Syn Natalli Piatkievič z prydychańniem raskazaŭ, što znajšoŭ pracu ŭ picierskaj firmie

Filip Piatkievič, syn biełaruskaj vice-premjerki ad pieršaha šlubu, paviedamiŭ, što ad pačatku hoda źjaŭlajecca partnioram picierskaj jurydyčnaj kampanii «Buźko Krasnoŭ». 

Svaje ŭražańni ad uśviedamleńnia hetaha fakta Filip Piatkievič zapisaŭ u čas hadzinnaha palotu ź Minska ŭ Sankt-Pieciarburh, a potym apublikavaŭ u svaim telehram-kanale. 

«Siedziačy na miescy 8S samalota Sankt-Pieciarburh — Minsk, mnie dastajecca krychu bolš za hadzinu razvažańniaŭ i ziefirynka, jakuju ź luboŭju daje «Biełavija».

Kalehi pa cechu bieź ciažkaściaŭ uspomniać svaje adčuvańni ad pieršaha ŭvachodu ŭ ofis jurydyčnaj firmy: kahości napałochali historyi pra doŭhija pracoŭnyja hadziny, niechta mocna zachacieŭ tudy trapić, a niechta nie pryniaŭ hetuju atmaśfieru i źmianiŭ kirunak. Padzialusia svaimi.

Išoŭ 2017 hod, kali ja atrymaŭ stažyroŭku ŭ jurfirmie z ofisam na vierchnich pavierchach modnaha biznes-centra z voknami ŭ padłohu. Mianie praviali pa kabinietach i paznajomili z supracoŭnikami, pakazali, dzie pieramoŭnaja, dzie kuchnia, a dzie kabiniety partnioraŭ.

Luby partnior tady zdavaŭsia kimści niedasiažnym — nibyta ŭzvyšanaj istotaj jurydyčnaha śvietu, jakaja spałučaje ŭ sabie viedy, mudraść i mahčymaść najmać i zvalniać.

Ja jakraz dahladaŭ čarhovy siezon «Fors-mažoraŭ», i dumki pra budučyja jurydyčnyja pieramohi ŭzbudžali małady rozum.

Napeŭna, mienavita tady ja i vyrašyŭ, što chaču prajści ŭsiu hetuju leśvicu ad pačatku da kanca, asvojvajučy prafiesiju.

Ale stažory na starcie — istoty małakarysnyja, tamu ja asvojvaŭ anbordynhi, zakony, šabłony i, viadoma ž, šredar dla źniščeńnia kanfidencyjalnych dakumientaŭ.

Hledziačy nazad, kožny momant ź pieršaha ŭvachodu ŭ ofis farmavaŭ mianie jak jurysta i jak asobu. Kab vy razumieli, ja navat znoŭ prajšoŭ svaje staryja asabistyja testy — i što vy dumajecie? Za šlach ad stažora da partniora ja pieratvaryŭsia z ekstravierta ŭ intravierta!

Voś što robić ź ludźmi kansałtynh.

Zusim nie jak u Armstronha — tut adbyŭsia mizerny krok dla čałaviectva, ale vielizarny dla adnaho jurysta pa imieni Filip Piatkievič. Za im buduć inšyja kroki, pieramohi i dasiahnieńni, jakija ja ŭžo pradčuvaju dla ŭsioj kamandy Buźko Krasnoŭ i dla siabie», — napisaŭ Filip. 

U kamientaryjach jaho pavinšavała maładaja supracoŭnica Biełteleradyjokampanii Vitalija Vińničak.

Čym hanarycca Filip? 

«Buzko Krasnov» — heta veb-psieŭdanim picierskaj TAA «Buźko i partniory», u jakoj sto pracentaŭ doli naležyć rasijaninu Ramanu Buźko. 

Adnajmiennaje advakackaje biuro było likvidavana ŭ 2024 hodzie, adpaviedna, u novym TAA Filip Piatkievič moža być partnioram tolki pa naźvie, a ŭ realnaści tolki najomnym supracoŭnikam (kali nie stanie saŭładalnikam). 

