«Na ščaście, u Tajłandzie ŭsio tańniej, čym u Polščy». Biełarusy zachraśli praz vajnu ŭ Iranie, jak jany dabirajucca dadomu?
Dźvie historyi, u jakoj adna kampanija siabroŭ užo doma, a druhaja pazapłanava zastajecca ŭ Tajłandzie.
«Biełavija» z kanca lutaha vykanała 11 vyvaznych rejsaŭ z Dubaja, Dochi i Sałały, viarnuŭšy ŭ Biełaruś 2360 pasažyraŭ. A što ž tyja biełarusy, jakija žyvuć za miažoj i chočuć viarnucca ŭ hetyja svaje łakacyi? Ci tyja, chto źbiraŭsia viartacca praz krainy Piersidskaha zaliva, ale z-za admieny rejsaŭ nie moža dalacieć navat da Dubaja? Devby.io znajšoŭ dvuch biełarusaŭ z Polščy, jakija zatrymalisia ŭ sakaviku ŭ Tajłandzie.
Ksienija, markietołah, užo druhi tydzień sprabuje viarnucca z Tajłanda ŭ Polšču.
«Niekalki tydniaŭ tamu my razam z žanichom i siabram vyrašyli pajechać u adpačynak. Nahladzielisia sieryjała «Bieły łotas» i tamu vielmi chacieli ŭ Tajłand. Tak, doŭhaja i davoli darahaja daroha z Polščy. Ale my pahladzieli fota rajskich plažaŭ i Banhkoka i zrazumieli — jano taho vartaje.
Udałosia znajści niedarahija bilety (praŭda, z žorstkim maršrutam, na apošnim adrezku ja chacieła prosta pamierci). U vyniku lacieli Vrocłaŭ — Afiny — Deli — Banhkok. Z Banhkoka adpravilisia na vostraŭ Ko Čanh, adtul nazad u stalicu.
I pavinny byli 12 sakavika vylecieć pa maršrucie Banhkok — Abu-Dabi — Miłan — Poznań.
Prylacieli 27 lutaha, a na nastupny dzień Štaty pačali «śpiecyjalnuju vajennuju apieracyju» ŭ Iranie, i my zrazumieli, što, chutčej za ŭsio, naš zvarotny rejs nie adbudziecca.
Ale naša kampanija (Etihad) ničoha nie paviedamlała, tolki dzieści 7 sakavika pamianiali datu vyletu z Banhkoka. Tady ja pačała napružvacca i analizavać inšyja rejsy ŭ Jeŭropu. Varyjanty byli vielmi tak sabie: z-za zakryćcia asnoŭnych aeraportaŭ u Emiratach i Katary zastavalisia pramyja rejsy ŭ Jeŭropu (cana ad 3 tysiač jeŭra) abo praz Kitaj (ad 2 tysiač jeŭra). I rejsy praz Kitaj ci Małajziju zvyčajna byli z 5 pierasadkami. Razhladali varyjant: Banhkok — Čendu — Ałmaty — Kutaisi — Poznań (820 jeŭra na čałavieka).
Dla paraŭnańnia: našy pieršapačatkovyja bilety kaštavali kala 470 jeŭra tudy-nazad na čałavieka.
U vyniku 11 sakavika naš rejs spačatku admianili, a potym pieranieśli na 16 sakavika. My plunuli i pajechali z hora na poŭnač Tajłanda ŭ raskošny horad Čyanhmaj. Vydatna tam tusavalisia i daviedalisia, što rejs pieranosicca na 19 sakavika. U našaj kampanii zdaryŭsia niervovy zryŭ z-za hetaha, bo nie ŭsie pracujuć addalena i pryjšłosia vyrašać z pracadaŭcam takuju doŭhuju adsutnaść.
Nu i z-za taho, što treba siadzieć za svoj košt jašče tydzień u Tajłandzie: avijakampanija ničoha nie kampiensuje, tamu što vajna — nadzvyčajnaje zdareńnie. Jany prapanujuć tolki albo poŭny viartańnie bileta, albo pierabraniravańnie (biez dapłaty). Pryčym pierabraniravać ty nie možaš samastojna — tolki praź ich padtrymku ci jany aŭtamatyčna pieraniasuć rejs (naš vypadak).
Na ščaście, u Tajłandzie ŭsio tańniej, čym u Polščy. Ciapier my źniali dom z 2 spalniami i haścinaj u centry Čyanhmaja na 2 nočy za 50 jeŭra.
