Kruty: Rabotniki z Uźbiekistana zavoziacca ŭ Biełaruś pad inviestprajekty

Pa słovach Dźmitryja Krutoha, padčas apošnich pieramoŭ kiraŭnikoŭ Biełarusi i Uźbiekistana havorka išła pierš za ŭsio pra raźvićcio inviestycyjnaha supracoŭnictva, a nie prosta pra abmien pracoŭnaj siłaj.

Čynoŭnik adznačyŭ, što handlovyja adnosiny pamiž dźviuma krainami raźvivajucca paśpiachova. Uźbiekistan, pavodle jaho słoŭ, zacikaŭleny ŭ realizacyi ŭ Biełarusi prajektaŭ u śfiery ahrapramysłovaha kompleksu, pierapracoŭki pradukcyi i inšych halin.

Asablivaja ŭvaha, jak paviedamiŭ Kruty, nadajecca charčovaj biaśpiecy. U jakaści prykładu jon pryvioŭ vytvorčaść i pastaŭki sielskahaspadarčaj pradukcyi, u tym liku bulby. Pavodle jaho słoŭ, va Uźbiekistanie paśla zakančeńnia siezona rańnich sartoŭ uźnikaje deficyt poźnich sartoŭ, tamu kraina zacikaŭlenaja ŭ sumiesnych prajektach vyroščvańnia i pastavak.

Dla realizacyi takich prajektaŭ, adznačyŭ kiraŭnik administracyi Łukašenki, i mohuć załučacca rabotniki z Uźbiekistana. Jon padkreśliŭ, što havorka idzie pra śpiecyjalistaŭ z adpaviednaj kvalifikacyjaj, jakija buduć pracavać na kankretnych pradpryjemstvach i inviestycyjnych placoŭkach.

Čynoŭnik taksama raskazaŭ, što pracedura pryjezdu zamiežnych rabotnikaŭ u Biełaruś praduhledžvaje niekalki etapaŭ. Spačatku biełaruskija arhanizacyi padajuć zajaŭki na nieabchodnych śpiecyjalistaŭ, paśla čaho pravodzicca pravierka kandydataŭ, u tym liku praz dypłamatyčnyja struktury.

Paśla pryjezdu rabotniki zaklučajuć pracoŭnyja damovy, u jakich vyznačajucca ŭmovy apłaty pracy, abaviazki i inšyja harantyi. Asobna vyrašajecca pytańnie žylla — mohuć vykarystoŭvacca internaty, hateli, arendnaje abo inšaje žyllo.

Kali rabotniki pryjazdžajuć razam ź siemjami, to ich svajaki, pavodle słoŭ Krutoha, atrymlivajuć mahčymaść sacyjalizacyi: darosłym dapamahajuć z pracaŭładkavańniem, a dzieciam — z navučańniem u škołach i dziciačych sadkach.

Jon taksama zajaviŭ, što tema pryjezdu rabotnikaŭ z Uźbiekistana była, maŭlaŭ, «razdźmutaja infarmacyjna». Kruty paraŭnaŭ ciapierašniuju situacyju z papiarednimi dyskusijami vakoł mahčymaj pracoŭnaj mihracyi ź inšych krain i padkreśliŭ, što meta takich prajektaŭ — kab jany byli vyhadnymi jak Biełarusi, tak i Uźbiekistanu.

Paśla taho, jak padčas niadaŭniaha vizitu ŭ Biełaruś prezidenta Uźbiekistana Šaŭkata Mirzijojeva była padpisanaja adpaviednaja dvuchbakovaja damova, pjeršaja arhanizavanaja hrupa hramadzian Uźbiekistana ŭžo prybyła ŭ Biełaruś. Paviedamlałasia, što jany buduć pracavać u vaśmi rajonach Viciebskaj vobłaści, a taksama ŭ Viciebsku i Navapołacku. Najbolš ich źbirajucca vykarystać u sielskaj haspadarcy, budaŭnictvie i žyllova-kamunalnaj haspadarcy.

Adnak ža adrazu paśla prybyćcia ŭźbiekskich rabotnikaŭ akazałasia, što ŭmovy, jakija im nasamreč prapanavali, značna adroźnivajucca ad dekłaravanych, što vyklikała kanflikt. Paśla jaho ŭdałosia prynamsi časova prytušyć pavyšeńniem zarobkaŭ i palapšeńniem žyllovych umoŭ.

• 0
• 0
• 3
• 2
• 0
• 0
• 0
• 0