Prezident Vienhryi padpisaŭ źmieny ŭ Kanstytucyju, jakija spyniajuć jaho paŭnamoctvy
Prezident Vienhryi Tamaš Šujak padpisaŭ papraŭki ŭ Kanstytucyju krainy, jakija praduhledžvajuć, u tym liku, daterminovaje spynieńnie jaho prezidenckaha mandata. Pra heta jon paviedamiŭ u videazvarocie paśla taho, jak parłamient Vienhryi ŭchvaliŭ adpaviednyja źmieny, piša «Jeŭrapiejskaja praŭda».
Paśla pryniaćcia zakona ŭ prezidenta było piać dzion, kab padpisać dakumient abo nakłaści vieta. U subotu hety termin skončyŭsia, i Šujak vyrašyŭ padpisać papraŭki.
U svaim zvarocie jon zajaviŭ, što zaŭsiody kiravaŭsia pavahaj da prava i ličyć padpisańnie papravak svaim kanstytucyjnym abaviazkam. Pavodle jaho słoŭ, hetaje rašeńnie maje dziaržaŭnaje značeńnie i nie pavinna razhladacca tolki praz pryzmu asabistych abo palityčnych intaresaŭ.
Paśla aficyjnaha apublikavańnia zakona mandat Šujaka budzie spynieny na nastupny dzień.
Tamaš Šujak staŭ prezidentam Vienhryi ŭ 2024 hodzie paśla skandalnaj adstaŭki jahonaj papiarednicy Katalin Novak. Jaho paŭnamoctvy pieršapačatkova pavinny byli dziejničać da sakavika 2029 hoda.
Papraŭki byli pryniatyja parłamientam, dzie kanstytucyjnuju bolšaść ciapier maje partyja «Cisa» pad kiraŭnictvam Pietera Madźjara. Padčas vybarčaj kampanii Madźjar abiacaŭ źmianić dziaržaŭnyja instytuty i vyzvalić pasady ad čynoŭnikaŭ, pryznačanych papiaredniaj uładaj, jakich jon nazyvaŭ zaležnymi ad staroj sistemy.
Akramia daterminovaha spynieńnia paŭnamoctvaŭ prezidenta, 17‑ia papraŭka da Kanstytucyi praduhledžvaje šyrokuju reformu dziaržaŭnych struktur. Jana siarod inšaha viartaje abmiežavańnie pa ŭzroście dla sudździaŭ Kanstytucyjnaha suda — 70 hadoŭ, što pryviadzie da chutkaha zaviaršeńnia paŭnamoctvaŭ niekalkich sudździaŭ, pryznačanych raniejšaj uładaj.
Taksama źmieny ŭvodziać abmiežavańnie dla deputataŭ Nacyjanalnaha schodu — nie bolš za try parłamienckija terminy, a taksama skaračajuć kolkaść zakonaŭ, dla pryniaćcia jakich patrabujecca bolšaść u dźvie traciny hałasoŭ.
Raniej były premjer-ministr Vienhryi Viktar Orban zaklikaŭ da pratestaŭ suprać sprob Madźjara źmianić status prezidenta, adnak hety zaklik nie atrymaŭ šyrokaj padtrymki.
Orbanaŭskaha ministra zamiežnych spraŭ pracaŭładkavała kitajskaja bujnaja karparacyja
U Vienhryi prypynili pracu i vybačylisia ŚMI, jakija byli asnovaj prapahandy Orbana. Jany buduć rearhanizavanyja
U Vienhryi źmianili Kanstytucyju, kab nie dazvolić Orbanu znoŭ stać premjer-ministram
Viktara Orbana znoŭ pieraabrali staršynioj partyi «Fides»
Ciapier čytajuć
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary