Biełaruska Darja Dalidovič vystupić u Kubku śvietu pa bijatłonie ŭ jakaści biežanki
Sprynt projdzie siońnia ŭ niamieckim Abierchofie.
Darja Dalidovič stanie pieršaj bijatłanistkaj u historyi, jakaja vystupić u mižnarodnych spabornictvach u składzie Bijatłonnaj kamandy biežancaŭ (Biathlon Refugee Team — BRT).
21-hadovaja Darja voźmie ŭdzieł u etapie Kubku śvietu pa bijatłonie, jaki prachodzić u Abierchofie.
Sprynt projdzie siońnia i pačniecca a 17:15 pa Minsku, Darja vyjdzie na trasu 91-j.
Darja — dačka ŭdzielnika siami Alimpijad u składzie zbornaj Biełarusi pa łyžnych honkach Siarhieja Dalidoviča. Čatyry hady tamu hety spartoviec padtrymaŭ pratesty, vystupiŭ za sumlennyja vybary, a ŭ 2022‑m razam z dačkoj emihravaŭ u Polšču.
Raniej dziaŭčyna vystupała ŭ junijorskim Kubku śvietu pa bijatłonie bieź ściaha z paznakaj Belarus Refugee Team (kamanda ŭciekačoŭ ź Biełarusi).
Dva hady tamu Siarhiej raskazvaŭ pra dačku: «Na nas vyjšła Justyna Kavalčyk, viadomaja polskaja łyžnica, alimpijskaja čempijonka, jakuju ja viedaŭ bolš za dziesiać hadoŭ. Ciapier jana pracuje spartovym dyrektaram polskaj fiederacyi bijatłona. Justyna pračytała artykuły pra nas u polskich miedyja i źviazałasia z nami. Nie toje kab nas pryniali biaspłatna, chutčej, dapamahli z žytłom, z afarmleńniem dakumientaŭ i ŭładkavańniem u škołu. Pakul što Darja trenirujecca, i ŭ budučyni, ja dumaju, budzie vystupać za Polšču. Nadumanaja dyskvalifikacyja, jak u biełaruskim łyžnym sporcie, tut naŭrad ci mahčymaja».
Paśla ŭvarvańnia Rasii va Ukrainu z vykarystańniem terytoryi Biełarusi biełaruskija i rasijskija spartoŭcy adchilenyja ad mižnarodnych spabornictvaŭ i nie biaruć udziełu ŭ etapach Kubka śvietu i čempijanatach śvietu, Alimpijadach, a ŭdzielničajuć u Kubku Rasii.
Ciapier čytajuć
Cichanoŭskaja: Dzieci nie pierajechali ŭ ZŠA, a prosta časova buduć z tatam dziela biaśpieki5
Kamientary