Tramp plonna parazmaŭlaŭ z prezidentam Kałumbii. Toj apublikavaŭ kranalnaje fota simvałaŭ ZŠA i Kałumbii
Čatyry dni tamu prezident ZŠA pahražaŭ Hustava Pietra, što jon moža stać nastupnym za Nikałasam Madura.
Tramp zajaviŭ, što pahavaryŭ pa telefonie z prezidentam Kałumbii Hustavam Pietra i anansavaŭ sustreču ź im u Biełym domie. Pra heta amierykanski lidar paviedamiŭ u svajoj sacyjalnaj sietcy Truth Social.
Pavodle słoŭ Trampa, Hustava Pietra patelefanavaŭ jamu, kab «rastłumačyć situacyju, źviazanuju z narkotykami, a taksama inšaje roznahałośsie».
«Ja acaniŭ jaho zvanok i ton razmovy i ź nieciarpieńniem čakaju sustrečy ŭ blizkaj budučyni», — napisaŭ jon, a taksama paviedamiŭ, što vice-prezident Džej Dzi Vens i ministr zamiežnych spraŭ Kałumbii ŭžo damovilisia pra sustreču, jakaja adbudziecca ŭ Biełym domie.
Hustava Pietra paśla razmovy apublikavaŭ fatahrafiju biełahałovaha arłana ź jahuaram. Biełahałovy arłan ličycca nacyjanalnaj ptuškaj ZŠA.
U listapadzie Pietra zhadvaŭ lehiendu, pavodle jakoj jahuar, što spaŭ pakaleńniami, abudžajecca, kali bierkut napadaje na kondara. Jon adznačaŭ, što ŭ minułym miascovyja žychary ŭžo davali adpor zamiežnym zavajoŭnikam. Tady ž lidar Kałumbii papiaredziŭ Trampa i Rubia.
Niekalki dzion tamu paśla bliskučaj apieracyi pa zachopie lidara Vieniesueły Nikałasa Madura Donald Tramp zajaviŭ nastupnaje: «Kałumbija taksama vielmi chvoraja. Joju kiruje chvory čałaviek, jaki lubić vyrablać kakain i pradavać jaho Złučanym Štatam, i jon nie zmoža doŭha hetym zajmacca», — skazaŭ jon.
U adkaz na pytańnie, ci budzie apieracyja ZŠA suprać Kałumbii, Tramp zajaviŭ, što heta zdajecca jamu «dobrym varyjantam».
Hustava Pietra ŭ adkaz paabiacaŭ uziać u ruki zbroju.
«ZŠA — pieršaja kraina ŭ śviecie, jakaja za ŭsiu historyju čałaviectva bambiła stalicu Paŭdniovaj Amieryki. Navat Nietańjachu, Hitler, Franka ci Sałazar hetaha nie rabili, — napisaŭ jon. — Kanstytucyja abaviazvaje ŭzbrojenyja siły abaraniać dziaržaŭny suvierenitet. Choć ja nie byŭ sałdatam, ja viedaju pra vajnu i tajnyja apieracyi. Ja prysiahnuŭ nikoli bolš nie brać u ruki zbroju paśla mirnaha pahadnieńnia 1989 hoda, ale dziela nacyi ja znoŭ vaźmusia za zbroju, navat kali mnie heta nie spatrebicca», — skazaŭ jon.
Ciapier čytajuć
Biznesoviec rodam z Babrujska admovicca ad svajho hihanckaha aŭstralijskaha zarobku dziela šancu atrymać $35 miljonaŭ3
Kamientary