Na sajcie TAA supracoŭnikami ŭkazany 14 čałaviek, ale nie ŭsie jany aficyjna aformlenyja ŭ štat. 

Hod apošniaj dastupnaj na hety momant finansavaj spravazdačnaści kampanii — 2024. Pa joj možna prykinuć, što siaredni miesiačny zarobak u arhanizacyi skłaŭ kala $1620. Čysty prybytak kampanii pa vynikach hoda — $35 tysiač. 

Na sajcie kampanii Filip Piatkievič nasupierak źviestak z rejestra paznačany «partnioram». Paviedamlajecca, što Filip «dapamahaje pradprymalnikam i inavataram zastavacca ŭ pravavym poli, pakul jany źmianiajuć hety śviet».

Małady čałaviek «kansultuje krypta-startapy, strukturuje inviestycyjnyja fondy ŭ ZŠA i afšornych rehijonach, padbiraje aptymalnyja jurysdykcyi dla prajektaŭ luboha maštabu».

«Pa-za miežami ofisa Filipa možna znajści za vuličnaj fatahrafijaj, padarožžami abo hulnioj u holf ci tenis», — dadaje sajt. 

Nahadajem, Filip skončyŭ elitny Licej BDU, bakałaŭra atrymaŭ na jurydyčnym fakultecie BDU (z adznakaj), a mahistra prava (taksama z adznakaj) — u ńju-jorkskim Fordham University, kudy chłopiec razam z mamaj pierabraŭsia da druhoha pa liku ajčyma — dypłamata Valancina Rybakova.

Paśla zakančeńnia mahistratury ŭ Ńju-Jorku, sa žniŭnia 2019 da krasavika 2020‑ha, Filip, miarkujučy ź jahonaj staronki ŭ Linkedin, byŭ stažoram (associate attorney) u adnoj ź jurydyčnych praktyk Ńju-Jorka.

Paśla hetaha chłopiec raźvitaŭsia sa Štatami.

Sa žniŭnia 2020 pa červień 2022 miescam pracy Filipa Piatkieviča paznačana litoŭskaja jurydyčnaja kampanija Sorainen, aktyŭnaja ŭ krainach Bałtyi i Biełarusi. Filip pakinuŭ adznaku, što pracavaŭ on-site — na miescy, na pasadzie — associate.

U pieryjad 2021‑2022 hoda chłopiec prachodziŭ kursy pavyšeńnia kvalifikacyi pry biełaruskim Ministerstvie finansaŭ adrazu pa troch prahramach: «Karparatyŭnaje kiravańnie. Vypusk i raźmiaščeńnie kaštoŭnych papier», «Prafiesijnaja i biržavaja dziejnaść pa kaštoŭnych papierach u Respublicy Biełaruś» i «Padatkovaje kansultavańnie arhanizacyj, indyvidualnych pradprymalnikaŭ i fizičnych asob». 

U 2024 hodzie Filip staŭ vykładčykam-stažoram na jurydyčnym fakultecie BDU. Kursy Piatkieviča — «Pravavoje rehulavańnie ličbavych technałohij u haspadarčaj dziejnaści» i «Arhanizacyjna-pravavyja asnovy ličbavaj ekanomiki».

U internecie možna znajści dva pracesy ŭ Štatach, u jakich udzielničaŭ Filip.

U abodvuch jon razam ź inšymi jurystami pradstaŭlaŭ ruskamoŭnych zajaŭnikaŭ, adzin ź jakich chacieŭ, kab Binance razmaroziŭ jahony kryptakašalok, a druhi spadziavaŭsia viarnuć hrošy, jakija addaŭ machlaram sa skam-prajekta CryptoKG. Vyniki razhladu nieviadomyja.

• 2
• 4
• 3
• 18
• 2
• 0
• 5
• 0