Jak za apošni hod źmianiłasia kolkaść biełarusaŭ z DNŽ u Polščy? Cikavaja tendencyja
U Litvie apošnija dva hady nazirajecca prykmietnaje skaračeńnie kolkaści biełarusaŭ z DNŽ, a 2025 hod naohuł staŭ rekordnym pa adtoku. Pahladzieli, jak na hetym fonie vyhladaje situacyja ź biełarusami ŭ Polščy.
Masavy adtok u Polšču spyniŭsia?
Na pačatak 2026 hoda dziejny DNŽ u Polščy (lubych typaŭ) majuć 141 290 hramadzian Biełarusi. Ź ich 88 461 čałaviek maje časovy DNŽ (Pobyt czasowy), a PMŽ (Pobyt stały) — 41 771 čałaviek. Status uciekača majuć 1018 biełarusaŭ. Jašče kala 10 tysiač majuć DNŽ, vydadzienyja na roznych inšych padstavach.
Hod tamu ŭ Polščy naličvałasia 142 235 hramadzian Biełarusi z DNŽ usich typaŭ.
Ale heta roźnica nie śviedčyć pra toje, što biełarusaŭ u Polščy stała mienš. Reč u tym, što biełarusy aktyŭna atrymlivajuć polskaje hramadzianstva i, adpaviedna, vypadajuć ź liku zamiežnych hramadzian ź dziejnym dazvołam na žycharstva.
Za 2024 hod amal 5,7 tysiačy biełarusaŭ atrymali polskaje hramadzianstva (danych za 2025 hod pakul niama). U 2023‑m kala 4,4 tysiačy biełarusaŭ atrymali polski pašpart, a ŭ 2022‑m takich było kala 3 tysiač.
Atrymlivajecca, što tolki za try hady z 2022 pa 2024 kala 13 tysiač biełarusaŭ atrymali polskaje hramadzianstva i vypali z statystyki pa zamiežnikach.
Admietna, što na pačatak 2020 hoda ŭ Polščy było ŭsiaho 14 193 hramadzianiny Biełarusi z DNŽ usich typaŭ.
Za pieryjad z 2020 pa 2025 hod kolkaść biełarusaŭ z DNŽ u Polščy vyrasła ŭ 10 razoŭ.
Dla paraŭnańnia: dziesiać hadoŭ tamu, u pačatku 2016 hoda, u Polščy było ŭsiaho 4527 hramadzian Biełarusi z DNŽ.
Statystyka pakazvaje, što rekordny pryrost naziraŭsia ŭ 2021—2023 hadach, paśla čaho rost pačaŭ zapavolvacca, a za apošni hod spyniŭsia.
Hetyja źviestki pakazvajuć, što ŭ 2025‑m užo nie było takoj chvali adjezdu ź Biełarusi.
Jak vyhladaje karcina razam ź Litvoj?
Litva zajmaje druhoje miesca pa papularnaści siarod biełarusaŭ paśla Polščy. Tam užo dva hady zapar skaračajecca kolkaść trymalnikaŭ DNŽ ź biełaruskimi pašpartami. Za 2024 hod było minus 4656 čałaviek, a za 2025‑y — jašče minus 7225. Ad pikavych pakazčykaŭ skaračeńnie skłała 12 588 asob: 50 286 čałaviek ciapier suprać 62 844 čałaviek na 1 krasavika 2024 hoda.
Pry hetym važna razumieć, što na polskija i litoŭskija źviestki treba hladzieć krychu pad roznym vuhłom. Pakolki ŭ Litvie z 1 lipienia 2024 hoda, za niekatorymi vyklučeńniami, zamiežnikam z trecich krain nielha pracavać bieź miascovaha DNŽ, to ŭsie biełaruskija dalnabojščyki, navat tyja, što tolki ŭładkavalisia na pracu, majuć litoŭski DNŽ.
U Polščy ž pracoŭnyja vizy vydajucca pa-inšamu, i siarod tych ža dalnabojščykaŭ šmat kiroŭcaŭ ź Biełarusi, jakija hadami pracujuć pa vizach i DNŽ nie majuć, bo nie chočuć zamaročvacca afarmleńniem dazvołu na žycharstva, pakolki nie płanujuć žyć u Polščy.
Takim čynam atrymlivajecca, što ŭ vypadku z Polščaj pracent trymalnikaŭ DNŽ, jakija realna pražyvajuć u hetaj krainie, našmat bolšy, čym u Litvie.
Adnačasova ŭ Polščy moža być niamała ludziej, jakija žyvuć pa vizie, atrymanaj pa karcie palaka, abo ŭ čakańni atrymańnia DNŽ (tym bolš što termin čakańnia vyras). Tym nie mienš statystyka pakazvaje, što mienavita masavy adtok nasielnictva ź Biełarusi, jaki my nazirali ŭ papiarednija hady, spyniŭsia.
Ciapier čytajuć
Džefry Epštejn niekalki razoŭ atrymlivaŭ vizu ŭ Biełaruś. I dakładna naviedvaŭ našuju krainu4
Kamientary