Babaryka sustreŭsia z prychadžanami carkvy ŭ Bierlinie, dzie hod za hodam molacca za biełaruskich palitviaźniaŭ
«Apynuŭšysia ŭ Hiermanii, ja daviedaŭsia pra prostuju, ale vielmi čałaviečnuju historyju», — napisaŭ eks-palitviazień u svaim fejsbuku.
«Paśla padziej 2020 hoda ŭ Hiefsimanskaj carkvie ŭ Bierlinie źjaviłasia tradycyja: kožny čaćvier uviečary, hod za hodam, nievialikaja hrupa ludziej (jadro 4—6 čałaviek) źbirajecca razam, kab uspomnić i pamalicca za palitźniavolenych biełarusaŭ. Amal nichto ź ich nie maje suviazi ź Biełaruśsiu, bolšaść — pažyłoha ŭzrostu, ale ŭsie jany ludzi, zdolnyja spačuvać čužomu hora i ŭśviedamlajuć nieabchodnaść zachavańnia pamiaci pra kožnaha, navat čužoha dla siabie čałavieka, jaki niespraviadliva asudžany.
I ja padumaŭ, što kali b u ŭmovach toj izalacyi, u jakoj znachodziacca mnohija palitźniavolenyja, jany viedali, što pra ich pamiatajuć navat čužyja ludzi, heta vielmi dapamahała b źniać psichałahičny cisk. Paviercie, adno z samych pakutlivych katavańniaŭ — katavańnie zabyćciom. Tamu prośba da ŭsich, chto moža danieści asudžanym hetuju maleńkuju historyju — zrabicie heta. Źniavolenym heta vielmi patrebna», — napisaŭ jon.
«Siońnia (u čaćvier) ja byŭ u hetaj carkvie i sustreŭsia z hetymi nievierahodnymi ludźmi. Na fota — adzin ź ich. I my damovilisia, što ja pasprabuju zrabić tak, kab maja pieršaja pramova na niamieckaj movie, jakuju ja zmahu pračytać (navat nie skazać), adbyłasia ŭ hetaj carkvie. A jon vykazaŭ žadańnie pabyvać u Biełarusi i pravieści apošniuju malitvu za apošniaha palitźniavolenaha na našaj radzimie (na žal, nie na našaj rodnaj movie). Vielmi chočacca, kab heta nie zatrymałasia i zdaryłasia ŭžo ŭ hetym hodzie.
A padaryła mnie hety cudoŭny viečar i historyju vydatnaja žančyna Ina, adna z tych, chto składaje serca hetaj hrupy i ščodra dzielicca svajoj dabrynioj i dapamohaj ź biełarusami (i nie tolki) u Hiermanii», — dadaŭ Viktar Babaryka.
Kamientary