Ahienty Słužby mytnaha i pamiežnaha kantrolu ZŠA paranili dvuch čałaviek u Portlendzie, štat Arehon. Abodva paciarpiełyja dastaŭleny ŭ balnicu. U palicyi zaklikali žycharoŭ zachoŭvać spakoj.
Incydent adbyŭsia na nastupny dzień paśla taho, jak u Minieapalisie supracoŭnik imihracyjnaj słužby zastreliŭ žančynu, što vyklikała chvalu hramadskaha abureńnia i pratestaŭ, paviedamlaje Bi-bi-si.
«My razumiejem napružanaść i emocyi paśla stralby ŭ Minieapalisie, ale ja prašu ŭsich zachoŭvać spakoj, pakul my vyśviatlajem abstaviny zdareńnia», — zajaviŭ načalnik palicyi Portlenda Bob Dej, udakładniŭšy, što supracoŭniki palicyi nie majuć dačynieńnia da incydentu.
FBR zajaviła, što ŭ stralbie ŭ Portlendzie ŭdzielničali ahienty Słužby mytnaha i pamiežnaha kantrolu ZŠA. U Ministerstvie ŭnutranaj biaśpieki ZŠA patłumačyli dziejańni svaich ahientaŭ samaabaronaj.
Paciarpiełyja znachodziacca ŭ balnicy, ich stan pakul nieviadomy.
Mer Portlenda Kit Uiłsan zajaviŭ, što «nielha zastavacca abyjakavymi, kali padryvajucca kanstytucyjnyja harantyi i raście kolkaść achviar». Jon zaklikaŭ prypynić usie apieracyi fiederalnych imihracyjnych viedamstvaŭ, u tym liku ICE, u Portlendzie da zaviaršeńnia poŭnaha rasśledavańnia.
Jak paviedamili ŭ palicyi, supracoŭniki vyjechali na vyklik i vyjavili mužčynu i žančynu ź vidavočnymi ahniastrelnymi ranieńniami. Palicejskija nakłali žhut i vyklikali chutkuju dapamohu.
Staršynia haradskoj rady Portlenda Ełana Pirtł-Hini, na jakuju spasyłajecca ABC News, zajaviła, što, pavodle najaŭnaj u jaje infarmacyi, abodva paciarpiełyja zastajucca žyvymi.
U Ministerstvie ŭnutranaj biaśpieki ZŠA paviedamili, što ahienty Pamiežnaj słužby pravodzili metavuju pravierku aŭtamabila.
U zajavie viedamstva havorycca, što kiroŭca, jaki, mierkavana, źjaŭlajecca členam vieniesuelskaj bandy, sprabavaŭ najechać na ahientaŭ. U adkaz, pavodle źviestak ministerstva, «ahient zrabiŭ streł z metaj samaabarony», paśla čaho kiroŭca i pasažyr pakinuli miesca zdareńnia.
U Minieapalisie dniom raniej supracoŭnik inšaha amierykanskaha viedamstva ŭ struktury Ministerstva ŭnutranaj biaśpieki — Imihracyjnaj i mytnaj palicyi ZŠA (ICE) — zastreliŭ žančynu. Pavodle aficyjnaj viersii, miascovaja žycharka Rene Hud sprabavała najechać na supracoŭnika ICE na svaim aŭtamabili. Miascovyja ŭłady, abapirajučysia na videa incydentu, rašuča adchilajuć hetuju viersiju.
Incydent adbyŭsia padčas pratestnaj akcyi suprać dziejańniaŭ ICE pa zabieśpiačeńni vykanańnia imihracyjnaha zakanadaŭstva.
U Minieapalisie i niekatorych inšych haradach Miniesoty ŭ sieradu i čaćvier prajšli pratesty suprać dziejańniaŭ imihracyjnaj słužby i administracyi Trampa.
Ciapier čytajuć
Voś chto toj chłopiec, jaki pajechaŭ na prapołku bulby i staŭ hierojem sacsietak6
Kamientary