Pravavaja baza dla renavacyi ŭžo ŭ raspracoŭcy.
Słova «renavacyja» ŭsio čaściej hučyć z vysokich trybun. Kurs na «aphrejd» staroha žylla byŭ abaznačany jašče ŭ 2024 hodzie, kali abmiarkoŭvaŭsia prajekt Kancepcyi dziaržaŭnaj žyllovaj palityki da 2030 hoda. Tady ž prahučała i davoli śmiełaja farmuloŭka: «pa prykładzie našych rasijskich kaleh», piša Onliner.by.
— Renavacyja praduhledžvaje pavieličeńnie ščylnaści zabudovy z zachavańniem kamfortnaści. Davoli značnaja častka žyllovaha fondu ŭ krainie maje kali nie hraničnyja terminy ekspłuatacyi, to vielmi surjozny znos. I my nie možam pastajanna pravodzić kapitalnyja ramonty i sprabavać padtrymlivać hety fond u naležnym stanie. Tym bolš što kapramont nie praduhledžvaje pavyšeńnia ŭzroŭniu dobraŭparadkavańnia. Tamu nam, pa prykładzie našych rasijskich kaleh, para pierachodzić da temy renavacyi, — tłumačyŭ były ministr architektury i budaŭnictva.
Hetaja navina i pužała, i začaroŭvała: ci nie pačnuć u nas znosić chruščoŭki i ŭzvodzić na ich miescy vyšynnyja damy? Prynamsi, mienavita tak adbyvajecca ŭ Maskvie — u tych samych «rasijskich kaleh».
U 2025 hodzie, kali Kancepcyja była pryniata, źjaviłasia i krychu bolš jasnaści. Pad renavacyjaj stali razumieć «palapšeńnie technika-ekanamičnych charaktarystyk isnujučych žyłych damoŭ abo ŭźviadzieńnie novych žyłych damoŭ zamiest źniesienych, u tym liku z vykarystańniem isnujučych fundamientaŭ i inžyniernych sietak».
Asobnym punktam było prapisana, što finansavańnie prajekta ŭ renavacyi budzie ažyćciaŭlacca za košt srodkaŭ miascovaha biudžetu i pryvatnych inviestycyj.
Dla ŭłaśnikaŭ žylla, jakoje padpadaje pad renavacyju, płanujecca stvaryć «aptymalny ałharytm realizacyi pravoŭ»: ludzi zmohuć atrymać hrašovuju kampiensacyju abo raŭnaznačnaje pa płoščy žyllo, u tym liku ŭ damach, što padlahajuć renavacyi.
I voś pastupova ahulnaja teoryja pačynaje nabyvać kankretnyja rysy. Pra pierśpiektyvy renavacyi chruščovak časopisu «Ekanomika Biełarusi» raspavioŭ ministr architektury i budaŭnictva Alaksandr Studnieŭ.
«Tak zvanych chruščovak u Biełarusi — 2568, ich ahulnaja płošča kala 10 młn kvadratnych mietraŭ, ź ich panelnych — 1864, abo kala 7 młn kvadratnych mietraŭ. U Minsku — 890 panelnych damoŭ 1955—1975 hadoŭ, heta kala 3 młn kv. m, narmatyŭny 25‑hadovy termin słužby jakich daŭno skončyŭsia», — skazaŭ ministr.
Mienavita tamu ŭ dziaržaŭnaj prahramie budaŭnictva žylla na 2026—2030 hady renavacyja žyllovaha fondu źjaŭlajecca adnoj z pryjarytetnych zadač.
Paśla zaviaršeńnia raspracoŭki pravavoj bazy renavacyi terytoryj i kankretnych damoŭ budzie vyznačana stratehija pa znosie abo adnaŭleńni žyllovaha fondu, jaki patrabuje sučasnych rašeńniaŭ i padychodaŭ.
Kamientary