Eks-žurnalistka dziaržaŭnych ŚMI, jakaja źbirała danaty na ježu, akazałasia dačkoj supracoŭnika KDB. U jaho navat jość pašpart prykryćcia
U pačatku studzienia «Lusterka» pisała pra byłuju žurnalistku dziaržvydańniaŭ i prychilnicu ŭłady Darju Ivanovu, jakaja skardziłasia, što miesiacami nidzie nie moža znajści dobruju pracu, i źbirała danaty na ježu. Paśla hetaj publikacyi žurnalisty daviedalisia, što žančyna da taho ž źjaŭlajecca dačkoj supracoŭnika Centralnaha aparata KDB. Źviestki paćvierdziła abjadnańnie byłych siłavikoŭ «Biełpoł».
«Kali jana stała Ivanovaj, nieviadoma. Były muž — kitajec, dziavočaje proźvišča — Čupachina», — adznačyŭ čytač. Vidać, Darja prajšła aficyjnuju praceduru źmieny proźvišča, bo pavodle pašpartnych źviestak jana, paviedamili ŭ «Biełpole», sapraŭdy Ivanova. Miarkujučy z sacsietak, heta dziavočaje proźvišča jaje maci.
Baćku Darji zavuć Čupachin Alaksandr Uładzimiravič, jon naradziŭsia ŭ 1974 hodzie, ciapier jamu 51. Jon słužyć abo słužyŭ u Centralnym aparacie KDB z 2004‑ha i jak minimum da 2019‑ha (zhodna z najaŭnaj u «Biełpole» bazie źviestak, aktualnaj na 2021 hod, apošni zapis pra pracu ŭ KDB u Čupachina — za 2019-y, ale heta nie aznačaje, što heta apošni hod jaho słužby ŭ viedamstvie).
Bolš za toje, u Čupachina jość pašpart prykryćcia na imia «Čarkasaŭ Alaksandr Uładzimiravič», paviedamili «Lusterku».
Pa aktyŭnaści jahonaha akaŭnta ŭ Telegram, dzie jon padpisany jak Aleks Markus, mužčyna cikavicca zbrojaj i nažami, pieryjadyčna ździajśniaje pajezdki ŭ Rasiju. Staronki ŭ sacsietkach znajści nie ŭdałosia.
U Darji i jaje baćki jość žyllo ŭ Minsku. Majucca źviestki pra ich rehistracyju na praciahu apošnich hadoŭ u šmatkvaternych damach na Ihumienskim trakcie (2005 hoda pabudovy) — mienavita tam, chutčej za ŭsio, žyvie Alaksandr Čupachin — i na vulicy Karpoviča ŭ Kopiščy (2019 hoda pabudovy), pobač z ŽK «Novaja Baravaja». Z 2019‑ha Darja karystałasia słužbami dastaŭki pa abodvuch adrasach.
Cikava, što na dziaržaŭnaj słužbie ŭ siamji Darji byŭ nie tolki baćka. Jaho baćki ŭsio žyćcio žyli ŭ Słucku, u maładości byli kamsamolskimi aktyvistami. Dzied Darji Uładzimir Čupachin byŭ vajskoŭcam — nižej na fota 1982 hoda jon u formie kapitana savieckaj armii.
A babula Darji, jak śćviardžaje krynica «Lusterka», Ludmiła Čupachina była dyrektaram Słuckaha kansiervavaha zavoda (z 2012 hoda jon uvachodzić u skład AAT «Słucki syrzavod»), ale paćviardžeńnia hetych źviestak niama. Pry hetym u sacsietkach Ludmiły šmat fotazdymkaŭ za 2010‑ia hady, dzie jana prysutničaje na roznych aficyjnych mierapryjemstvach i śviatach.
Darja Ivanova adreahavała na papiaredniuju publikacyju «Lusterka».
«Maju asabistuju historyju ŚMI sprabujuć pieratvaryć u tanny chajp i zbor danataŭ. Jany interpretavali moj post ledź nie jak prasicielstva— choć mnie nie patrebny padarunki. Mnie treba, kab tyja, chto najmaje ludziej, vykonvali ZAKON! <…> Raniej ja pracavała ŭ dziaržaŭnych ŚMI i śpiašajusia nahadać: žurnalist hučyć hanarova. <…> Ja — nie achviara. Ja samotnaja maci i śpiecyjalist, jakaja patrabuje bazavych i adekvatnych umoŭ. Na jakija ja, darečy, maju prava, i jakija prapisany ŭ Kanstytucyi. Tamu pierastańcie raspaŭsiudžvać fejki pra byłuju supracoŭnicu, jakaja maje patrebu ŭ padtrymcy». Moj kapitał — moj intelekt, dośvied i viedańnie zakona. I mienavita ich ja budu vykarystoŭvać, kab dapamahać inšym maci nie davać siabie ŭ biadu», — zajaviła Darja ŭ sacsietkach.
Jana taksama panarakała na nieprafiesijanalizm. Arhumientam było toje, što jaje fota ŭ milicejskaj formie, raźmieščanaje ŭ artykule i ŭziataje ź jaje sacsietak, nibyta było stvorana z dapamohaj niejrasietak jašče ŭ 2023 hodzie, a aŭtary materyjału pryniali jaho za sapraŭdnaje.
Adnak ŠI-hienieratary na toj momant nie byli zdolnyja stvarać takija jakasnyja vyjavy biez artefaktaŭ, i na realnaść fota pakazvajuć taksama śviatło, cieni i mnostva inšych detalaŭ.
Ciapier čytajuć
Azaraŭ mocna pakryŭdziŭsia na słovy «psieŭdalidarki Cichanoŭskaj», što jaho Płan Pieramoha byŭ pamyłkaj29
Kamientary