U Bierlinie dziasiatki tysiač žycharoŭ zastalisia bieź śviatła praz dyviersiju
Na paŭdniovym zachadzie Bierlina ŭžo niekalki dzion praciahvajecca maštabnaje adklučeńnie elektraenierhii, vyklikanaje dyviersijaj. Pa stanie na viečar 6 studzienia bieź śviatła zastajucca kala 25,5 tysiačy damoŭ i prykładna 1200 pradpryjemstvaŭ. Pra heta paviedamlaje Deutsche Welle sa spasyłkaj na apieratara haradskich elektrasietak Stromnetz Berlin.
Pavodle acenak bierlinskaha burhamistra Kaja Viehniera, zboj u elektrazabieśpiačeńni zakranuŭ kala 100 tysiač žycharoŭ stalicy, što składaje amal 3% nasielnictva horada. U vyniku nadzvyčajnaj situacyi zakrytyja 20 škoł, a z 74 damoŭ sastarełych elektraenierhiju ŭžo adnavili ŭ 72.
Pryčynaj błekautu staŭ padpał kabielnaha mosta praz kanał Teltaŭ pablizu ciepłaelektrastancyi Lichterfielde. Adkaznaść za dyviersiju ŭziała na siabie levaradykalnaja hrupoŭka Vulkan. Pavodle papiarednich źviestak, byli źniščanyja abo paškodžanyja piać kabielaŭ vysokaha napružańnia i dziesiać — siaredniaha. Ramontnyja raboty płanujuć zaviaršyć da viečara 8 studzienia. Adrazu paśla dyviersii biez elektryčnaści zastalisia kala 50 tysiač haspadarak i 2000 pradpryjemstvaŭ.
Pradstaŭniki Vulkan zajavili, što metaj ataki była «vykapniovaja enierhietyka», nazvaŭšy svaje dziejańni aktam «samaabarony i mižnarodnaj salidarnaści». Pry hetym jany śćviardžali, što nibyta spačuvajuć mienš zamožnym žycharam rajona.
Bierlinskija ŭłady nazvali toje, što adbyłosia, aktam teraryzmu. Burhamistr Viehnier padkreśliŭ uraźlivaść krytyčnaj infrastruktury Hiermanii i nieabchodnaść jaje lepšaj abarony.
Padobnyja napady ŭžo adbyvalisia raniej: u vieraśni minułaha hoda levaekstremisty pakinuli bieź śviatła kala 50 tysiač damoŭ na paŭdniovym uschodzie Bierlina, a ŭ 2024 hodzie dyviersija Vulkan u Brandenburhu pryviała da paškodžańnia zavoda Tesla.
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki39
Kamientary