Staradruki, jakija vykradalisia ź biblijateki Varšaŭskaha ŭniviersiteta, vyvozilisia ŭ Maskvu praź Minsk
Polskaja prakuratura rychtujecca vystavić abvinavačańni ŭ pasrednictvie ŭ zbycie kradzienych rečaŭ Siarhieju Burmistravu — uładalniku maskoŭskaha aŭkcyjonnaha doma i byłomu ekśpiertu Ministerstva kultury Rasii. Pavodle infarmacyi śledstva, jon mieŭ dačynieńnie da handlu redkimi knihami XIX stahodździa, skradzienymi ź biblijateki Varšaŭskaha ŭniviersiteta, piša Onet.pl.
Klučavuju rolu ŭ kradziažach adyhraŭ hramadzianin Hruzii Michaił Z. Jon na praciahu niekalkich miesiacaŭ rehularna naviedvaŭ biblijateku, vydajučy siabie za daśledčyka. Skarystaŭšysia niedachopami kantrolu, jon vynosiŭ aryhinalnyja knihi, a na ich miesca padkładaŭ hruba zroblenyja padrobki. Supracoŭniki biblijateki doŭhi čas nie zaŭvažali padmieny, bo praviarali tolki štrychkody.
Takim čynam ź biblijateki źnikli 78 kaštoŭnych vydańniaŭ — u tym liku pieršyja vydańni Puškina, Hohala, Lermantava i Kryłova — ahulnym koštam kala 3,8 miljona złotych (kala 1 miljona dalaraŭ).
Knihi nielehalna vyvozilisia praź Minsk, a apłata vykanaŭcam rabiłasia ŭ kryptavalucie.
Paźniej vyśvietliłasia, što da spravy była datyčnaja cełaja arhanizavanaja hrupa z hramadzian Hruzii, jakaja dziejničała pa padobnaj schiemie i ŭ inšych krainach Jeŭropy — u Hiermanii, Francyi, Aŭstryi, krainach Bałtyi. Usiaho ź jeŭrapiejskich biblijatek było vykradziena kala 170 redkich knih.
Častka skradzienych z Varšavy vydańniaŭ źjaviłasia na aŭkcyjonach u Maskvie i Sankt-Pieciarburhu. Niahledziačy na vidavočnyja piačatki biblijateki Varšaŭskaha ŭniviersiteta, knihi byli pradadzienyja, a aŭkcyjonny dom atrymaŭ prybytak kala miljona złotych (kala 277 tysiač dalaraŭ).
Śledstva ličyć, što biez maŭklivaj zhody rasijskich uładaŭ taki handal byŭ by niemahčymy, adnak pramych dokazaŭ udziełu dziaržavy pakul niama. Polskija śledčyja nie vyklučajuć, što za kradziažami stajali bahatyja rasijskija kalekcyjaniery, dla jakich takija knihi stali simvałam impierskaj nastalhii.
Viarnuć skradzienyja vydańni ŭ najbližejšy čas naŭrad ci atrymajecca, ale ŭsie jany ŭniesienyja ŭ mižnarodnyja rejestry stračanych kulturnych kaštoŭnaściaŭ. Śledčyja spadziajucca, što ź ciaham času knihi mohuć uspłyć u pryvatnych kalekcyjach.
Ź jeŭrapiejskich biblijatek skrali kala 170 redkich knih Puškina i inšych rasijskich kłasikaŭ. Navošta — nichto nie viedaje
Jeŭrapoł zatrymaŭ hrupu hruzinaŭ, jakija krali knihi ruskich piśmieńnikaŭ ź jeŭrapiejskich biblijatek
Dzie lažyć vykupleny Statut VKŁ? Pavieł Macukievič — pra toje, što biełarusy musiać sabie viarnuć
Ciapier čytajuć
Što viadoma pra zatrymanych radyjoamataraŭ, jakim pahražaje až da rasstrełu11
Kamientary