«Biŭ nažom, videlcam i prasam». U Minsku sudziać biełarusa, jaki 25 hadoŭ tamu zabiŭ brytanskaha pradziusara ŭ Maskvie

U Minskim haradskim sudzie pačaŭsia praces ab zabojstvie ŭ 1999 hodzie ŭ Maskvie hienieralnaha pradziusara telekanała STS Krystafiera Rysa. 

Abvinavačanym pa spravie prachodzić hramadzianin Biełarusi Dźmitryj Cieranciuk, jakoha pryvieźli na sud z kałonii: jon adbyvaje termin za zabojstva svajoj sužycielki, piša Sputnik.

Krystafiera Rysa ŚMI nazyvali adnym z samych upłyvovych pradziusaraŭ rasijskaha telebačańnia. Jon zajmaŭsia šoŭ-biznesam na radzimie ŭ Vialikabrytanii, dzie supracoŭničaŭ u tym liku z kampanijaj «Dyśniej», a ŭ kancy 1990-ch pryjechaŭ u Rasiju i ŭznačaliŭ zabaŭlalny kanał STS.

27 vieraśnia 1999 hoda Rys nie vyjšaŭ da svajho kiroŭcy, kab jechać na pracu. Supracoŭniki telekanała zajšli ŭ kvateru i ŭbačyli na łožku źniaviečanaje cieła 37-hadovaha pradziusara. Śledstva vyśvietliła, što jon atrymaŭ čatyry ranieńni kuchonnym nažom, kołatyja rany videlcam i ŭdar pa hałavie prasam. Pry hetym adbitkaŭ palcaŭ zabojcy i śladoŭ uzłomu nie było.

Spravu ŭdałosia raskryć tolki praz 24 hady. U vieraśni 2023 hoda stała viadoma, što ekśpierty praviali ekśpiertyzu DNK uzoraŭ, sabranych na miescy złačynstva, i ŭstanavili asobu čałavieka, jaki znachodziŭsia z Rysam u adnoj kvatery ŭ dzień zabojstva. Im akazaŭsia biełarus Dźmitryj Cieranciuk, na momant zabojstva jamu było 19 hadoŭ.

Jaho abviaścili ŭ vyšuk, ale akazałasia, što mužčyna ŭžo znachodzicca za kratami. Jon adbyvaje 16 hadoŭ za zabojstva sužycielki. 

U sudzie zasłuchali pakazańni byłoha sukamiernika mužčyny. Pavodle jaho słoŭ, abvinavačany byŭ zaniepakojeny tym, što milicyja daviedałasia jašče pra adno zabojstva, učynienaje ŭ Maskvie ŭ 1999 hodzie. Mužčyna raskazvaŭ sukamierniku, što paznajomiŭsia z Rysam u bary, paźniej jany pryjechali ŭ kvateru pradziusara na Ćviarskoj.

Pa viersii abvinavačanaha, jon vyrašyŭ zastupicca za niejkuju dziaŭčynu, da jakoj Rys pačaŭ prystavać. Mužčyna nanios jamu množnyja ranieńni raźbitaj butelkaj, nanosiŭ udary ŭsim, što «traplałasia pad ruku». Jak vynikaje z apubličanych pakazańniaŭ śviedki, abvinavačany raskazaŭ jamu, što «raździełaŭ mužčynu na kavałki, było prosta miesiva, vykałaŭ vočy ( … ), paraniŭ sabie palec». Jak vynikaje z materyjałaŭ spravy, cieła zabitaha Krystafiera Rysa było aholenym.

Pry hetym rasijskija śledčyja ličyli, što biełarus zabiŭ Rysa z metaj rabavańnia. Zabojca mocna źbiŭ pradziusara, skraŭ u jaho 250 dalaraŭ i telefon, paśla čaho pajšoŭ z kvatery.

Minski sud pryniaŭ rašeńnie ahučvać padrabiaznaści pa spravie, jakija nosiać intymny charaktar, na zakrytym sudovym pasiadžeńni. Mužčynu abvinavačvajuć u zabojstvie z asablivaj žorstkaściu.

• 1
• 0
• 1
• 2
• 5
• 0
• 2
• 0