Viečny prezident Uhandy pieramahaje na vybarach siomy raz. Jon kiruje krainaj z 1986 hoda

Uhandyjski vybarkam paviedamiŭ na bryfinhu, što pa vynikach padliku hałasoŭ na pałovie vybarčych učastkaŭ Musiavieni nabraŭ 76,25%, Vajn — 19,85%, a astatnija hałasy raźmierkavalisia pamiž šaściu inšymi kandydatami.

Musiavieni zajaviŭ žurnalistam paśla hałasavańnia, što čakaje pieramohi z 80% hałasoŭ, «kali nie budzie machlarstva».

Vajn u čaćvier zaklikaŭ svaich prychilnikaŭ da pratestaŭ, adnak, jak adznačaje Reuters, prykmiet demanstracyj pakul nie nazirajecca.

Partyja Vajna «Płatforma nacyjanalnaha adzinstva» napisała pozna ŭviečary ŭ čaćvier u X, što vajskoŭcy i palicyja atačyli dom ich lidara ŭ stalicy Kampale, faktyčna ŭziaŭšy jaho i jaho žonku pad chatni aryšt.

Jak śćviardžajecca, supracoŭniki sił biaśpieki pieraskočyli praz aharodžu i raźbili pałatki na terytoryi jaho doma.

Pradstaŭnik palicyi Kituuma Rusokie zajaviŭ ahienctvu Reuters, što jamu ničoha nie viadoma ab źmiaščeńni Vajna pad chatni aryšt.

Musiavieni, jakomu zaraz 81 hod, pryjšoŭ da ŭłady ŭ vyniku vajskovaha pieravarotu ŭ 1986 hodzie.

Aficyjnyja ŚMI krainy malujuć jaho vyzvalicielem naroda Uhandy i miratvorcam, a sam jon nazyvaje siabie harantam stabilnaści. Krytyki kažuć, što jon pabudavaŭ kult asoby, akružaje siabie łajalnymi ludźmi i zapałochvaje palityčnych praciŭnikaŭ.

Z-za jaho pažyłoha ŭzrostu iduć razmovy pra toje, chto moža stać jaho pierajemnikam.

Ličycca, što jon chacieŭ by bačyć pierajemnikam syna, kiraŭnika ŭzbrojenych sił Muchuzi Kajnieruhabie, choć sam Musiavieni admaŭlaje, što rychtuje jaho da hetaj roli. Bobi Vajn (sapraŭdnaje imia Robiert Kiahułańji Ssientamu) — viadomy ŭ krainie muzyka, vykanaŭca muzyki ŭ styli rehi.

Prychilniki nazyvajuć jaho «prezidentam truščob»: jon vyras u sumna znakamitych truščobach Kampały, dzie stvaryŭ svaju muzyčnuju studyju, jakaja stała viadomaj va ŭsim śviecie. Jaho partyja, Płatforma nacyjanalnaha adzinstva, zmahajecca za pašyreńnie dostupu nasielnictva da sistemy achovy zdaroŭja, adukacyi, čystaj vady i za spraviadlivyja sudy.

Vajn zajaŭlaje, što karystajecca padtrymkaj moładzi ŭ krainie z samym maładym nasielnictvam u śviecie: siaredni ŭzrost žycharoŭ Uhandy składaje 16 hadoŭ.

Situacyja mocna nahadvaje tuju, što była piać hadoŭ tamu, kali prachodzili minułyja vybary. Hałoŭnym apanientam prezidenta taksama byŭ Bobi Vajn, jaki nabraŭ, pavodle aficyjnych źviestak, kala 35% hałasoŭ, a Musiavieni nabraŭ 59%.

• 0
• 0
• 0
• 1
• 0
• 0
• 0
• 0