Karaciej, my ŭžo supakoilisia, kajfujem ad šykarnaha klimatu i ježy i žartujem, što kali nie palacim — značyć, znak, što treba zastavacca tut. Tajłand — supierkraina: ludzi — šykarnyja, ježa — ahoń, pryroda — nievierahodnaja, chramy — supier, vada jak parnaje małako! Ja ciapier nie viedaju, navošta jeździć u Jeŭropu na mora. Kali jašče raz admieniać rejs, dakładna pajedziem znoŭ na jaki-niebudź vostraŭ.
Ale dumaju, što na hetym tydni ŭsio ž dalacim da Jeŭropy.»
«Mnie jašče treba budzie viarnuć moj dron z Kitaja»
Andrej, prahramist. Viarnuŭsia ŭ Varšavu z Banhkoka z čatyrma pierasadkami.
Ja na miesiac lotaŭ u Tajłand z Polščy na zimoŭku. Samastojna, biez pucioŭki. Nazad — u pačatku sakavika pa maršrucie Banhkok — Šardža — Varšava. Kali Iran pačaŭ abstrelvać AAE, ja zrazumieŭ, što, mahčyma, pryjdziecca zatrymacca ŭ Tajłandzie.
Tak i atrymałasia. Na toj momant (4 sakavika) usie rejsy Air Arabia admianialisia, i maje taksama (avijakampanija viarnuła hrošy ŭ vyhladzie vaŭčara). Najbližejšyja rejsy AirArabia byli zapłanavanyja tolki na 16—18 sakavika, tamu ja vyrašyŭ pašukać alternatyŭnyja maršruty.
Na adnosna pramyja maršruty ceny byli astranamičnymi ( 2‑4 tysiačy jeŭra). Ja pasprabavaŭ palacieć praz Dochu na katarskich avijalinijach, ale hetyja rejsy taksama admianili. Tamu ja vyrašyŭ palacieć u abychod krain Blizkaha Uschodu, praz Kitaj i Turcyju.
U Kitaj ja vylecieŭ 10 sakavika. Ja lacieŭ u Piekin ź pierasadkaj u Juńčenie. Na nastupny dzień palacieŭ ź Piekina va Ułan-Batar, tam ja pravioŭ 20 hadzin i 12 sakavika vylecieŭ u Turcyju. Sa Stambuła ja ŭ toj ža dzień pramym rejsam dabraŭsia da Varšavy.
Usiaho moj šlach byŭ z čatyrma pierasadkami ŭ troch krainach i abyšoŭsia mnie ŭ 4500 złotych (1050 jeŭra). Darečy, u mianie biełaruski pašpart. Ja śpiecyjalna vybiraŭ tranzitnyja krainy ź biaźvizavym režymam dla biełarusaŭ.
Daroha była niaprostaja, jana krychu sapsavała ŭražańnie ad zimoŭki, zatoje ja naviedaŭ jašče dźvie krainy ŭ Azii. Abyšłosia biez prablem z pamiežnikami — ja vychodziŭ z aeraporta i ŭ Kitai, i ŭ Manholii.
A voś z achovaj aeraporta pryjšłosia tłumačycca z-za drona (braŭ z saboj z Polščy pazdymać u Tajłandzie). Pa darozie na zimoŭku da drona nijakich pytańniaŭ nie było, a voś u Kitai ŭźnikli. Akazvajecca, u Piekin nielha ŭvozić drony na borcie samalota — ni ŭ bahažy, ni ŭ ručnoj kładzi. Tamu jaho adpravili poštaj u piekinski hatel, u jakim ja spyniaŭsia.
Mianie adrazu papiaredzili, što dron nie paśpieje pryjechać da majho adjezdu ź Piekina (da vyletu zastavałasia 16 hadzin), tamu jaho los ja nie viedaju, mnie treba budzie zajmalny kvest pa jaho viartańni.
Jašče ŭ mianie zabrali paŭerbank, bo na im nie było adznaki ab siertyfikacyi SSS (China Compulsory Certificate — devby). Usie paŭerbanki biez takoj adznaki zabirali va ŭsich pasažyraŭ padčas pravierki biaśpieki ŭ Juńčenie.
Va Ułan-Batary ja pravioŭ 20 hadzin: paśpieŭ trochi pahulać. Ale ja byŭ užo davoli stomleny, tamu paŭnavartasna acanić horad nie atrymałasia.
Što da samoj zimoŭki, jana prajšła vydatna — u pieršuju čarhu dziakujučy kampanii maich siabroŭ. Siabry žyvuć u Biełarusi, tamu ŭ ich byŭ inšy maršrut, praz Taškient. Jany dabralisia biez prablem.
Uvohule, ab pajezdcy ja nie škaduju, navat ab niezapłanavanaj jaje častcy. Trochi škada hrošaj, ale ich možna jašče zarabić, a vopyt i naviedanyja krainy zastanucca sa mnoj nazaŭždy.
Kamientary