«Pajechała ŭ tur, bo maryła pabačyć palarnuju noč». Što kažuć pra biełarusku, jakuju źniesła płyń pad Murmanskam

Adna z žančyn, jakaja da pahružeńniaŭ u vadu pierasiekłasia sa źnikłaj turystkaj, raskazała «Našaj Nivie», što biełaruska pajechała ŭ tur, bo vielmi chacieła pabačyć palarnuju noč.

«Ale ŭ turapierataraŭ zaŭsiody poŭny pakiet zabavaŭ, i ŭsim chaciełasia pateściravać niešta novaje. U našaj hrupy, darečy, usio prajšło supier — z nami ŭ vadu zachodziŭ sam instruktar, jašče dva čałavieki padstrachoŭvali jaho na bierazie. A tut voś jak, vinavataje niadbajstva — u ich nie było nijakich strachovak. Vielmi škada, što žančyna ździejśniła svaju maru i paśla, jak ja razumieju, zahinuła: marazy da —37 hradusaŭ, u vadzie piaty dzień… Chto takoje pieražyvie».

I ŭ Biełarusi, i ŭ Rasii dośvied ajsfłoatynhu prapanoŭvajuć dziasiatki kantor. U vodach Kolskaha zaliva možna kupacca kruhły hod, bo navat zimoj vada tam nie zamiarzaje, dziakujučy Halfstrymu. Zvyčajna płavańnie na śpinie ŭ vadzie ciahniecca da 40 chvilin.

Adzin z hidaŭ z Murmanska raspavioŭ «Našaj Nivie», što da ich čaściakom źviartajucca turapieratary ci arhanizatary karparatyvaŭ, kab pradać pasłuhu z ajsfłoatynham u pakiecie ź inšymi zabavami, ale časam nie nabyvajuć prapanovu, bo šukajuć taho, chto arhanizuje zapłyŭ tańniej.

«Była kampanija, jakaja pryviezła da nas haściej adzin raz. My prapanavali im našy ŭmovy — kamfort, biaśpieku, — ale jany znajšli niešta tańniejšaje. Tak i skazali napramuju — im cikaviejšyja tyja, chto robić za mienšy košt. Tak i raźviałosia šmat hora-hidaŭ, jakija mohuć prosta na mašynach padvieźci ludziej, apranuć ich na vulicy, a biaśpieka — heta ŭžo sprava druhasnaja. Hałoŭnaje — chutčej pradać pasłuhu tym, dla kaho pytańnie ekanomii ŭ pryjarytecie».

Košt padobnych ekskursij u Rasii — kala 300 biełaruskich rubloŭ. Cana aŭtobusnych turaŭ ź Biełarusi pa sistemie «ŭsio ŭklučana» moža dachodzić da 300 dalaraŭ u zaležnaści ad apieratara.

Rasijskija śledčyja zaviali kryminalnuju spravu za akazańnie pasłuh, jakija nie adpaviadajuć patrabavańniam biaśpieki žyćcia spažyŭcoŭ. Viadoma, što ajsfłoatynh pravodziŭ miascovy siertyfikavany hid. Pradprymalnik zatrymany i daje pakazańni.

Na hety momant navat ziać źnikłaj žančyny nie viedaje padrabiaznaściaŭ zdareńnia.

«Pajechała jana ŭ składzie arhanizavanaj hrupy. Arhanizacyja (navat nie viedaju pakul jaje nazvy) prapanavała peŭny pieralik imprez u kompleksie. A chto tam za što adkazvaŭ — pakul nie viedaju. Kryminalnuju spravu zaviali ŭ dačynieńni taho, chto pavinien byŭ hladzieć za hetymi ludźmi, jakija pavinny byli apuskacca ŭ vadu», — raskazaŭ mužčyna partału «Anłajnier».

• 1
• 0
• 1
• 2
• 1
• 7
• 1
• 0