jakoj była abrabavanaja. Jak pakazała ekśpiertyza, jaje zadušyli.

Treciaja drama adbyłasia ŭ noč na 25 lutaha. U svajoj kvatery była zabitaja 73-hadovaja žančyna. Pa słovach palicyi, złačyniec, chutčej za ŭsio, źviazaŭ achviaru i prymusiŭ žančynu źviarnucca ŭ bank, kab atrymać dostup da jaje srodkaŭ. Jak raskazaŭ kansultant banka, jana havaryła nievyrazna, jak byccam joj niechta zatknuŭ rot, tamu jon paviedamiŭ u palicyju.

Supracoŭniki palicyi, jakija pryjechali na miesca zdareńnia, znajšli tam mužčynu, jaki pasprabavaŭ uciačy praz akno druhoha paviercha. Jaho aryštavali. Palicyja paviedamlaje, što im akazaŭsia 45-hadovy palak, jaki ŭ minułym užo pryciahvaŭsia da adkaznaści za drobnyja pravaparušeńni. U momant zatrymańnia mužčyna znachodziŭsia pad uździejańniem narkotykaŭ. Supracoŭniki palicyi znajšli ŭ palaka kaštoŭnyja rečy zabitych.

Nastupnaj nočču pa miescy žycharstva byŭ taksama zatrymany 33-hadovy hramadzianin Ukrainy, jaki da hetaha nie mieŭ prablem z zakonam.

Pa słovach pradstaŭnika akruhovaj prakuratury Varšavy, achviary viedali padazravanych. Mužčyny zajmalisia drobnym ramontam, u tym liku santechnikaj, i tak znajomilisia sa svaimi achviarami. Spravu słužboviec nazvaŭ «spravaj dvuch sučasnych Radzivonaŭ Raskolnikavych», jakija «dziejničali z samych nizkich pamknieńniaŭ».

45-hadovamu palaku vystaŭlena piać abvinavačańniaŭ. Ź ich dva ŭ zabojstvie z metaj rabavańnia, jakija jon dziejśniŭ samastojna, a taksama adno — sumiesna i pa zmovie z hramadzianinam Ukrainy. Što da 33-hadovaha ŭkrainca, to jamu byli vystaŭlenyja abvinavačańni ŭ skupcy kradzienaha i zabojstvie.

Akramia taho, palicyja znajšła ŭ santechnikaŭ rečy čaćviortaj žančyny, jakaja była znojdziena miortvaj u svajoj kvatery. Pieršapačatkova ličyłasia, što jana pamierła svajoj śmierciu. Adnak, jak pakazała ekśpiertyza, pryčynaj śmierci žančyny moh stać sardečny prystup, vyklikany stresam, źviazanym z rabavańniem.

Pa słovach prakurora, palak i ŭkrainiec pryznali siabie vinavatymi. Jany taksama dali pakazańni. Adnak padadzienyja imi źviestki istotna adroźnivajucca ad taho, što ŭdałosia vyśvietlić. 

Jak paviedamlaje polskaja presa, rasśledavańnie praciahvajecca. Uvaha palicyi źviernutaja na inšyja nievytłumačalnyja vypadki śmierciaŭ pažyłych žančyn u Varšavie.

• 8
• 0
• 2
• 1
• 16
• 4
• 11
• 0