Va Ukrainie rasśledujuć spravu byłoha deputata, jaki pierad samaj vajnoj źbieh u Biełaruś
Va Ukrainie raspačali zavočnaje dasudovaje rasśledavańnie ŭ dačynieńni da byłoha deputata Viarchoŭnaj Rady Aleha Vałošyna. Adpaviedny dazvoł vydaŭ sud. Vałošyn pakinuŭ Ukrainu za tydzień da pačatku rasijskaha ŭvarvańnia ŭ 2022 hodzie i vyjechaŭ u Biełaruś, piša «Radyjo Svaboda».
Jak vynikaje z materyjałaŭ, jakimi vałodaje «Radyjo Svaboda», kryminalnuju spravu suprać Vałošyna zaviali jašče naprykancy studzienia 2022 hoda. Spačatku eks-deputatu inkryminavali dziaržaŭnuju zdradu, za što praduhledžana pakarańnie ŭ vyhladzie praciahłaha pazbaŭleńnia voli z mahčymaj kanfiskacyjaj majomaści.
U śniežni 2025 hoda da abvinavačańnia dadali jašče adzin artykuł — niepadaču dekłaracyi asobaj, jakaja vykonvaje dziaržaŭnyja funkcyi. Hetaje parušeńnie moža karacca bujnym štrafam, abmiežavańniem voli abo karotkaterminovym źniavoleńniem z zabaronaj zajmać pasady.
Siarod dokazaŭ u spravie — videamateryjały z prapahandysckaj prahramy «SASS upołnomočien zajaviť», jakaja vychodziła na biełaruskim dziaržaŭnym telekanale STV da červienia 2025 hoda. Prahramu viała žonka Vałošyna — Nadzieja Sas. Śledstva analizavała vypuski za pieryjad ź śniežnia 2022‑ha da lutaha 2023 hoda.
Pavodle vysnoŭ ekśpiertyzy, u vykazvańniach Aleha Vałošyna źmiaščalisia elemienty prapahandy, jakija śviedčać pra padtrymku dziejańniaŭ vajskova-palityčnaha kiraŭnictva Rasii padčas ahresii suprać Ukrainy. Takija zajavy, na dumku śpiecyjalistaŭ, mahli farmiravać antyŭładnyja nastroi va ŭkrainskim hramadstvie i nanosić škodu suvierenitetu, terytaryjalnaj cełasnaści i infarmacyjnaj biaśpiecy krainy.
Śledstva taksama śćviardžaje, što 13 lutaha 2022 hoda Vałošyn vyjechaŭ u Biełaruś, a ŭ dni, kali ŭ Rasii prymałasia rašeńnie ab uvarvańni va Ukrainu, znachodziŭsia na terytoryi RF.
Raniej Aleh Vałošyn pracavaŭ pres-sakratarom Ministerstva zamiežnych spraŭ Ukrainy ŭ časy prezidenctva Viktara Janukoviča, a paśla źmieny ŭłady ŭznačalvaŭ mižnarodny adździeł telekanała «112-Ukraina». Jaho žonka taksama pracavała na miedyjaresursach, jakija źviazvali ź Viktaram Miedźviedčukom — kumam Uładzimira Pucina.
Ciapier čytajuć
«Dali 3600 rubloŭ štrafu». Na biełarusku napisaŭ palityčny danos chłopiec, ź jakim jana chadziła na spatkańni i jakoha złaviła na zdradzie31
Kamientary
[Zredahavana]