Džon Koŭł pryjechaŭ u Vilniu i abmierkavaŭ Biełaruś ź litoŭskaj premjerkaj
U Litvie ź vizitam znachodzicca śpiecyjalny pradstaŭnik ZŠA pa Biełarusi Džon Koŭł. Padčas pajezdki jon sustreŭsia z premjer-ministarkaj krainy Inhaj Ruhinienie, paviedamlaje LRT.
Padčas sustrečy kiraŭnica ŭrada padziakavała amierykanskamu dypłamatu za namahańni, nakiravanyja na vyzvaleńnie palitviaźniaŭ u Biełarusi. Jana padkreśliła, što pazicyja Litvy zastajecca niaźmiennaj: u Biełarusi pavinny spynicca represii, a ŭsie palityčnyja źniavolenyja musiać być vyzvalenyja.
Baki taksama abmierkavali pytańni rehijanalnaj biaśpieki. Litoŭski bok ličyć, što Biełaruś zastajecca adnoj z hałoŭnych pahroz u rehijonie. U jakaści prykładaŭ nazyvalisia tak zvanyja hibrydnyja dziejańni — niezakonnaja mihracyja, kantrabanda, incydenty z hruzavym transpartam, a taksama padtrymka Rasii ŭ vajnie suprać Ukrainy.
Akramia taho, było adznačana, što Jeŭrapiejski Sajuz praciahvaje adziny kurs u dačynieńni da Biełarusi, u tym liku praz zachavańnie sankcyj.
Litva taksama padkreśliła važnaść stratehičnaha partniorstva sa ZŠA i sajuźnickich adnosin pamiž dźviuma krainami.
Raniej paviedamlałasia, što paśla naviedvańnia Vilni Koŭł źbirajecca jechać u Minsk. Jahonyja vizity, jak praviła, supravadžajucca vyzvaleńniem častki palitviaźniaŭ.
Kamientary