U Muziej Volnaj Biełarusi pieradali biuleteni 2020 hoda, jakija sprabavali spalić
Kalekcyja Muzieja Volnaj Biełarusi ŭ Varšavie ŭ studzieni 2026 hoda papoŭniłasia ŭnikalnymi artefaktami. Byłaja palitźniavolenaja Palina Šarenda-Panasiuk pieradała va ŭstanovu aryhinalnyja biuleteni z prezidenckich vybaraŭ 2020 hoda, jakija vyciahnuli z ahniu.
Historyja hetych dakumientaŭ dramatyčnaja. Jak adznačajuć u muziei, ułady sprabavali źniščyć ich u adnoj z bresckich kacielniaŭ 10‑11 žniŭnia 2020-ha, adrazu paśla vybaraŭ, kab schavać ślady falsifikacyj. Adnak miascovyja aktyvisty zdoleli litaralna vyciahnuć papiery z ahniu i paźniej pieradali ich Palinie Šarendzie-Panasiuk. Pra heta piša «Radyjo Svaboda».
Uvieś čas, pakul aktyvistka znachodziłasia ŭ źniavoleńni, biuleteni byli nadziejna schavanyja na terytoryi Biełarusi. Nahadajem, Palina praviała za kratami niekalki hadoŭ — joj dvojčy dadavali termin pavodle artykuła za «złosnaje niepadparadkavańnie administracyi kałonii». Tolki paśla jaje vyzvaleńnia ŭ lutym 2025 hoda i terminovaj evakuacyi siamji za miažu stała mahčymym vyvieźci i hetyja dokazy.
Ciapier 20 biuleteniaŭ stali novymi ekspanatami muzieja. Na ich vyrazna bačnyja ślady ahniu, a taksama podpisy členaŭ vybarčych kamisij, što śviedčyć pra aŭtentyčnaść dakumientaŭ. U muziei padkreślivajuć: vyratavanyja arkušy — heta nie tolki abjekt kalektyŭnaj pamiaci, ale i pramy dokaz złačynstvaŭ režymu, jaki moža być vykarystany ŭ budučych sudach.
Muziej Volnaj Biełarusi, zasnavany ŭ Varšavie ŭ 2022 hodzie, śpiecyjalizujecca mienavita na takich śviedčańniach epochi. U jaho fondach užo zachoŭvajecca bolš za 400 ekspanataŭ, jakija adlustroŭvajuć baraćbu biełarusaŭ: ad turemnych robaŭ i listoŭ palitviaźniaŭ (u tym liku Viktara Babaryki i zakatavanaha Alesia Puškina) da rečaŭ bajcoŭ Pałka Kalinoŭskaha. Pieradača biuleteniaŭ stała čarhovym unioskam u zachavańnie praŭdy pra padziei 2020 hoda.
Kamientary
A chto nia zhodny, dašlicie ŭ redakcyju svaje paŭspalenyja biuleteni - i my tut usio ŭzvažym i vyrašym pa spraviadlivaści!